2020ನೇ ಸಾಲಿನ ಪ್ರತಿಷ್ಠಿತ ಆಸ್ಕರ್ ಪ್ರಶಸ್ತಿ ಪ್ರದಾನ ಸಮಾರಂಭ ಸೋಮವಾರ ಅಮೆರಿಕಾದ ಲಾಸ್ ಏಂಜಲಿಸ್ನಲ್ಲಿ ಅದ್ದೂರಿಯಾಗಿ ನಡೆಯಿತು. ಹಲವು ಹೊಸ ದಾಖಲೆಗಳಿಗೂ ಈ ಬಾರಿ ಪ್ರಶಸ್ತಿ ಪ್ರದಾನ ಸಮಾರಂಭ ಸಾಕ್ಷಿಯಾಗಿದ್ದು ವಿಶೇಷವಾಗಿತ್ತು. ಮೊದಲ ಬಾರಿಗೆ ವಿದೇಶಿ ಭಾಷೆಯ ಸಿನಿಮಾ ವಿಭಾಗದಲ್ಲಿ ಸೌತ್ ಕೊರಿಯ ಮೂಲದ ‘ಪ್ಯಾರಾಸೈಟ್’ ಅತ್ಯುತ್ತಮ ಚಿತ್ರವಾಗಿ ಹೊರಹೊಮ್ಮಿದೆ. ಅಷ್ಟೇ ಅಲ್ಲ ಚಿತ್ರದ ನಿರ್ದೇಶಕ ಬೊಂಗ್ ಜೋನ್ ಹು ಅತ್ಯುತ್ತಮ ನಿರ್ದೇಶಕ ಪ್ರಶಸ್ತಿಯೂ ಸಂದಿದೆ. ಇನ್ನುಳಿದಂತೆ ಬೆಸ್ಟ್ ಒರಿಜಿನಲ್ ಸ್ಕ್ರೀನ್ಪ್ಲೆ ಮತ್ತು ಅಂತಾರಾಷ್ಟ್ರೀಯ ಫೀಚರ್ ಸಿನಿಮಾ ಅವಾರ್ಡ್ ಸೇರಿ ಒಟ್ಟು ನಾಲ್ಕು ಆಸ್ಕರ್ ಮುಡಿಗೇರಿಸಿಕೊಂಡಿದೆ. ಕಳೆದ ವರ್ಷ ಹಾಲಿವುಡ್ನಲ್ಲಿ ಸಿದ್ಧವಾಗಿದ್ದ ‘ಜೋಕರ್’ ಸಿನಿಮಾದ ಅಭಿನಯಕ್ಕಾಗಿ ಜಾಕ್ವಿನ್ ಫೊನೆಕ್ಸ್ ಮೊದಲ ಬಾರಿ ಅತ್ಯುತ್ತಮ ನಟ ಪ್ರಶಸ್ತಿ ಪಡೆದುಕೊಂಡರೆ, ‘ಜೂಡಿ’ ಚಿತ್ರದ ನಾಯಕಿ ರೇನಿ ಜೆಲ್ವಗೇರ್ ಅತ್ಯುತ್ತಮ ನಟಿಯಾಗಿ ಎರಡನೇ ಆಸ್ಕರ್ ಎತ್ತಿ ಹಿಡಿದಿದ್ದಾರೆ. ‘ಒನ್ಸ್ ಅಪಾನ್ ಅ ಟೈಮ್ ಚಿತ್ರದಲ್ಲಿನ ನಟನೆಗಾಗಿ ಹಾಲಿವುಡ್ ನಟ ಬ್ರಾಡ್ ಪಿಟ್ ಅತ್ಯುತ್ತಮ ಪೋಷಕ ನಟ ಪ್ರಶಸ್ತಿಗೆ ಭಾಜನರಾದರೆ, ಲೌರಾ ಡೆರ್ನ್ ‘ಮ್ಯಾರೇಜ್ ಸ್ಟೋರಿ’ ಚಿತ್ರಕ್ಕೆ ಅತ್ಯುತ್ತಮ ಪೋಷಕ ನಟಿ ಅವಾರ್ಡ್ ಪಡೆದಿದ್ದಾರೆ.
