ಬೆಂಗಳೂರು: ಸ್ಟಾರ್ ಸಿನಿಮಾಗಳಿಗಷ್ಟೇ ಜನ ಬರುತ್ತಾರೆ. ಕನ್ನಡ ಸಿನಿಮಾಗಳಿಗೆ ಪ್ರೇಕ್ಷಕರ ಕೊರತೆಯಿದೆ. ಕುಟುಂಬಗಳು ಥಿಯೇಟರ್ಗಳಿಂದ ದೂರಾಗಿವೆ. ಒಟಿಟಿ ಅಬ್ಬರದ ನಡುವೆ ಸಿನಿಮಾ ಮಂದಿರಗಳು ಕಳೆದುಹೋಗುತ್ತಿವೆ... ಇತ್ತೀಚಿನ ವರ್ಷಗಳಲ್ಲಿ ಬಿಡುಗಡೆಯಾದ ಬಹುತೇಕ ಚಿತ್ರಗಳ ಕಂಪ್ಲೇಂಟ್ ಇದು. ಆದರೆ, ರಿಲೀಸ್ ಸಮಯದಲ್ಲಿ ಥಿಯೇಟರ್ ಸಮಸ್ಯೆ ಎದುರಿಸಿದ ಚಿತ್ರವೊಂದು ಇದೀಗ ನಾಲ್ಕನೇ ದಿನದಲ್ಲಿ ಮೊದಲ ದಿನಕ್ಕಿಂತ ನಾಲ್ಕು ಪಟ್ಟು ಶೋಗಳನ್ನು ಹೆಚ್ಚಿಸಿಕೊಂಡಿದೆ. ಅದೇ "ಪ್ರೇಮದ ಊರಲಿ'. ಕಳೆದ ಶುಕ್ರವಾರ (ಸೆ. 25) ರಾಜ್ಯಾದ್ಯಂತ ಕೇವಲ 40 ಸ್ಕ್ರೀನ್ಗಳಲ್ಲಿ ಬಿಡುಗಡೆಯಾದ ಈ ಚಿತ್ರಕ್ಕೆ ಮೊದಲ ದಿನ ಸಿಕ್ಕಿದ್ದು 60 ಪ್ರದರ್ಶನಗಳಷ್ಟೇ. ಅದಕ್ಕೆ ಕಾರಣ ಕನ್ನಡದಲ್ಲಿ ಒಟ್ಟು ಏಳು ಸಿನಿಮಾಗಳು ಬಿಡುಗಡೆಯಾಗಿದ್ದವು. ಜತೆಗೆ ತೆಲುಗಿನ ಪ್ಯಾನ್ ಇಂಡಿಯಾ "ಪ್ಯಾರಡೈಸ್' ಕೂಡ ರಿಲೀಸ್ ಆಗಿತ್ತು. ಆದರೆ, ತೆಲುಗಿನ ರಕ್ತಸಿಕ್ತ ಅಧ್ಯಾಯಕ್ಕಿಂತ, ಕನ್ನಡದ "ಪ್ರೇಮದ ಊರಿನ' ಸಂಬಂಧಗಳ ಸಂಭ್ರಮ ಪ್ರೇಕ್ಷಕರಿಗೆ ಇಷ್ಟವಾಯಿತು. ಎರಡನೇ ದಿನವೇ ಚಿತ್ರ ಹೆಚ್ಚುವರಿ 70 ಶೋಗಳನ್ನು ಪಡೆದು, 130ಕ್ಕೆ ಸಂಖ್ಯೆ ಹೆಚ್ಚಿಸಿಕೊಂಡಿತ್ತು. ಶನಿವಾರವೂ ಹಲವೆಡೆ ಹೌಸ್ಫುಲ್ ಪ್ರದರ್ಶನ ಕಂಡ ಕಾರಣ, ಭಾನುವಾರ 200 ದಾಟಿದ್ದು, ಸೋಮವಾರ ಮತ್ತಷ್ಟು ಹೊಸ ಶೋಗಳು, ಸ್ಕ್ರೀನ್ಗಳು ಸೇರಿಕೊಂಡಿವೆ.
