ವಿಜಯವಾಣಿ ಸುದ್ದಿಜಾಲ ಬೆಂಗಳೂರು:
ಕನ್ನಡ ಕಿರುತೆರೆ ಮತ್ತು ಸಿನಿಮಾಗಳಲ್ಲಿ ತಮ್ಮದೇ ಛಾಪು ಮೂಡಿಸಿರುವ ಹಾಸ್ಯನಟ ಮಿತ್ರ, ಕಳೆದ ಕೆಲ ವರ್ಷಗಳಿಂದ ಅಪರೂಪವಾಗಿದ್ದರು. ಆದರೆ, ಕಳೆದ ವರ್ಷ ಅವರು ಮಾಡಿಸಿದ ಫೋಟೋಶೂಟ್ ಅವರನ್ನು ಮತ್ತೆ ಮುನ್ನೆಲೆಗೆ ಬರುವಂತೆ ಮಾಡಿದೆ. ಸೋಮವಾರ ಹುಟ್ಟುಹಬ್ಬ ಆಚರಿಸಿಕೊಂಡ ನಟ, ಈಗ ಮತ್ತೆ ಬಿಜಿಯಾಗಿದ್ದಾರೆ. ಅವರ ಹುಟ್ಟುಹಬ್ಬದ ಪ್ರಯುಕ್ತ "ಕರಾವಳಿ', "ಲ್ಯಾಂಡ್ಲಾರ್ಡ್', "ಕರಳೆ' ಸೇರಿ ಇನ್ನೂ ಹೆಸರಿಡದ ರಾಜವರ್ಧನ್ ನಿರ್ಮಿಸುತ್ತಿರುವ ಹೊಸ ಚಿತ್ರದ ಪೋಸ್ಟರ್ ಬಿಡುಗಡೆ ಮಾಡಿ ತಂಡಗಳು ಶುಭಹಾರೈಸಿವೆ.
"ಫೋಟೋಶೂಟ್ ಬಳಿಕ ಉತ್ತಮ ಅವಕಾಶಗಳು ಬರುತ್ತಿವೆ. ಈಗ ಮತ್ತೆ ಹಳೆ ಮಿತ್ರ ಆಗಿದ್ದೇನೆ. 2024 ಮತ್ತು 2025 ತುಂಬ ಒಳ್ಳೆ ವರ್ಷಗಳಾಗಿವೆ. "ಕರಾವಳಿ', "ಲ್ಯಾಂಡ್ಲಾರ್ಡ್', "ಕರಳೆ' ಜತೆಗೆ "ಕಮಲ್ ಶ್ರೀದೇವಿ', "ಮಹಾನ್', "ಮಿ. ಜ್ಯಾಕ್', "ಲಕ್ಷ್ಮೀಪತಿ' ಸೇರಿ ಇನ್ನೂ ಕೆಲ ಚಿತ್ರಗಳಲ್ಲಿ ನಟಿಸುತ್ತಿದ್ದೇನೆ' ಎಂದು ಸಂತಸ ಹಂಚಿಕೊಳ್ಳುತ್ತಾರೆ.
ಪಿ.ಸಿ. ಶೇಖರ್ ನಿರ್ದೇಶಿಸಿದ್ದ 2017ರಲ್ಲಿ ಬಿಡುಗಡೆಯಾಗಿದ್ದ "ರಾಗಾ' ಚಿತ್ರದಲ್ಲಿ ನಾಯಕನಾಗಿ ನಟಿಸಿದ್ದ ಮಿತ್ರ, ಆ ಸಿನಿಮಾ ಮೂಲಕ ನಿರ್ಮಾಪಕ ಕೂಡ ಆಗಿದ್ದರು. ಇದೀಗ ಕಮ್ಬ್ಯಾಕ್ನಲ್ಲಿ ನಟನೆಯಲ್ಲಿ ಬಿಜಿಯಾಗಿರುವ ಅವರು, 2026ರಲ್ಲಿ ಮತ್ತೊಮ್ಮೆ ಸಿನಿಮಾ ನಿರ್ಮಾಣ ಮಾಡಲು ಸಿದ್ಧತೆ ನಡೆಸಿದ್ದಾರೆ . ಈ ಬಗ್ಗೆ, "ಮುಂದಿನ ವರ್ಷ ನಿರ್ಮಾಣಕ್ಕೆ ಹೈಕಾಲಿದ್ದೇನೆ. "ರಾಗಾ' ಬಳಿಕ ದೊಡ್ಡ ಮಟ್ಟದಲ್ಲಿ ಸಿನಿಮಾ ಮಾಡಲಿದ್ದೇನೆ. 2026ರ ಮಧ್ಯದಲ್ಲಿ ಸಿನಿಮಾ ಘೋಷಿಸಲಿದ್ದೇವೆ. ಕನ್ನಡದ ದೊಡ್ಡ ಸ್ಟಾರ್ ಒಬ್ಬರು ನಟಿಸಲಿದ್ದು, ಅವರ ಡೇಟ್ಗಾಗಿ ಕಾಯುತ್ತಿದ್ದೇನೆ. ಕನ್ನಡದಲ್ಲೇ ಮೆಗಾ ಬಜೆಟ್ನಲ್ಲಿ ಈ ಸಿನಿಮಾ ಮಾಡುವ ಪ್ಲ್ಯಾನ್ ಇದೆ' ಎಂದು ಮಾಹಿತಿ ನೀಡುತ್ತಾರೆ.