ಮುಂಬೈ: ಬಾಲಿವುಡ್ ಮತ್ತು ಡ್ರಗ್ಸ್ ನಂಟಿನ ಕುರಿತಾಗಿ ನಾರ್ಕೋಟಿಕ್ಸ್ ಕಂಟ್ರೋಲ್ ಬ್ಯೂರೋ (ಎನ್ಸಿಬಿ)ದವರು ಕಳೆದ ಕೆಲವು ತಿಂಗಳುಗಳಿಂದ ದೀಪಿಕಾ ಪಡುಕೋಣೆ, ಸಾರಾ ಅಲಿ ಖಾನ್, ರಾಕುಲ್ ಪ್ರೀತ್ ಸಿಂಗ್ ಸೇರಿದಂತೆ ಸಾಕಷ್ಟು ನಟ-ನಟಿಯರನ್ನು ವಿಚಾರಣೆಗೆ ಒಳಪಡಿಸಿದ್ದಾರೆ.
ಇದೀಗ ಅರ್ಜುನ್ ರಾಮ್ಪಾಲ್ ಅವರನ್ನು ಶುಕ್ರವಾರ, ಸುಮಾರು ಏಳು ಗಂಟೆಗಳ ಕಾಲ ವಿಚಾರಣೆ ನಡೆಸಿದ್ದಾರೆ. ಅರ್ಜುನ್ ಅಷ್ಟೇ ಅಲ್ಲ, ಅವರ ಗೆಳತಿ ಗೇಬ್ರಿಯಲ್ಲಾ ಡಿಮೆಟ್ರಿಯಾಡ್ಸ್ ಅವರನ್ನು ಸಹ ಬುಧವಾರ ಮತ್ತು ಗುರುವಾರ ತೀವ್ರ ವಿಚಾರಣೆ ಮಾಡಿ ಹಲವು ವಿಷಯಗಳನ್ನು ಸಂಗ್ರಹಿಸಿದ್ದಾರೆ.
ಶುಕ್ರವಾರ ವಿಚಾರಣೆಗೆ ಹಾಜರಾಗಿ ಮಾಹಿತಿ ಕೊಟ್ಟು ಹೊರಬಂದ ಅರ್ಜುನ್ ರಾಮ್ಪಾಲ್, ಡ್ರಗ್ಸ್ ವಿಷಯಕ್ಕೂ ಯಾವುದೇ ಸಂಬಂಧವಿಲ್ಲ ಎಂದು ಹೇಳಿಕೊಂಡಿದ್ದಾರೆ.
ಈ ಕುರಿತು ಮಾತನಾಡಿರುವ ಅವರು, 'ನನಗೂ ಈ ಡ್ರಗ್ಸ್ ಜಾಲಕ್ಕೂ ಯಾವುದೇ ಸಂಬಂಧವಿಲ್ಲ. ಎನ್ಸಿಬಿ ಅಧಿಕಾರಿಗಳು ನಮ್ಮ ಮನೆಯಲ್ಲಿ ರೇಡ್ ಮಾಡಿದಾಗ ಕೆಲವು ಪ್ರಿಸ್ಕ್ರಿಪ್ಶನ್ಗಳು ಸಿಕ್ಕಿವೆ. ಅದರ ಕುರಿತು ನನ್ನ ಹೇಳಿಕೆ ಪಡೆಯುವುದಕ್ಕೆ ಕರೆಸಿಕೊಂಡಿದ್ದರು. ಈ ಪ್ರಿಸ್ಕ್ರಿಪ್ಶನ್ಗಳಿಗೂ ನನಗೂ ಯಾವುದೇ ಸಂಬಂಧವಿಲ್ಲ ಎಂದು ಹೇಳಿದ್ದೇನೆ ಮತ್ತು ಅವರ ವಿಚಾರನೆಯಲ್ಲಿ ಪೂರ್ಣವಾಗಿ ಸಹಕರಿಸಿದ್ದೇನೆ' ಎಂದು ಹೇಳಿದ್ದಾರೆ.
ಇದನ್ನೂ ಓದಿ: ದೀಪಾವಳಿ ಹಬ್ಬದಂದು ಸಿಹಿಸುದ್ದಿ ಹಂಚಿಕೊಂಡ ಮಯೂರಿ
ಇತ್ತೀಚೆಗೆ ಅರ್ಜುನ್ ರಾಮ್ಪಾಲ್ ಅವರ ಮನೆಗೆ ದಾಳಿ ಮಾಡಿದ ಸಂದರ್ಭದಲ್ಲಿ ಎನ್ಸಿಬಿ ಅಧಿಕಾರಿಗಳು ಲ್ಯಾಪ್ಟಾಪ್, ಮೊಬೈಲ್ ಫೋನ್ ಮತ್ತು ಕೆಲವು ಮಾತ್ರೆಗಳನ್ನು ವಶಕ್ಕೆ ಪಡೆದಿದ್ದಾರೆ. ಜತೆಗೆ ಅರ್ಜುನ್ ಅವರ ಡ್ರೈವರ್ನನ್ನು ವಿಚಾರಣೆ ಮಾಡಿದ್ದು, ಅವನಿಂದ ಹಲವು ಮಾಹಿತಿಗಳನ್ನು ಕಲೆಹಾಕಿದ್ದಾರೆ ಎಂದು ಹೇಳಲಾಗಿದೆ.