ಮುಂಬೈ: ಇತ್ತೀಚೆಗಷ್ಟೇ ಕರೊನಾದಿಂದ ಹೆಚ್ಚು ಸುದ್ದಿ ಮಾಡಿದ ಬಾಲಿವುಡ್ ಸೆಲೆಬ್ರಿಟಿಗಳ ಪೈಕಿ ಗಾಯಕಿ ಕನ್ನಿಕಾ ಕಪೂರ್ ಮೊದಲ ಸ್ಥಾನದಲ್ಲಿದ್ದಾರೆ. ಇದೀಗ ಅದನ್ನು ಹೊರತುಪಡಿಸಿ ಇನ್ನೊಂದು ಕಾರಣಕ್ಕೆ ಮೊದಲ ಸ್ಥಾನದಲ್ಲಿದ್ದಾರೆ. ಆನ್ಲೈನ್ನಲ್ಲಿ ಅತಿ ಹೆಚ್ಚು ಸರ್ಚ್ ಮಾಡಲ್ಪಟ್ಟ ಸೆಲೆಬ್ರಿಟಿಯಾಗಿ ಪ್ರಿಯಾಂಕಾ ಚೋಪ್ರಾ ಅವರನ್ನೇ ಹಿಂದಿಕ್ಕಿದ್ದಾರೆ ಕನ್ನಿಕಾ.
ಹೌದು, ಯಾಹೂ ಇಂಡಿಯಾ ಒಂದಷ್ಟು ಅಂಕಿ ಅಂಶಗಳನ್ನು ಬಿಡುಗಡೆ ಮಾಡಿದ್ದು, ಅದರಲ್ಲಿ ಕನ್ನಿಕಾ ಅತಿ ಹೆಚ್ಚು ಹುಡುಕಲ್ಪಟ್ಟ ಸೆಲೆಬ್ರಿಟಿಯಾಗಿದ್ದಾರೆ. ಅದಕ್ಕೆ ಕಾರಣ ಅವರಿಗೆ ಅಂಟಿಕೊಂಡಿದ್ದ ಕರೊನಾ ಅಂದರೂ ತಪ್ಪಾಗದು! ಲಂಡನ್ನಿಂದ ಕರೊನಾ ಮಾರಿಯನ್ನು ಹೊತ್ತು ತಂದು ಒಂದಷ್ಟು ಕಾಲ ಸಾಮಾಜಿಕ ಜಾಲತಾಣದಲ್ಲಿ ಟ್ರೋಲ್ಗೆ ಆಹಾರವಾಗಿದ್ದ ಕನ್ನಿಕಾ, ಅಷ್ಟೇ ಉದ್ಧಟತನ ಮೆರೆದು ನೆಟ್ಟಿಗರಿಗೆ ಟಾರ್ಗೇಟ್ ಆಗಿದ್ದರು. ಆ ಒಂದು ಕಾರಣಕ್ಕೆ ಯಾರು ಈ ಕನ್ನಿಕಾ ಕಪೂರ್ ಎಂಬುದನ್ನು ಪತ್ತೆ ಹಚ್ಚಲು ಹೆಚ್ಚು ಜನ ಅವರ ಪ್ರೊಫೈಲ್ ವೀಕ್ಷಿಸಿದ್ದಾರೆ. ಈ ಮೂಲಕ ಪ್ರಿಯಾಂಕಾ ಚೋಪ್ರ ಅವರನ್ನು ಹಿಂದಿಕ್ಕಿದ್ದಾರೆ. ಇನ್ನುಳಿದಂತೆ ಮೂರನೇ ಸ್ಥಾನದಲ್ಲಿ ದಿಶಾ ಪಟಾಣಿ, ನಾಲ್ಕನೇ ಸ್ಥಾನದಲ್ಲಿ ದೀಪಿಕಾ ಪಡುಕೋಣೆ, ಸಾರಾ ಅಲಿ ಖಾನ್ ಐದನೇ ಸ್ಥಾನದಲ್ಲಿದ್ದಾರೆ.
ಇತ್ತ ಲಾಕ್ಡೌನ್ ಹಿನ್ನೆಲೆಯಲ್ಲಿ ರಾಮಾಯಣ ಧಾರಾವಾಹಿ ಅತಿ ಹೆಚ್ಚು ಹುಡುಕಲ್ಪಟ್ಟ ಮನರಂಜನಾ ಕಾರ್ಯಕ್ರಮವಾಗಿದೆ. ಇದರಿಂದಾಗಿ ಆ ಧಾರಾವಾಹಿಯಲ್ಲಿ ಪ್ರಧಾನ ಪಾತ್ರ ನಿಭಾಯಿಸಿದ್ದ ಅರುಣ್ ಗೌಳಿ, ದೀಪಿಕಾ ಚಿಕ್ಲಿಯಾ, ಸುನೀಲ್ ಲಹರಿ, ಧಾರಾ ಸಿಂಗ್, ಅರವಿಂದ್ ತ್ರಿವೇದಿ ಹೆಸರುಗಳೂ ಸಹ ಲಾಕ್ಡೌನ್ ಹೊತ್ತಲ್ಲಿ ಹೆಚ್ಚು ರಿಂಗಣಿಸಿದವು. (ಏಜೆನ್ಸೀಸ್)