ಬೆಂಗಳೂರು: ‘ಪೈಲ್ವಾನ್’ ಸಿನಿಮಾದಲ್ಲಿ ಖಡಕ್ ಖಳನಾಗಿ ಕಾಣಿಸಿಕೊಂಡಿದ್ದ ನಟ ಕಬೀರ್ ದುಹಾನ್ ಸಿಂಗ್, ಈಗ ಪೊಲೀಸ್ ಆಫೀಸರ್ ಆಗಿದ್ದಾರೆ. ಗಡ್ಡಕ್ಕೆ ಕತ್ತರಿ ಹಾಕಿ ಕ್ಲೀನ್ ಶೇವ್ ಲುಕ್ನಲ್ಲಿ ಖಾಕಿ ಗತ್ತಿನಲ್ಲಿ ಬಂದಿದ್ದಾರೆ. ಹಾಗಂತ ರಿಯಲ್ ಲೈಫ್ನಲ್ಲಿ ಪೊಲೀಸ್ ಆಗಿಲ್ಲ. ಬದಲಿಗೆ ‘ಬಿಗ್ಬಾಸ್’ ಖ್ಯಾತಿಯ ಶಶಿ ನಾಯಕನಾಗಿ ನಟಿಸುತ್ತಿರುವ ‘ಮೆಹಬೂಬ’ ಸಿನಿಮಾದಲ್ಲಿ ಪೊಲೀಸ್ ಅಧಿಕಾರಿಯಾಗಿ ಕಬೀರ್ ನಟಿಸುತ್ತಿದ್ದಾರೆ. ‘ಮೆಹಬೂಬ’ ಚಿತ್ರ ಈಗಾಗಲೇ ಮೊದಲ ಹಂತದ ಶೂಟಿಂಗ್ ಮುಗಿಸಿಕೊಂಡಿದೆ. ಸದ್ಯ ಬೆಂಗಳೂರಿನ ಎಚ್ಎಂಟಿ ಬಳಿ ನಿರ್ವಿುಸಿರುವ ಪೊಲೀಸ್ ಸ್ಟೇಷನ್ ಸೆಟ್ನಲ್ಲಿ ಎರಡನೇ ಶೆಡ್ಯೂಲ್ನ ಶೂಟಿಂಗ್ ನಡೆಯುತ್ತಿದೆ. ಈ ಹಿಂದೆ ‘ಕಥಾ ವಿಚಿತ್ರ’ ಸಿನಿಮಾ ನಿರ್ದೇಶನ ಮಾಡಿದ್ದ ಅನೂಪ್ ಅಂಥೋನಿ ‘ಮೆಹಬೂಬ’ ಚಿತ್ರಕ್ಕೂ ನಿರ್ದೇಶನ ಮಾಡುತ್ತಿದ್ದಾರೆ. ‘ನೀರ್ದೋಸೆ’, ‘ಬ್ಯೂಟಿಫುಲ್ ಮನಸುಗಳು‘ ಚಿತ್ರಗಳನ್ನು ನಿರ್ವಿುಸಿದ್ದ ಪ್ರಸನ್ನ ಬಂಡವಾಳ ಹೂಡುತ್ತಿದ್ದು, ಮ್ಯಾಥ್ಯೂಸ್ ಮನು ಸಂಗೀತ ನಿರ್ದೇಶನ, ಕಿರಣ್ ಹಂಪಾಪುರ ಛಾಯಾಗ್ರಹಣ ಹಾಗೂ ಕೆ.ಎಂ. ಪ್ರಕಾಶ್ ಸಂಕಲನ ಈ ಚಿತ್ರಕ್ಕಿದೆ. ನಾಯಕಿಯಾಗಿ ಪಾವನಾ, ಬುಲೆಟ್ ಪ್ರಕಾಶ್, ಜೈ ಜಗದೀಶ್, ಶಿವರಾಂ, ಮೋಹನ್ ಜುನೇಜ, ಲಯಕೋಕಿಲ, ಕಲ್ಯಾಣಿರಾಜು ಸೇರಿ ಹಲವರು ಪಾತ್ರವರ್ಗದಲ್ಲಿದ್ದಾರೆ.