ಹೈದರಾಬಾದ್: ಎಸ್.ಎಸ್. ರಾಜಮೌಳಿ ನಿರ್ದೇಶನದ ಬಹುನಿರೀಕ್ಷಿತ 'ಆರ್ಆರ್ಆರ್' ಚಿತ್ರದ ಜ್ಯೂನಿಯರ್ ಎನ್ಟಿಆರ್ ಪಾತ್ರದ ಟೀಸರ್ ಬಿಡುಗಡೆಯಾಗಿರುವುದು ಗೊತ್ತೇ ಇದೆ. ಇದೀಗ ಆ ಪಾತ್ರದ ಕುರಿತಾಗಿ ವಿವಾದವೊಂದು ಹುಟ್ಟಿಕೊಂಡಿದೆ.
ಪ್ರಮುಖವಾಗಿ, ಕೊಮರಮ್ ಭೀಮ್ ಪಾತ್ರದ ಗೆಟಪ್ ಬದಲಾಯಿಸದಿದ್ದರೆ ಉಗ್ರ ಹೋರಾಟ ನಡೆಸಬೇಕಾಗಬಹುದು ಎಂದು ಕೊಮರಮ್ ಭೀಮ್ ಅವರ ಮೊಮ್ಮಗ ಸೋನೆ ರಾವ್ ಹೇಳಿದ್ದಾರೆ.
ಈ ಚಿತ್ರದಲ್ಲಿ ಜ್ಯೂನಿಯರ್ ಎನ್ಟಿಆರ್ ಅವರು ಆದಿವಾಸಿ ನಾಯಕ ಕೊಮರಮ್ ಭೀಮ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಇತ್ತೀಚೆಗೆ ಬಿಡುಗಡೆಯಾದ ಟೀಸರ್ನಲ್ಲಿ ಆ ಪಾತ್ರವು ಮುಸ್ಲಿಮರ ಗೆಟಪ್ನಲ್ಲಿರುವ ದೃಶ್ಯವೊಂದಿದೆ. ಈ ದೃಶ್ಯದಿಂದ ಇತಿಹಾಸವನ್ನು ತಿರುಚಿದಂತಾಗುವುದರಿಂದ, ಈ ದೃಶ್ಯವನ್ನು ಈಗಲೇ ಕತ್ತರಿಸಬೇಕು ಎಂದು ಆದಿವಾಸಿಗಳು ಇತ್ತೀಚೆಗೆ ನಿರ್ದೇಶಕ ರಾಜಮೌಳಿ ಅವರಿಗೆ ಆಗ್ರಹಿಸಿದ್ದರು.
ಇದೀಗ, ಕೊಮರಮ್ ಭೀಮ್ ಅವರ ಮೊಮ್ಮಗ ಸೋನೆ ರಾವ್ ಅವರೇ ಈ ಕುರಿತು ಮಾತನಾಡಿದ್ದಾರೆ. ಭೀಮ್ ಅವರನ್ನು ಮುಸ್ಲಿಮ್ ಗೆಟೊ್ನಲ್ಲಿ ತೋರಿಸಿರುವುದರಿಂದ, ಅವರನ್ನು ಆರಾಧಿಸುವ ಸಾವಿರಾರು ಜನ ಆದಿವಾಸಿಗಳು ಸಾಕಷ್ಟು ನೊಂದಿದ್ದಾರೆ, ಹಾಗಾಗಿ ಈ ಕೂಡಲೇ ಅದನ್ನು ಬದಲಾಯಿಸಬೇಕು ಎಂದು ಆಗ್ರಹಿಸಿದ್ದಾರೆ.
ಜ್ಯೂನಿಯರ್ ಎನ್ಟಿಆರ್ ಅವರ ಟೀಸರ್ ಕೆಲವು ದಿನಗಳ ಹಿಂದೆ ಬಿಡುಗಡೆಯಾಗಿದ್ದು ಸಾಕಷ್ಟು ಜನಪ್ರಿಯವಾಗಿದೆ. ವಿಶೇಷವೆಂದರೆ, ಈ ಟೀಸರ್ಗೆ ರಾಮ್ಚರಣ್ ತೇಜ ಧ್ವನಿ ನೀಡಿದ್ದಾರೆ. ಅಷ್ಟೇ ಅಲ್ಲ, ಟೀಸರ್ ತೆಲುಗು, ಕನ್ನಡ ಸೇರಿದಂತೆ ಬೇರೆ ಭಾಷೆಗಳಲ್ಲಿ ಸಹ ಬಿಡುಗಡೆಯಾಗಿದ್ದು, ಎಲ್ಲಾ ಭಾಷೆಗಳಿಗೂ ರಾಮ್ಚರಣ್ ಧ್ವನಿ ನೀಡಿದ್ದಾರೆ. ಈಗಾಗಲೇ ಈ ಟೀಸರ್ಗಳು ಯೂಟ್ಯೂಬ್ನಲ್ಲಿ ಸಖತ್ ವೈರಲ್ ಆಗಿವೆ.
ಮೂಲಗಳ ಪ್ರಕಾರ, 'ಆರ್ಆರ್ಆರ್' ಚಿತ್ರದ ಸ್ಯಾಟಿಲೈಟ್ ಮತ್ತು ಡಿಜಿಟಲ್ ಹಕ್ಕುಗಳನ್ನು ಕೊಳ್ಳುವುದಕ್ಕೆ ಸ್ಟಾರ್ ನೆಟ್ವರ್ಕ್ ಮುಂದಾಗಿದ್ದು, ಈಗಾಗಲೇ ಚಿತ್ರತಂಡದವರ ಜತೆಗೆ ಮಾತುಕತೆ ನಡೆಸಿದೆಯಂತೆ. ಅದರ ಪ್ರಕಾರ, ಸ್ಯಾಟಿಲೈಟ್ ಮತ್ತು ಡಿಜಿಟಲ್ ಹಕ್ಕುಗಳನ್ನು ಪಡೆದುಕೊಳ್ಳುವುದಕ್ಕೆ, ಸ್ಟಾರ್ ಸಮೂಹ 200 ಕೋಟಿ ರೂಪಾಯಿಗಳನ್ನು ಕೊಡುತ್ತಿದೆ ಎಂದು ಹೇಳಲಾಗುತ್ತಿದೆ.