ಖುಷಿಯಲ್ಲಿ ಭಾರತೀಯ ಮೂಲದ ನಿರ್ಮಾಪಕಿ
ರಣವೀರ್ ಸಿಂಗ್ ನಟನೆಯ ‘ಗಲ್ಲಿಬಾಯ್’ ಸಿನಿಮಾ ಆಸ್ಕರ್ ಪ್ರಶಸ್ತಿಗೆ ನಾಮಿನೇಟ್ ಆಗಲಿದೆ ಎಂದೇ ಹೇಳಲಾಗಿತ್ತು. ಆದರೆ, ಕೊನೆಗೆ ಅದು ಈಡೇರಲಿಲ್ಲ. ಆದರೂ ಭಾರತೀಯರಿಗೆ ಈ ಬಾರಿಯ ಅವಾರ್ಡ್ ಕಾರ್ಯಕ್ರಮ ನಿರಾಸೆ ತಂದಿಲ್ಲ. ಅಂದರೆ, ಭಾರತೀಯ ಮೂಲದ ಸ್ಮೃತಿ ಮುಂದ್ರಾ ಮತ್ತು ಸಮಿ ಖಾನ್ ನಿರ್ಮಾಣ ಮಾಡಿರುವ ‘ಸೆಂಟ್ ಲೂಯಿಸ್ ಸೂಪರ್ವ್ಯಾನ್’ ಚಿತ್ರ ಡಾಕ್ಯುಮೆಂಟರಿ ವಿಭಾಗದಲ್ಲಿ ಸ್ಪರ್ಧಿಸಿತ್ತು. ಆದರೆ, ಆ ಪ್ರಶಸ್ತಿ ‘ಲರ್ನಿಂಗ್ ಟು ಸ್ಕೇಟ್ಬೋರ್ಡ್ ಇನ್ ದಿ ವಾರ್ ಝೋನ್’ಗೆ ಲಭಿಸಿದೆ. ವಿಶೇಷ ಏನೆಂದರೆ 10ಕ್ಕೂ ಅಧಿಕ ವಿಭಾಗಗಳಲ್ಲಿ ನಾಮಿನೇಟ್ ಆಗಿ ಮೂರು ವಿಭಾಗಗಳಲ್ಲಿ ಪ್ರಶಸ್ತಿ ಪಡೆದುಕೊಂಡಿರುವ, ‘1971’ ಚಿತ್ರದ ನಿರ್ವಣದಲ್ಲಿ ರಿಲಯನ್ಸ್ ಎಂಟರ್ಟೈನ್ ಪಾಲುದಾರಿಕೆ ಹೊಂದಿದೆ.
ಪ್ರಶಸ್ತಿ ವಿಜೇತರು
ಅತ್ಯುತ್ತಮ ಚಿತ್ರ: ಪ್ಯಾರಾಸೈಟ್
ಅತ್ಯುತ್ತಮ ನಿರ್ದೇಶಕ: ಬೊಂಗ್ ಜೋನ್ ಹು (ಪ್ಯಾರಾಸೈಟ್)
ಅತ್ಯುತ್ತಮ ನಟ: ಜಾಕಿನ್ ಫೊನೆಕ್ಸ್ (ಜೋಕರ್)
ಅತ್ಯುತ್ತಮ ನಟಿ: ರೇನಿ ಜೆಲ್ವಗೇರ್ (ಜೂಡಿ)
ಅತ್ಯುತ್ತಮ ಅನಿಮೇಟೆಡ್ ಸಿನಿಮಾ: ಟಾಯ್ ಸ್ಟೋರಿ 4
ಅತ್ಯುತ್ತಮ ಅನಿಮೇಟೆಡ್ ಶಾರ್ಟ್ ಫಿಲಂ: ಹೇರ್ ಲವ್
ಅತ್ಯುತ್ತಮ ಅಡಾಪ್ಡೆಡ್ ಸ್ಕ್ರೀನ್ಪ್ಲೇ: ಜೋಜೊ ರ್ಯಾಬಿಟ್
ಅತ್ಯುತ್ತಮ ಲೈವ್ ಆಕ್ಷನ್ ಕಿರುಚಿತ್ರ: ದಿ ನೇಬರ್ಸ್ ವಿಂಡೋ
ಅತ್ಯುತ್ತಮ ಡಾಕ್ಯುಮೆಂಟರಿ: ಅಮೇರಿಕನ್ ಫ್ಯಾಕ್ಟರಿ
ಅತ್ಯುತ್ತಮ ಹಿನ್ನೆಲೆ ಸಂಗೀತ: ಹಿಲ್ಡರ್ (ಜೋಕರ್)
ಅತ್ಯುತ್ತಮ ಓರಿಜಿನಲ್ ಸಾಂಗ್: ಎಲ್ಟನ್ ಜಾನ್, ಬೆರ್ನಿ (ದಿ ರಾಕೆಟ್ ಮ್ಯಾನ್)