ವಿಜಯವಾಣಿ ಸುದ್ದಿಜಾಲ ಬೆಂಗಳೂರು:
ರಂಗಾಯಣದಲ್ಲಿ 25 ವರ್ಷಗಳ ಕಾಲ ಕೆಲಸ ಮಾಡಿ, ಡಾ. ರಾಜಕುಮಾರ್ ಫಿಲಂ ಶಾಲೆಯಲ್ಲಿ ಸಿನಿಮಾ ಮೇಕಿಂಗ್ ಕಲಿತಿರುವ ಆರ್.ಸಿ. ರಂಗಶೇಖರ್ ಕಥೆ, ಚಿತ್ರಕಥೆ, ಸಂಭಾಷಣೆ, ಸಾಹಿತ್ಯ ಬರೆದು ಮೊದಲ ಬಾರಿಗೆ ನಿರ್ದೇಶಿಸಿರುವ ಸಿನಿಮಾ "ಮುಕ್ತ ಮನಸು'. ಅವರೂ ಮತ್ತು ನಾಯಕ ಮೋಹನ್ ಸೇರಿ ಬಹುತೇಕ ಚಿತ್ರತಂಡ ಹೊಸಬರಿಂದ ಕೂಡಿದೆ.
ನಿರ್ದೇಶಕ ರಂಗಶೇಖರ್, "ಪ್ರೇಮಿಗಳು ಮುಕ್ತವಾಗಿದ್ದರೆ, ಅವರ ಸಂಬಂಧದಲ್ಲಿ ಯಾವುದೇ ಕಲ್ಮಶವಿಲ್ಲದಿದ್ದರೆ ಪ್ರೀತಿ ಹೇಗೆ ಕೊನೆಯ ತನಕ ಉಳಿದುಕೊಳ್ಳುತ್ತದೆ? ಆ ನಿಜ ಪ್ರೀತಿ ಹೇಗಿರುತ್ತದೆ? ಎಂಬುದೇ ಚಿತ್ರದ ಒನ್ಲೈನ್. ಹಳ್ಳಿಯಿಂದ ಪಟ್ಟಣಕ್ಕೆ ಓದಲು ಬರುವ ನಾಯಕಿಗೆ ನಾಯಕನ ಮೇಲೆ ಪ್ರೇಮಾಂಕುರವಾಗುತ್ತದೆ. ಮನೆಯಲ್ಲಿ ವಿರೋಧ ಎದುರಾದಾಗ ಮುಕ್ತ ಮನಸುಗಳ ಪ್ರೀತಿ ಯಾವ ಹಂತಕ್ಕೆ ತಲುಪುತ್ತದೆ? ಕೊನೆಗೆ ಒಬ್ಬರೂ ಒಂದಾಗುತ್ತಾರಾ? ಎಂಬುದನ್ನು ಕಮರ್ಷಿಯಲ್ ಅಂಶಗಳೊಂದಿಗೆ ಹೇಳುವ ಪ್ರಯತ್ನ ಮಾಡಿದ್ದೇನೆ' ಎಂದು ಮಾಹಿತಿ ನೀಡುತ್ತಾರೆ.
"ಡಾನ್ಸ್ ಕರ್ನಾಟಕ ಡಾನ್ಸ್ ಸೀಸನ್ 5'ರ ಸ್ಪರ್ಧಿ ಮೈಸೂರಿನ ಮೋಹನ್ ರಂಗನಾಥ್ ನಾಯಕನಾಗಿದ್ದು, ಆಟೋ ಚಾಲಕನ ಪಾತ್ರದಲ್ಲಿ ನಟಿಸಿದ್ದಾರೆ. ಅವರಿಗೆ ಕ್ಲಾಸಿಕಲ್ ಡಾನ್ಸರ್ ಮಾನ್ಯ ನಾಯಕಿಯಾಗಿದ್ದಾರೆ. ಉಳಿದಂತೆ ಶೋಭರಾಜ್, ರಮೇಶ್ ಪಂಡಿತ್, ಅಪರ್ಣ ತಾರಾಗಣದಲ್ಲಿದ್ದಾರೆ. ಚಿತ್ರದಲ್ಲಿ ಐದು ಹಾಡುಗಳಿದ್ದು ವಿನು ಮನಸು ಸಂಗೀತ, ರವಿ ಛಾಯಾಗ್ರಹಣವಿರಲಿದೆ.