ಬೆಂಗಳೂರು: ಕನ್ನಡದ ಸ್ಟಾರ್ ನಟರು ಕನ್ನಡದಲ್ಲಿ ಹೀರೋಗಳಾದರೆ, ಪರಭಾಷೆಗಳಲ್ಲಿ ವಿಲನ್ ಆಗಿ ಅಬ್ಬರಿಸುತ್ತಾರೆ. ಕಿಚ್ಚ ಸುದೀಪ್ ನಟನೆಯ ಬಹುತೇಕ ಪರಭಾಷೆ ಸಿನಿಮಾಗಳಲ್ಲಿ ವಿಲನ್ ಆಗಿ ಅಬ್ಬರಿಸಿದ್ದೇ ಹೆಚ್ಚು. ಈಗ ಆ ವಿಲನ್ ಪಟ್ಟಕ್ಕೆ ಕಿವಿಗೊಡಬೇಡಿ ಎಂದು ಕನ್ನಡದ ನಿರ್ದೇಶಕ ರವಿ ಶ್ರೀವತ್ಸ ಮನವಿ ಟ್ವಿಟರ್ನಲ್ಲಿ ಮಾಡಿದ್ದಾರೆ.
‘ನನ್ನ ಎಲ್ಲ ಹೀರೋಗಳಿಗೆ ಕೈ ಮುಗಿದು ಕೇಳಿಕೊಳ್ಳುತ್ತೇನೆ. ಅಭಿನಯ, ಹೆಸರು, ಹಣ, ಕೀರ್ತಿ ಈ ಹಣೆಪಟ್ಟಿ ಹುಡ್ಕೊಂಡು ದಯಮಾಡಿ ಹೊರ ಭಾಷೆಗಳಲ್ಲಿ ಅಭಿನಯಿಸಿ, ಅಲ್ಲಿನ ಹೀರೋಗಳ ಕೈಯಲ್ಲಿ ಒದೆ ತಿಂದು ಬರಬೇಡಿ!ಪ್ಲೀಸ್ ’ ಎಂದು ಮನವಿ ಮಾಡಿದ್ದಾರೆ. ಹೀಗೆ ಮನವಿ ಮಾಡಿದ್ದು, ಇತ್ತೀಚೆಗೆ ಸುದ್ದಿಯಲ್ಲಿರುವ ಪುಷ್ಪಾ ಸಿನಿಮಾದ ಸುದ್ದಿಯೊಂದನ್ನು ಕೇಳಿ.
ಬಹುಭಾಷೆಯಲ್ಲಿ ಸಿದ್ಧವಾಗುತ್ತಿರುವ ಪುಷ್ಪ ಚಿತ್ರದಲ್ಲಿ ವಿಜಯ್ ಸೇತುಪತಿ ಖಳನಾಗಿ ನಟಿಸಬೇಕಿತ್ತು. ಕಾರಣಾಂತರಗಳಿಂದ ಅವರು ಹಿಂದೆ ಸರಿದರು. ಹೀಗಿರುವಾಗಲೇ ವಿಜಯ್ ಸ್ಥಾನಕ್ಕೆ ಕನ್ನಡದ ನಟ ಧನಂಜಯ ಹೆಸರು ಕೇಳಿಬಂದಿತ್ತು. ಆ ಸುದ್ದಿಯನ್ನು ನೋಡಿ, ರವಿ ಶ್ರೀವತ್ಸ ಈ ರೀತಿ ತಮ್ಮ ಮನದಾಳ ಹೇಳಿಕೊಂಡಿದ್ದಾರೆ. ರವಿ ಶ್ರೀವತ್ಸ ಅವರ ಅಭಿಪ್ರಾಯಕ್ಕೆ ಜಾಲತಾಣದಲ್ಲಿ ಮೆಚ್ಚುಗೆ ವ್ಯಕ್ತವಾಗಿದ್ದು, ಅದನ್ನೇ ಫಾಲೋ ಮಾಡುವಂತೆ ಎಲ್ಲ ಹೀರೋಗಳಿಗೆ ನೆಟ್ಟಿಗರೇ ಸಲಹೆ ನೀಡುತ್ತಿದ್ದಾರೆ.