ಬೆಂಗಳೂರು: ಅರಬ್ಬರ ನಾಡಿನಲ್ಲಿ ಐಪಿಎಲ್ ಹವಾ ಶುರುವಾಗಿದೆ. ಇತ್ತ ಕರ್ನಾಟಕದಲ್ಲಿ ಆರ್ಸಿಬಿ ಕ್ರೇಜ್ ಹೆಚ್ಚಾಗಿದೆ. ಸೋಷಿಯಲ್ ಮೀಡಿಯಾದಲ್ಲಂತೂ ಬಗೆಬಗೆ ರೀತಿಯಲ್ಲಿ ಆರ್ಸಿಬಿ ಕುರಿತ 'ಈ ಸಲ ಕಪ್ ನಮ್ದೆ' ಎಂಬ ಘೋಷವಾಕ್ಯಗಳು ಮೊಳಗುತ್ತಿವೆ. ಜತೆಗೆ ಆರ್ಸಿಬಿ ಅಭಿಮಾನಿಗಳು ಹಾಡುಗಳ ಮೂಲಕವೂ ರಂಜಿಸುತ್ತಿದ್ದಾರೆ. ಇದೀಗ ಈ ವರ್ಷವೂ ಅಂಥದ್ದೇ ಮನ ಕುಣಿಸೋ ಮತ್ತು ಮನ ತಣಿಸೋ ಹಾಡೊಂದು ಬಿಡುಗಡೆ ಆಗಿದೆ.
ಟ್ರೋಲ್ ಹೈದ ಟೀಮ್ ಕಡೆಯಿಂದ ಸಿದ್ಧವಾದ ಈ ಹಾಡು ಸದ್ಯ ಯೂಟ್ಯೂಬ್ನಲ್ಲಿ ಕ್ರೇಜ್ ಸೃಷ್ಟಿಸಿದೆ. ‘ಫಾರ್ಎವರ್ ಆರ್ಸಿಬಿ’ ಎಂಬ ಶೀರ್ಷಿಕೆಯಡಿ ಮೂಡಿಬಂದಿರುವ ಈ ಹಾಡಿನಲ್ಲಿ ಸ್ಯಾಂಡಲ್ವುಡ್ ತಾರೆಯರು ಹಾಡಿಗೆ ಹೆಜ್ಜೆಹಾಕಿದ್ದಾರೆ. ಮನಃತುಂಬಿ ಹಾಡಿ ಕುಣಿದಿದ್ದಾರೆ.
‘ಅಣು ಅಣುವಲು ಆರ್ಸಿಬಿ.. ಕಣಕಣದಲ್ಲೂ ಆರ್ಸಿಬಿ... ಮನಮನದಲ್ಲೂ ಆರ್ಸಿಬಿ...’ ಎಂದು ಶುರುವಾಗುವ ಹಾಡಿನಲ್ಲಿ, ವಿಜಯ್ ರಾಘವೇಂದ್ರ, ಪ್ರಣೀತಾ ಸುಭಾಷ್, ಅದಿತಿ ಪ್ರಭುದೇವ, ಎಂ.ಜಿ ಶ್ರೀನಿವಾಸ್, ವಿಕ್ಕಿ ವರುಣ್, ಸಂಜನಾ ಆನಂದ್, ಪ್ರಭು ಮುಂಡ್ಕೂರ್, ಅಮೃತಾ ಅಯ್ಯಂಗಾರ್, ಸಪ್ತಮಿ ಗೌಡ ಹಾಡಿನಲ್ಲಿ ಕಾಣಿಸಿಕೊಂಡು, ಆರ್ಸಿಬಿ ಅಭಿಮಾನಿಗಳಿಗೆ ಜೋಶ್ ತುಂಬಿದ್ದಾರೆ.
ಬರೀ ಸಿನಿಮಾ ಮಂದಿಯಷ್ಟೇ ಅಲ್ಲ, ಕರೊನಾ ವಾರಿಯರ್ಸ್ಗಳೂ ಈ ಹಾಡಿನಲ್ಲಿ ಕಾಣಿಸಿಕೊಂಡಿದ್ದಾರೆ. ಪೊಲೀಸ್ ಇಲಾಖೆ, ಪೌರಕಾರ್ಮಿಕರು ಸಹ ಹಾಡಿನಲ್ಲಿ ಆರ್ಸಿಬಿ ಅಭಿಮಾನಿಗಳಿಗೆ ಜೋಶ್ ನೀಡಿದ್ದಾರೆ. ಇನ್ನು ತಾಂತ್ರಿಕ ವರ್ಗದ ಬಗ್ಗೆ ನೋಡುವುದಾದರೆ, ಅನಿರುದ್ಧ ಶಾಸ್ತ್ರಿ, ಮೈತ್ರಿ ಅಯ್ಯರ್, ಮದ್ವೇಶ್ ಭಾರದ್ವಾಜ್ ಹಾಡಿಗೆ ಧ್ವನಿ ನೀಡಿದ್ದಾರೆ. ಕಾರ್ಯಕಾರಿ ನಿರ್ಮಾಪಕರಾಗಿ ಮತ್ತು ಕ್ರಿಯೇಟಿವ್ ಮುಖ್ಯಸ್ಥರಾಗಿ ನಯನ್ ತೆಮ್ಕರ್ ಕೆಲಸ ಮಾಡಿದ್ದಾರೆ.
ಒಟ್ಟು ಎರಡೇ ದಿನದಲ್ಲಿ ಈ ಹಾಡನ್ನು ಕ್ಯಾಮರಾದಲ್ಲಿ ಸೆರೆ ಹಿಡಿದವರು ಉದಯ್ ಲೀಲಾ. ಹಾಡಿಗೆ ಸಾಹಿತ್ಯ ಮತ್ತು ಸಂಗೀತ ನೀಡಿದ್ದಾರೆ ಅನಿರುದ್ಧ ಶಾಸ್ತ್ರಿ. ಸಾಗರ್ ಮಹದೇವ್ ಸಂಕಲನ ಮತ್ತು ವಿಎಫ್ಎಕ್ಸ್ ನಿರ್ವಹಿಸಿದ್ದಾರೆ. ನೃತ್ಯ ನಿರ್ದೇಶನ ಮಾಡಿದ್ದಾರೆ ಮಾಧುರಿ ಪರಶುರಾಮ್.