ಬೆಂಗಳೂರು: ಜೀ ಕನ್ನಡ ವಾಹಿನಿಯು ಕಾಮಿಡಿ ಕಿಲಾಡಿಗಳು ಕಲಾವಿದರ ಮೂಲಕ ಕಳೆದ ಬಾರಿಗಿಂತ ಮತ್ತಷ್ಟು ವಿನೂತನ ಪ್ರಯೋಗಗಳ ಜತೆ ‘ಕಾಮಿಡಿ ಕಿಲಾಡಿಗಳು ಚಾಂಪಿಯನ್ಶಿಪ್’ ಕಾರ್ಯಕ್ರಮವನ್ನು ಮತ್ತೆ ಅದ್ಧೂರಿಯಾಗಿ ನಿಮ್ಮ ಮುಂದೆ ತರುತ್ತಿದೆ. ಕಾಮಿಡಿ ಕಿಲಾಡಿಗಳು ಸೀಸನ್ 1 ಮತ್ತು ಸೀಸನ್ 2ರ ಕಿಲಾಡಿಗಳ ಜತೆ ಸೀಸನ್ 3ರರ ಕಿಲಾಡಿಗಳು ಈ ಸಲದ ಕಾರ್ಯಕ್ರಮದಲ್ಲಿ ಸೇರ್ಪಡೆಗೊಂಡಿದ್ದಾರೆ. 36 ಜನ ಕಲಾವಿದರು, 6 ತಂಡಗಳಾಗಿ ಫೀಲ್ಡ್ಗೆ ಇಳಿದು ಭರ್ಜರಿಯಾಗಿ ಬ್ಯಾಟಿಂಗ್ ಮಾಡಿ ನಗುವಿನ ಬೌಂಡರಿ, ಸಿಕ್ಸರ್ಗಳನ್ನು ಬಾರಿಸಲಿದ್ದಾರೆ.
ಶಿವರಾಜ್ ಕೆ.ಆರ್. ಪೇಟೆ, ಗೋವಿಂದೇಗೌಡ, ನಯನ, ಮಡೇನೂರು ಮನು, ಅಪ್ಪಣ್ಣ ಹಾಗೂ ಸೂರಜ್ ತಂಡದ ಕ್ಯಾಪ್ಟನ್ಗಳಾಗಿ ಕಾಣಿಸಲಿಕೊಳ್ಳಲಿದ್ದಾರೆ. ಕಾರ್ಯಕ್ರಮದ ಮುಕುಟಗಳಾದ ನವರಸ ನಾಯಕ ಜಗ್ಗೇಶ್, ಕ್ರೇಜಿಕ್ವೀನ್ ರಕ್ಷಿತಾ ಹಾಗೂ ನಿರ್ದೇಶಕ ವಿಕಟಕವಿ ಯೋಗರಾಜ್ ಭಟ್ ಈ ಬಾರಿಯೂ ಚಾಂಪಿಯನ್ಶಿಪ್ನ ತೀರ್ಪಗಾರರಾಗಿ ಹಾಗೂ ತಲಾ ಎರಡು ತಂಡಗಳ ಮಾಲೀಕರಾಗಿ ಹುರಿದುಂಬಿಸಲಿದ್ದಾರೆ. ಮಾಸ್ಟರ್ ಆನಂದ್ ಕಾರ್ಯಕ್ರಮದ ಸಾರಥಿಯಾಗಿ ನಿರೂಪಣೆ ಮಾಡಲಿದ್ದಾರೆ. ಈ ನಗುವಿನ ಮಳೆ ಸುರಿಸುವ ಕಾರ್ಯಕ್ರಮ ಶನಿವಾರ (ಸೆ. 12) ಮತ್ತು ಭಾನುವಾರ ರಾತ್ರಿ 9 ಗಂಟೆಗೆ ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗಲಿದೆ. ಶನಿವಾರ ರಾತ್ರಿ 7.30ರಿಂದ 10.30ರ ವರೆಗೆ ಸರಿಗಮಪ ಸೀಸನ್ 17 ಹಾಗೂ ಕಾಮಿಡಿ ಕಿಲಾಡಿಗಳು ಚಾಂಪಿಯನ್ಶಿಪ್ ಮೂಲಕ ಬರುತ್ತಿದ್ದಾರೆ.