Politicians kids in films - ರಾಜಕಾರಣದಿಂದ ಸಿನಿಮಾ ವ್ಯಾಕರಣದವರೆಗೆ...

Politicians Kids in Films -

ರಾಜಕಾರಣಕ್ಕೂ ಸಿನಿಮಾ ರಂಗಕ್ಕೂ ಅವಿನಾಭಾವ ಸಂಬಂಧವಿದೆ. ಹೀಗಾಗಿಯೇ ರಾಜಕೀಯ ಕಾರ್ಯಕ್ರಮಗಳು, ಚುನಾವಣೆ ವೇಳೆ ರಾಜಕಾರಣಿಗಳು ಸಿನಿಮಾ ತಾರೆಯರನ್ನು ಕರೆಸುವುದು, ಸಿನಿಮಾ ಮುಹೂರ್ತ, ಟ್ರೇಲರ್​, ಆಡಿಯೋ ಬಿಡುಗಡೆಗಳಿಗೆ ರಾಜಕಾರಣಿಗಳನ್ನು ಕರೆಸುವುದು ಸಾಮಾನ್ಯ. ಆದರೆ, ಕೆಲವೊಮ್ಮೆ ರಾಜಕಾರಣಿಗಳ ಕುಟುಂಬದಲ್ಲೇ ಸಿನಿಮಾ ತಾರೆಯರು ಸೃಷ್ಟಿಯಾದ ಉದಾಹರಣೆಗಳೂ ಇವೆ. ಇದೀಗ ಈ ಸಾಲಿಗೆ ಚನ್ನಪಟ್ಟಣ ಶಾಸಕ ಸಿ.ಪಿ. ಯೋಗೇಶ್ವರ್​ ಪುತ್ರ ಧ್ಯಾನ್​ ಯೋಗೇಶ್ವರ್​ ಹೊಸ ಸೇರ್ಪಡೆ. ರಾಜಕಾರಣದಲ್ಲಿ ಸಕ್ರಿಯರಾಗುವ ಮುನ್ನ ಸಿಪಿವೈ "ಸೈನಿಕ', "ಶಿವಪ್ಪ ನಾಯಕ', "ಬದ್ರಿ' ಸೇರಿ ಏಳೆಂಟು ಚಿತ್ರಗಳಲ್ಲಿ ನಟಿಸಿದ್ದರು. ಇದೀಗ ಅವರ ಪುತ್ರ ಧ್ಯಾನ್​ ಚಿತ್ರರಂಗಕ್ಕೆ ನಾಯಕನಾಗಿ ಪದಾರ್ಪಣೆ ಮಾಡುತ್ತಿದ್ದು, "ಸೈನಿಕ 2' ಮತ್ತೊಂದು "ಕರ್ಣಾಟಬಲಂ' ಇಂದು ಸೆಟ್ಟೇರಲಿವೆ. "ಸೈನಿಕ' ಸೀಕ್ವೆಲ್​ನಲ್ಲಿ ಧ್ಯಾನ್​ ಜತೆ ಯೋಗೇಶ್ವರ್​ ಕೂಡ ನಟಿಸುತ್ತಿದ್ದು "ಉಗ್ರಾಯುಧಂ' ಖ್ಯಾತಿಯ ಪುನೀತ್​ ರುದ್ರನಾಗ್​ ಆ್ಯಕ್ಷನ್​-ಕಟ್​ ಹೇಳಲಿದ್ದಾರೆ. ಇನ್ನು "ಕರ್ಣಾಟಬಲಂ' ಐತಿಹಾಸಿಕ ಮತ್ತು ಸಾಮಾಜಿಕ ಎರಡು ಟ್ಟಗಳಲ್ಲಿ ಸಾಗುವ ಕಥೆಯಾಗಿದ್ದು, ಎರಡು ಲುಕ್​ಗಳಲ್ಲಿ ಧ್ಯಾನ್​ ಕಾಣಿಸಿಕೊಳ್ಳಲಿದ್ದಾರೆ. ವಿಶೇಷ ಅಂದರೆ ಚಿತ್ರರಂಗಕ್ಕೆ ಬರಲೆಂದೇ ಧ್ಯಾನ್​ ನಟನಾ ತರಬೇತಿಯ ಜತೆ ಡಾನ್ಸ್​, ಕುದುರೆ ಸವಾಲಿ, ಸಮರ ಕಲೆ ಕಲಿತಿದ್ದು, ಸಿಕ್ಸ್​ ಪ್ಯಾಕ್​ ಕೂಡ ಮಾಡಿಕೊಂಡು ಭರ್ಜರಿಯಾಗೇ ತಯಾರಿ ಮಾಡಿಕೊಂಡಿದ್ದಾರೆ.

