ಸುಶಾಂತ್ ಸಿಂಗ್ ರಜಪೂತ್ ಸಾವಿನ ನಂತರ ಬಾಲಿವುಡ್ ನಿರ್ದೇಶಕ ಕರಣ್ ಜೋಹಾರ್ ವಿರುದ್ಧ ಸೋಷಿಯಲ್ ಮೀಡಿಯಾದಲ್ಲಿ ಸಾಕಷ್ಟು ಆಕ್ರೋಶ ವ್ಯಕ್ತವಾಗಿದೆ. ಪ್ರಮುಖವಾಗಿ, ಕರಣ್ ಜೋಹಾರ್ ತಮಗೆ ಬೇಕಾದ್ದವನ್ನು ಬೆಳೆಸಿ, ಸ್ವಜನಪಕ್ಷಪಾತವನ್ನು ಪೋಷಿಸಿದ್ದರಿಂದ, ಸುಶಾಂತ್ರಂತಹ ಯುವಕರು ತಮ್ಮ ಪ್ರಾಣ ಕಳೆದುಕೊಂಡಿದ್ದಾರೆ ಎಂಬ ಅಭಿಪ್ರಾಯ ಎಲ್ಲಡೆ ಇರುವುದರಿಂದ, ಜನ ಕರಣ್ ವಿರುದ್ಧ ತಿರುಗಿಬಿದ್ದಿದ್ದಾರೆ.
ಇನ್ನೊಂದು ಕಡೆ, ಸುಶಾಂತ್ ಸಾವಿಗೆ ಕರಣ್ ಅವರನ್ನು ದೂಷಿಸುವುದು ಸರಿಯಲ್ಲ ಎಂದು ರಾಮ್ಗೋಪಾಲ್ ವರ್ಮಾ, ಸ್ವರಾ ಭಾಸ್ಕರ್ ಮುಂತಾದ ಸೆಲೆಬ್ರಿಟಿಗಳು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಅದರಲ್ಲೂ ಸ್ವರಾ ಭಾಸ್ಕರ್, ಕಾರ್ಯಕ್ರಮವೊಂದರಲ್ಲಿ ತಾವು ಕರಣ್ ಅವರನ್ನು ನೆಪೋಟಿಸಂ ಕುರಿತಾಗಿ ಪ್ರಶ್ನೆ ಮಾಡಿದ್ದು, ಈ ಕುರಿತು ಅವರು ಪ್ರಾಮಾಣಿಕವಾದ ಉತ್ತರ ನೀಡಿದ್ದರು ಎಂದು ಬರೆದುಕೊಂಡಿದ್ದಾರೆ. ಕರಣ್ ಬೇಕಾದರೆ ನನ್ನ ಪ್ರಶ್ನೆಯನ್ನು ಕಿತ್ತು ಹಾಕಿಸಬಹುದಿತ್ತಾದರೂ, ಅವರು ಹಾಗೆ ಮಾಡಲಿಲ್ಲ ಎಂದು ಕರಣ್ ಬಗ್ಗೆ ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ.
ಇದರ ವಿರುದ್ಧ ಕಂಗನಾ ರಣಾವತ್ ಅವರ ಪ್ರಚಾರದ ತಂಡ ತಿರುಗಿಬಿದ್ದಿದೆ. ಏಕೆಂದರೆ, ಇದುವರೆಗೂ ಸ್ವಜನಪಕ್ಷಪಾತದ ಬಗ್ಗೆ ಮೊದಲು ಕರಣ್ ವಿರುದ್ಧ ಆರೋಪ ಹೊರಿಸಿದವರು ಕಂಗನಾ ಎಂಬುದು ಎಲ್ಲರಿಗೂ ಗೊತ್ತಿದೆ. ಆದರೆ, ಕಂಗನಾಗಿಂಥ ಮುನ್ನ ಸ್ವಜನಪಕ್ಷಪಾತದ ಕುರಿತಾಗಿ ಕರಣ್ ಅವರನ್ನು ಪ್ರಶ್ನಿಸಿದ್ದು ತಾನು ಎಂದು ಸ್ವರಾ ಹೇಳಿಕೊಂಡಿರುವುದು ಕಂಗನಾ ಮತ್ತು ಅವರ ತಂಡವನ್ನು ಕೆರಳಿಸಿದೆ. ಅದೇ ಕಾರಣಕ್ಕೆ, ಕಂಗನಾ ಅವರ ತಂಡದವರು ಕರಣ್ ಮತ್ತು ಸ್ವರಾ ಇಬ್ಬರನ್ನೂ ಝಾಡಿಸಿದ್ದಾರೆ.
