ವಿಜಯವಾಣಿ ಸುದ್ದಿಜಾಲ ಬೆಂಗಳೂರು:
"ಜಾಲಿಡೇಸ್' ಖ್ಯಾತಿಯ ನಟ ನಿರಂಜನ್ ಶೆಟ್ಟಿ ನಾಯಕನಾಗಿ ನಟಿಸಿರುವ ಚಿತ್ರ "31 ಡೇಸ್'. ಚಿತ್ರದಲ್ಲಿ 10 ಹಾಡುಗಳಿದ್ದು, ವಿ. ಮನೋಹರ್ ಸಂಗೀತ ನೀಡಿದ್ದಾರೆ. ಇದು ಅವರ 150ನೇ ಸಂಗೀತ ನಿರ್ದೇಶನದ ಸಿನಿಮಾ ಎಂಬುದು ವಿಶೇಷ. ಕೆಲ ಸಿನಿಮಾಗಳಲ್ಲಿ ನಿರ್ದೇಶನ ವಿಭಾಗದಲ್ಲಿ ಕೆಲಸ ಮಾಡಿ ಅನುಭವ ಪಡೆದಿರುವ ರಾಜಾ ರವಿಕುಮಾರ್ ಚೊಚ್ಚಲ ಬಾರಿಗೆ ನಿರ್ದೇಶಿಸಿರುವ ಚಿತ್ರವಿದು.
ಇತ್ತೀಚೆಗಷ್ಟೆ "31 ಡೇಸ್'ನ ಒಪೆರಾ ಸಾಂಗ್ (ಕಥನ ಗೀತೆ) ರಿಲೀಸ್ ಮಾಡಲಾಯಿತು. ಈ ಹಾಡಿಗೆ ಸಾಹಿತ್ಯ ಬರೆದು, ಸಂಗೀತ ಸಂಯೋಜಿಸಿ ಹಾಡಿರುವ ಜತೆಗೆ ವಿ. ಮನೋಹರ್ ನಟಿಸಿರುವುದು ಮತ್ತೊಂದು ವಿಶೇಷ. ಈ ಬಗ್ಗೆ ಮನೋಹರ್, "ನನ್ನ ಪ್ರಕಾರ ಇದು ಕನ್ನಡದಲ್ಲಿ ಮೊದಲ ಒಪೆರಾ ಸಾಂಗ್ ಎನ್ನಬಹುದು. ನಿರಂಜನ್ ಒತ್ತಾಯಕ್ಕೆ ಮಣಿದು ಈ ಹಾಡಿನಲ್ಲಿ ನಟಿಸಿದ್ದೇನೆ' ಎಂದರು.
ನಾಯಕ ನಿರಂಜನ್ ಶೆಟ್ಟಿ, ""ಜಾಲಿಡೇಸ್'ನಿಂದ ಪ್ರಾರಂಭವಾದ ನನ್ನ ಸಿನಿಜರ್ನಿಗೆ ಈಗ 15 ವರ್ಷ. ನನ್ನ ಪತ್ನಿಯೇ ಈ ಚಿತ್ರವನ್ನು ನಿರ್ಮಿಸಿದ್ದಾರೆ. ಇದು 31 ದಿನಗಳಲ್ಲಿ ನಡೆಯುವ ಈಗಿನ ಕಾಲಟ್ಟದ ಪ್ರೇಮಕಥೆ. ಹಾಗಾಗಿ "31 ಡೇಸ್' ಅಂತ ಟೈಟಲ್ ಇಟ್ಟಿದ್ದೇವೆ. ಯಾರೂ ಊಹಿಸದ ಕ್ಲೆಮ್ಯಾಕ್ಸ್ ಚಿತ್ರದಲ್ಲಿದೆ. ಇವತ್ತು ಎರಡೂವರೆ ನಿಮಿಷದ ಒಪೆರಾ ಸಾಂಗ್ ರಿಲೀಸ್ ಮಾಡಿದ್ದೇವೆ. ಆದರೆ, ಇದರಲ್ಲಿ ಒಂದು ನಿಮಿಷವನ್ನು ಮಾತ್ರ ಸಿನಿಮಾದಲ್ಲಿ ಬಳಸಿಕೊಂಡಿದ್ದೇವೆ' ಎಂದು ಮಾಹಿತಿ ನೀಡಿದರು.
ಸದ್ಯ ಚಿತ್ರ ಸೆನ್ಸಾರ್ ಅಂಗಳದಲ್ಲಿದ್ದು, ಫೆಬ್ರವರಿಯಲ್ಲಿ ತೆರೆಗೆ ತರುವ ಆಲೋಚನೆ ಚಿತ್ರತಂಡದ್ದು. ಚಿತ್ರದಲ್ಲಿ ನಿರಂಜನ್ಗೆ ಪ್ರಜ್ವಲಿ ಸುವರ್ಣ ನಾಯಕಿಯಾಗಿದ್ದು, ಆನೇಕಲ್ ಮುನಿಯಪ್ಪ, ಗೋವಿಂದಸ್ವಾಮಿ ತಾರಾಗಣದಲ್ಲಿದ್ದಾರೆ. ಉಳಿದಂತೆ ಚಿತ್ರಕ್ಕೆ ವಿನುತ್ ಛಾಯಾಗ್ರಹಣ, ತ್ರಿಭುವನ್ ಮತ್ತು ಧನುಕುಮಾರ್ ನೃತ್ಯನಿರ್ದೇಶನವಿರಲಿದೆ.