ಮಾಜಿ ಪ್ರಧಾನಿ ಎಚ್​.ಡಿ. ದೇವೇಗೌಡರ ಮೊಮ್ಮಗ, ಮಾಜಿ ಸಿಎಂ, ಹಾಲಿ ಕೇಂದ್ರ ಸಚಿವ ಎಚ್​.ಡಿ. ಕುಮಾರಸ್ವಾಮಿ ಪುತ್ರ ನಿಖಿಲ್​ ಕೂಡ ಚಿತ್ರರಂಗದಲ್ಲಿ ತಮ್ಮದೇ ಛಾಪು ಮೂಡಿಸಿದ್ದಾರೆ. "ಜಾಗ್ವಾರ್​' ಮೂಲಕ 2016ರಲ್ಲಿ ನಾಯಕನಾಗಿ ಡೆಬ್ಯೂ ಮಾಡಿದ ಅವರು ನಂತರ "ಸೀತಾರಾಮ ಕಲ್ಯಾಣ', "ಕುರುಕ್ಷೇತ್ರ' ಚಿತ್ರಗಳಲ್ಲಿ ನಟಿಸಿದ್ದಾರೆ. 2021ರ "ರೈಡರ್​' ಬಳಿಕ ರಾಜಕಾರಣದಲ್ಲಿ ಹೆಚ್ಚು ಸಕ್ರಿಯರಾಗಿರುವ ಅವರು, ಎರಡು ಚಿತ್ರಗಳಲ್ಲಿ ನಟಿಸಲಿದ್ದಾರೆ ಎನ್ನಲಾಗಿದ್ದರೂ, ಸದ್ಯ ಅಧಿಕೃತ ಘೋಷಣೆಯಾಗಿಲ್ಲ.

ಮಾಜಿ ಸಚಿವ ಜನಾರ್ದನ ರೆಡ್ಡಿ ಪುತ್ರ ಕಿರೀಟಿ ರೆಡ್ಡಿ "ಜೂನಿಯರ್​' ಮೂಲಕ ಕಳೆದ ವರ್ಷ ನಾಯಕನಾಗಿ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದರು. ಮೊದಲ ಚಿತ್ರದಲ್ಲಿಯೇ ಡಾನ್ಸ್​, ಸ್ಟಂಟ್ಸ್​ ಜತೆಗೆ ನಟನೆಯ ಮೂಲಕವೂ ಗಮನ ಸೆಳೆದಿರುವ ಅವರು, ಸದ್ಯ ಕಥೆಗಳನ್ನು ಕೇಳುತ್ತಿದ್ದು, ಕೆಲವೇ ದಿನಗಳಲ್ಲಿ ಹೊಸ ಸಿನಿಮಾ ಘೋಷಣೆಯಾಗಲಿದೆ ಎನ್ನಲಾಗಿದೆ.

ವಸತಿ ಸಚಿವ ಜಮೀರ್​ ಅಹ್ಮದ್​ ಖಾನ್​ ಪುತ್ರ ಜೈದ್​ ಖಾನ್​ "ಬನಾರಸ್​' (2022) ಮೂಲಕ ಡೆಬ್ಯೂ ಚಿತ್ರದಲ್ಲೇ ಪ್ಯಾನ್​ ಇಂಡಿಯಾ ಸವಾರಿ ಮಾಡಿದ್ದರು. ಆ ಬಳಿಕ ಈ ವರ್ಷ "ಕಲ್ಟ್​'ನಲ್ಲಿ ಮಿಂಚಿದ್ದ ಅವರು, ಸದ್ಯ ಹೊಸ ಚಿತ್ರಕ್ಕಾಗಿ ಸಿದ್ಧತೆಯಲ್ಲಿದ್ದಾರೆ.

ಕೃಷಿ ಸಚಿವ ಚಲುವರಾಯಸ್ವಾಮಿ ಪುತ್ರ ಸಚಿನ್​ ಕೂಡ ರಾಜಕಾರಣದ ಜತೆಜತೆಗೆ ಸಿನಿಮಾರಂಗದಲ್ಲೂ ಸಕ್ರಿಯರಾಗಿದ್ದಾರೆ. "ಹ್ಯಾಪಿ ರ್ಬತ್​ಡೇ' (2016) ಮೂಲಕ ನಾಯಕನಾಗಿ ಪದಾರ್ಪಣೆ ಮಾಡಿದ ಅವರು ನಂತರ ಗ್ಯಾಪ್​ ತೆಗೆದುಕೊಂಡು "ಬೆಂಗಳೂರು ಬಾಯ್ಸ್​'ನಲ್ಲಿ (2023) ನಟಿಸಿದ್ದರು. ಕಳೆದ ವರ್ಷ "ಕಮಲ್​ ಶ್ರೀದೇವಿ' ಚಿತ್ರದ ಮೂಲಕ ನಟನೆಯ ಜತೆಗೆ ನಿರ್ಮಾಣದಲ್ಲೂ ತೊಡಗಿಸಿಕೊಂಡಿರುವ ಅವರು, ಸದ್ಯ ಹೊಸ ಸಿನಿಮಾ ಸಿದ್ಧತೆಯಲ್ಲಿದ್ದಾರೆ.