ಇದನ್ನೂ ಓದಿ: ನಮ್ಮನ್ನ ಸರ್ವನಾಶ ಮಾಡೋಕೆ ಹೊರಟಿದ್ದೀರಿ …
ಈ ಕುರಿತು ಟ್ವೀಟ್ ಮಾಡಿರುವ ಕಂಗನಾ ತಂಡ, 'ಸ್ವರಾ ಅವರೇ ನೀವು ಕರಣ್ ಜೋಹಾರ್ ಅವರನ್ನು ತುಂಬಾ ಓಲೈಸುವುದಕ್ಕೆ ಹೋಗಬೇಡಿ. ನಿರೂಪಕರಿಗೆ ಯಾವುದೇ ಪ್ರಶ್ನೆಯನ್ನು ಕಿತ್ತು ಹಾಕುವ ಅಧಿಕಾರ ಇರುವುದಿಲ್ಲ. ಯಾವುದು ಬೇಕು, ಯಾವುದು ಬೇಡ ಎಂದು ತೀರ್ಮಾನಿಸುವುದು ಚಾನಲ್ ಹೊರತು, ಅವರಲ್ಲ. ಇನ್ನು, ಕಂಗನಾಗೆ ಆ ಕಾರ್ಯಕ್ರಮಕ್ಕೆ ಆಹ್ವಾನ ಬಂದಾಗ, ಅವರು ಅಷ್ಟು ಸುಲಭವಾಗಿ ಒಪ್ಪಿರಲಿಲ್ಲ. ಕೊನೆಗೆ ಸಾಕಷ್ಟು ಒತ್ತಾಯದ ನಂತರ ಅವರು ಆ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ಅವರು ಆ ಕಾರ್ಯಕ್ರಮದಲ್ಲಿ ಭಾಗವಹಿಸಿದಾಗ, ಅವರು ಸೂಪರ್ಸ್ಟಾರ್ ಆಗಿದ್ದರು. ಆದರೆ, ಕರಣ್ ಒಬ್ಬ ಸಾಮಾನ್ಯ ನಿರೂಪಕರಾಗಿದ್ದರು. ಒಂದು ಪಕ್ಷ ಕಂಗನಾ ಹೇಳಿದ್ದು ಡಿಲೀಟ್ ಆಗಿದ್ದರೂ, ಕಂಗನಾಗೆ ತನ್ನ ಅಭಿಪ್ರಾಯವನ್ನು ಹೇಳುವುದಕ್ಕೆ ಅದೇ ವೇದಿಕೆ ಬೇಕಾಗಿರಲಿಲ್ಲ. ಕರಣ್ ಜೋಹಾರ್ ಕಾರ್ಯಕ್ರಮವಲ್ಲದೆ, ಬೇರೆ ವೇದಿಕೆಗಳಲ್ಲೂ ತಮ್ಮ ಅಭಿಪ್ರಾಯ ಮಂಡಿಸುವ ಧೈರ್ಯ ಕಂಗನಾಗೆ ಇದೆ' ಎನ್ನುವರ್ಥದಲ್ಲಿ ಬರದುಕೊಂಡಿದೆ.
ಈ ವಿಷಯವಾಗಿ ಸ್ವರಾ ಏನು ಹೇಳುತ್ತಾರೋ ಮತ್ತು ಈ ಪ್ರಕರಣ ಇನ್ನೂ ಯಾವ್ಯಾವ ರೂಪ ಪಡೆಯುತ್ತದೋ ಗೊತ್ತಿಲ್ಲ.