ಪ್ಯಾನ್ ಇಂಡಿಯಾ ಮಾಸ್, ಮಸಾಲಾ, ಆ್ಯಕ್ಷನ್ ಅಬ್ಬರಗಳ ನಡುವೆ "ಅಕ್ಷಿ' ಖ್ಯಾತಿಯ ರಾಷ್ಟ್ರಪ್ರಶಸ್ತಿ ವಿಜೇತ ನಿರ್ದೇಶಕ ಮನೋಜ್ ಕುಮಾರ್, "ಪ್ರೇಮದ ಊರಲಿ' ಮೂಲಕ ರೊಮ್ಯಾಂಟಿಕ್ ಫ್ಯಾಮಿಲಿ ಡ್ರಾಮಾ ನಿರೂಪಿಸಿದ್ದಾರೆ. ಹಚ್ಚ ಹಸಿರಿನ ನಡುವೆ ನಡೆಯುವ ಸರಳ, ಸುಂದರ, ಭಾವನಾತ್ಮಕ ಹಳ್ಳಿ ಕಥೆಯಿದು. ಈ ಫೀಲ್ ಗುಡ್ ಚಿತ್ರದಲ್ಲಿ ಶ್ರೀರಾಮ್, ರಂಗಾಯಣ ರು, ರಮಿಕ ಶಿವು ಮತ್ತು ತಪಸ್ವಿನಿ ಪೂಣಚ್ಚ ನಟನೆ ಪ್ರೇಕ್ಷಕರಿಗೆ ಇಷ್ಟವಾಗಿದೆ. ನಿರ್ದೇಶಕ ಮನೋಜ್ ಕಲ್ಪನೆಗೆ ಪಾತ್ರಗಳು ಜೀವ ತುಂಬಿದ್ದರೆ, ಸುನಾದ್ ಗೌತಮ್ ಸಂಗೀತ, ರಾಜ್ಕಾಂತ್ ಛಾಯಾಗ್ರಹಣ ಉಸಿರು ನೀಡಿವೆ. "ಮುಂದಿನ ಶುಕ್ರವಾರದಿಂದ ಸಿನಿಮಾ ಪಿಕ್ ಆಗಬಹುದು ಅಂತಂದುಕೊಂಡಿದ್ದೆ. ಆದರೆ, ಬಿಡುಗಡೆಯ ದಿನದಿಂದಲೇ ಪ್ರೇಕ್ಷಕರು ಬರುತ್ತಿದ್ದಾರೆ. ಜನರಿಗೆ ನಮ್ಮ ಸಿನಿಮಾ ಹೊಸದಾಗಿ ಕಾಣಿಸುತ್ತಿದೆ. ಕಥೆಯ ಜತೆ ತಾವೂ ಪಯಣಿಸುತ್ತಿದ್ದಾರೆ. ಅವರಿಗೂ ಫೀಲ್ ಆಗುತ್ತಿದೆ. ಸಂಭಾಷಣೆ, ಸೀನ್ಗಳು ಕಿರಿಕಿರಿಯಾಗುತ್ತಿಲ್ಲ. ಹೀರೋಯಿಸಂಗಾಗಿ ಫೈಟ್ಗಳಿಲ್ಲ. ಹೀಗಾಗಿ ನಮ್ಮ ಪ್ರೇಮದೂರಿಗೆ ಬಂದು ಹೋಗುತ್ತಿದ್ದಾರೆ. ಅಲ್ಲಿನ ನೋವು, ನಲಿವು, ಎಮೋಷನ್ಸ್ ಕಾಡುತ್ತಿದೆ. ನಾಗಣ್ಣ (ರಂಗಾಯಣ ರು), ಸಂತು (ಶ್ರೀರಾಮ್), ವಸಂತಾ (ರಮಿಕ) ಮತ್ತು ರುಕ್ಮಿಣಿ (ತಪಸ್ವಿನಿ) ಹೀಗೆ ಒಂದೊಂದು ಪಾತ್ರವೂ ಒಬ್ಬೊಬ್ಬರಿಗೆ ಕನೆಕ್ಟ್ ಆಗುತ್ತಿದೆ. ನಮಗೂ ಹೀಗಾಗಿತ್ತಲ್ಲಾ ಅಂತ ಗಾಢವಾಗಿ ರಿಲೇಟ್ ಆಗುತ್ತಿದ್ದಾರೆ. ಸುನಾದ್ ಸಂಗೀತ, ರಾಜ್ಕಾಂತ್ ಛಾಯಾಗ್ರಹಣ ಸೇರಿ ತಾಂತ್ರಿಕವಾಗಿಯೂ ಸೆಳೆಯುತ್ತಿದೆ. ಎಲ್ಲದಕ್ಕಿಂತ ಹೆಚ್ಚಾಗಿ ಇಂತಹ ಕಥೆಗಳನ್ನು ನಿರ್ಮಿಸಲು ನಿರ್ಮಾಪಕರು ಹಿಂದೇಟು ಹಾಕುತ್ತಾರೆ. ಆದರೆ, ಆ ಧೈರ್ಯ ಮಾಡಿದ ದೇವೇಂದ್ರ ಈ ಸಿನಿಮಾದ ಮೊದಲ ಹೀರೋ' ಎಂದು ಸಂತಸ ವ್ಯಕ್ತಪಡಿಸುತ್ತಾರೆ.
"ಪ್ರೇಮದ ಊರಲಿ' ಚಿತ್ರ ಮಂಗಳವಾರ ಬೆಂಗಳೂರಿನ 42 ಸ್ಕ್ರೀನ್ಗಳಲ್ಲಿ ಬರೋಬ್ಬರಿ 120ಕ್ಕೂ ಅಧಿಕ ಶೋಗಳನ್ನು ಪಡೆದಿದೆ. ಜತೆಗೆ ಮೈಸೂರಿನಲ್ಲಿ 7 ಸ್ಕ್ರೀನ್ಗಳಲ್ಲಿ 34 ಶೋಗಳು, ಹುಬ್ಬಳ್ಳಿ & ಧಾರವಾಡ 14, ಕಲಬುರ್ಗಿ 12, ಬೆಳಗಾವಿ 6 ಮತ್ತು ವಿಜಯಪುರ ತಲಾ 6, ದಾವಣಗೆರೆ, ಶಿವಮೊಗ್ಗ ಹಾಗೂ ಉಡುಪಿಯಲ್ಲಿ ತಲಾ 5, ಮಂಗಳೂರಿನಲ್ಲಿ, ತುಮಕೂರು, ಬಳ್ಳಾರಿ, ಚಿಕ್ಕಮಗಳೂರು, ಹಾಸನ್ ಹಾಗೂ ಕೊಡಗಿನಲ್ಲಿ ತಲಾ 4 ಶೋಗಳು, ಚಿತ್ರದುರ್ಗದಲ್ಲಿ 3 ಶೋಗಳು ಸೇರಿ ರಾಜ್ಯಾದ್ಯಂತ ಮಂಗಳವಾರ ಪ್ರದರ್ಶನಗಳ ಸಂಖ್ಯೆ 250 ದಾಟಿದೆ. ಆ ಮೂಲಕ ಮೊದಲ ದಿನ ಕೇವಲ 60 ಇದ್ದ ಶೋಗಳ ಸಂಖ್ಯೆ ಐದನೇ ದಿನಕ್ಕೆ ಅದರ ನಾಲ್ಕು ಪಟ್ಟು ದಾಟಿದೆ.