ನಿಖಿಲ್​, ಸಚಿನ್​ರಂತೆಯೇ 2016ರಲ್ಲೇ ನಾಯಕನಾಗಿ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದವರು ಸಾರಿಗೆ ಸಚಿವ ಎಚ್​.ಎಂ. ರೇವಣ್ಣ ಪುತ್ರ ಅನೂಪ್​. "ಲಕ್ಷ$್ಮಣ' ಬಳಿಕ "ನಾ ಪಂಟ ಕಣೋ' (2017), "ಕಬ್ಜಾ' (2023), "ಹೈಡ್​ ಆ್ಯಂಡ್​ ಸೀಕ್​' (2024) ಚಿತ್ರಗಳಲ್ಲಿ ನಟಿಸಿರುವ ಅವರು, ಸದ್ಯ "ಕನಕರಾಜ' ಎಂಬ ಹೊಸ ಸಿನಿಮಾದಲ್ಲಿ ಬಿಜಿಯಾಗಿದ್ದಾರೆ.

ಗುಬ್ಬಿ ಶಾಸಕ ಎಸ್​.ಆರ್​. ಶ್ರೀನಿವಾಸ್​ ಪುತ್ರ ದುಷ್ಯಂತ್​ "ಗತವೈಭವ' (2025) ಮೂಲಕ ನಾಯಕನಾಗಿ ಡೆಬ್ಯೂ ಮಾಡಿ, ಮೊದಲ ಚಿತ್ರದಲ್ಲೇ ಭರವಸೆ ಮೂಡಿಸಿದ್ದರು. ಅವರು ಸದ್ಯ ಹೊಸ ಕಥೆಗಳನ್ನು ಕೇಳುತ್ತಿದ್ದಾರೆ ಎನ್ನಲಾಗಿದೆ.

ಮಾಜಿ ಸಚಿವ ವರ್ತೂರ್​ ಪ್ರಕಾಶ್​ ಪುತ್ರ ತೇಜಸ್​, ಕಾಲೇಜು ದಿನಗಳಲ್ಲೇ "ಬಿಸ್ಕೆಟ್​' ಎಂಬ ಚಿತ್ರದಲ್ಲಿ ನಾಯಕನಾಗಿ ಮಿಂಚಿದ್ದಾರೆ. 2013ರಲ್ಲಿ ಆ ಸಿನಿಮಾ ಬಿಡುಗಡೆಯಾಗಿತ್ತು. ಆದರೆ, ಆ ಬಳಿಕ ತೇಜಸ್​ ಮತ್ತೆ ಚಿತ್ರರಂಗದಲ್ಲಿ ಮುಂದುವರಿಯಲಿಲ್ಲ. ಇನ್ನು 20ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿರುವ ಕುಮಾರ್​ ಬಂಗಾರಪ್ಪ, ರಾಜಕಾರಣಕ್ಕೆ ಎಂಟ್ರಿಯಾದ ಬಳಿಕ ಚಿತ್ರರಂಗದಿಂದ ಅಂತರ ಕಾಪಾಡಿಕೊಂಡಿದ್ದರು. "ಚಕ್ರವ್ಯೂಹ' ಮೂಲಕ ಕಮ್​ಬ್ಯಾಕ್​ ಮಾಡಿದ್ದ ಅವರು, ಸದ್ಯ "ಸರ್ಕಾರಿ ನ್ಯಾಯಬೆಲೆ ಅಂಗಡಿ' ಎಂಬ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಮತ್ತೊಂದೆಡೆ ಅವರ ಪುತ್ರ ಅರ್ಜುನ್​ ಕೂಡ ಚಿತ್ರರಂಗಕ್ಕೆ ನಾಯಕನಾಗಿ ಪದಾರ್ಪಣೆ ಮಾಡಲು ಸಿದ್ಧತೆ ನಡೆಸಿದ್ದಾರೆ. ಜಗ್ಗೇಶ್​ ಪುತ್ರರಾದ ಯತಿರಾಜ್​ ಮತ್ತು ಗುರುರಾಜ್​ ಕೂಡ ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದಾರೆ. ಮಾಜಿ ಸಚಿವೆ ಬಿ.ಟಿ. ಲಲಿತಾ ನಾಯಕ್​ ಪುತ್ರ ಓಂ ಪ್ರಕಾಶ್​ ನಾಯಕ್​ (ಒಂದು ಕೊಲೆಯ ಸುತ್ತ) ಸಿನಿಮಾ ಮಾಡಿದ್ದಾರೆ.