ವಿಜಯವಾಣಿ ಸುದ್ದಿಜಾಲ ಬೆಂಗಳೂರು:
"ವಿಜಯಾನಂದ' ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದ್ದ ಹೆಸರಾಂತ ಸಂಗೀತ ನಿರ್ದೇಶಕ ಗೋಪಿ ಸುಂದರ್, ಆ ಬಳಿಕ "ವಿಷ್ಣುಪ್ರಿಯ' ಸಿನಿಮಾಗೂ ಸಂಗೀತ ನೀಡಿದ್ದರು. ಇದೀಗ ಕನ್ನಡದ "ಕೊರಗಜ್ಜ' ಚಿತ್ರಕ್ಕೆ ಸಂಗೀತ ನೀಡುವ ಮೂಲಕ ಸ್ಯಾಂಡಲ್ವುಡ್ನಲ್ಲಿ ಹ್ಯಾಟ್ರಿಕ್ ಬಾರಿಸಿದ್ದಾರೆ.
ಸುಧೀರ್ ಅತ್ತಾವರ್ ನಿರ್ದೇಶನದ, ತ್ರಿವಿಕ್ರಮ ಸಪಲ್ಯ ನಿರ್ಮಾಣದ "ಕೊರಗಜ್ಜ' ಚಿತ್ರದ ಬಗ್ಗೆ ಗೋಪಿ ಸುಂದರ್, "ಇದು ಸಾಮಾನ್ಯ ತಂದೆ, ಮಗಳ ಕಥೆಯಲ್ಲ. ನಿರ್ದೇಶಕರು ತುಂಬ ರೀಸರ್ಚ್ ಮಾಡಿರುವ ಸಿನಿಮಾ. ಹೊಸ ಸಂಪ್ರದಾಯ, ವಿಶೇಷ ನಂಬಿಕೆಗಳ ಆಧಾರದ ಮೇಲೆ ನಿಂತಿರುವ ಚಿತ್ರ. ಹೀಗಾಗಿ ಆ ವಿಷಯಗಳನ್ನು ಅಧ್ಯಯನ ಮಾಡಿ ಸಂಗೀತ ಸಂಯೋಜಿಸಲು ನನಗೂ ಹೆಚ್ಚು ಸಮಯ ಬೇಕಾಗಿತ್ತು. "ಕೊರಗಜ್ಜ' ನನಗೆ ಹೊಸ ರೀತಿಯ ಜಾನರ್ ಆವಿಷ್ಕಾರ ಮಾಡಲು ಸಹಾಯ ಮಾಡಿದೆ. ಸಾಮಾನ್ಯ ಮಾದರಿಯನ್ನು ಮೀರಿ ಯಾರೂ ಊಹಿಸದ ರೀತಿಯ ಬಗೆ ಬಗೆಯ ಸೂಕ್ಷ್ಮ ಪದರಗಳನ್ನು ಹೊಂದಿರುವ ಚಿತ್ರ. ಈ ಸಿನಿಮಾಗೆ ಸಂಗೀತ ನೀಡುವುದು ಅತ್ಯಂತ ಸವಾಲಿನ ಕೆಲಸ ಮತ್ತು ಸೌಭಾಗ್ಯ' ಎಂದು ಅನುಭವ ಹಂಚಿಕೊಂಡರು.
ನಿರ್ದೇಶಕ ಸುಧೀರ್, "ಗೋಪಿ ಸುಂದರ್ ಅವರು ಸಂಗೀತ ನೀಡಿದ್ದ "ಪುಲಿ ಮುರುಗನ್' ಆಸ್ಕರ್ನಲ್ಲಿ ಸ್ಪರ್ಧಿಸಿ, ಕೊನೆಯ ಹಂತದಲ್ಲಿ ಸೋತಿತ್ತು. ಆದರೆ, ನಮ್ಮ ಚಿತ್ರಕ್ಕೆ ಅದಕ್ಕಿಂತಲೂ ಉತ್ಕ್ರಷ್ಟ ಮಟ್ಟದ ಸಂಗೀತ ನೀಡಿದ್ದಾರೆ' ಎಂದರು. ಚಿತ್ರದಲ್ಲಿ ಆರು ಹಾಡುಗಳಿದ್ದು ಶ್ರೇಯಾ ಘೋಷಾಲ್, ಶಂಕರ್ ಮಹದೇವನ್, ಸುನಿಧಿ ಚೌಹಾನ್, ಜಾವೆದ್ ಅಲಿ, ಅರ್ಮಾನ್ ಮಲ್ಲಿಕ್, ಸ್ರೂಪ್ ಖಾನ್ ಹಾಡಿದ್ದಾರೆ. ಹೀಗಾಗಿ "ಕೊರಗಜ್ಜ' ಆಡಿಯೋ ಹಕ್ಕುಗಳಿಗೂ ಭರ್ಜರಿ ಬೇಡಿಕೆಯಿದೆ ಎಂಬುದು ಚಿತ್ರತಂಡದ ಸಂತಸ ಹೆಚ್ಚಿಸಿದೆ.