ದಳಪತಿ ವಿಜಯ್ ಅಭಿನಯದ ಕೊನೆಯ ಸಿನಿಮಾ 'ಜನ ನಾಯಗನ್'
- ಜ.09ಕ್ಕೆ ತೆರೆ ಕಾಣಬೇಕಿತ್ತು ದಳಪತಿ ವಿಜಯ್ ಅಭಿನಯದ 'ಜನ ನಾಯಗನ್'
- ವಿಜಯ್ ನಟನೆಯ ಕೊನೆಯ ಹಾಗೂ ಬಹುನಿರೀಕ್ಷಿತ ಚಿತ್ರವಿದು
- ಈ ವರ್ಷದ ಆರಂಭದಿಂದ ಚಿತ್ರಕ್ಕೆ ಒಂದರ ಮೇಲೊಂದು ಸಮಸ್ಯೆಗಳು
ಚೆನ್ನೈ: ಹೊಸ ವರ್ಷದ ಆರಂಭದಿಂದಲೇ ತಮಿಳು ಚಿತ್ರರಂಗದ ಸೂಪರ್ ಸ್ಟಾರ್ ದಳಪತಿ ವಿಜಯ್ಗೆ ಒಂದಲ್ಲ ಒಂದು ಸಂಕಷ್ಟಗಳು ಹೆಗಲೇರುತ್ತಿವೆ. ವಿಜಯ್ ನಟನೆಯ ಬಹುನಿರೀಕ್ಷಿತ ಹಾಗೂ ಕೊನೆಯ ಸಿನಿಮಾ 'ಜನನಾಯಗನ್' ರಿಲೀಸ್ ಜ.09ರಂದೇ ರಿಲೀಸ್ ಆಗಬೇಕಿತ್ತು. ಆದರೆ, ಅದೇನಾಯಿತೋ ಏನೋ, ಚಿತ್ರಕ್ಕೆ ಸೆನ್ಸಾರ್ ಮಂಡಳಿಯಿಂದ ಅಡಚಣೆ ಉಂಟಾಯಿತು. ಯಾವಾಗ ಚಿತ್ರತಂಡ ಕೋರ್ಟ್ ಮೆಟ್ಟಿಲೇರಿತೋ ಅಲ್ಲಿಂದ ಸಿನಿಮಾದ ಇಡೀ ದಿಕ್ಕೇ ಬದಲಾಗಿ ಹೋಗಿದೆ.
ಜ.09ರಂದು ಸಂಕ್ರಾಂತಿ ಹಬ್ಬಕ್ಕೆ ತೆರೆ ಕಾಣಬೇಕಿದ್ದ ಜನನಾಯಗನ್ ಚಿತ್ರಕ್ಕೆ ಸದ್ಯ ಸಿಬಿಎಫ್ಸಿ ಇನ್ನೂ ರಿಲೀಸ್ ಭಾಗ್ಯ ನೀಡಿಲ್ಲ. ಇದಕ್ಕೆ ಕೋರ್ಟ್ ಕೂಡ ಅಸ್ತು ಎಂದಿಲ್ಲ. ಸಿನಿಮಾದಲ್ಲಿ ಒಂದಷ್ಟು ಬದಲಾವಣೆಗಳನ್ನು ತನ್ನಿ ಎಂಬ ಆದೇಶಗಳ ಮೇರೆಗೆ ಚಿತ್ರತಂಡ ತೆರೆ ಹಿಂದೆ ಸಾಕಷ್ಟು ಪ್ರಯತ್ನಗಳಲ್ಲಿ ತೊಡಗಿದೆ. ಇಷ್ಟಾದರೂ ಸಿಬಿಎಫ್ಸಿ ಮಾತ್ರ ಚುರುಕಾಗಿ ಕೆಲಸ ಮುಗಿಸದೆ, ಚಿತ್ರದ ವಿಳಂಬಕ್ಕೆ ನೇರವಾಗಿ ಕಾರಣವಾಗುತ್ತಿದೆ. ಒಂದಷ್ಟು ವರದಿಗಳು ನಟನ ಸಿನಿಮಾ ಜೂನ್ ಅಥವಾ ಜುಲೈಗೆ ಬರಬಹುದು ಎಂದು ತಿಳಿಸಿವೆ. ಸದ್ಯದ ಮಟ್ಟಿಗೆ ಜನನಾಯಗನ್ ರಿಲೀಸ್ ದಿನಾಂಕದ ಬಗ್ಗೆ ಮಾಹಿತಿ ಇರಲಿ, ಒಂದು ಸಣ್ಣ ಸುಳಿವು ಕೂಡ ಇಲ್ಲದಂತಾಗಿದೆ.
ಹಲವು ಸಿನಿ ವರದಿಗಳ ಪ್ರಕಾರ, ದಳಪತಿ ವಿಜಯ್ ಚಿತ್ರದ ಒಟಿಟಿ ಹಕ್ಕುಗಳನ್ನು ಪಡೆಯಲು ಅಮೆಜಾನ್ ಪ್ರೈಮ್ ವಿಡಿಯೋ ಸಂಸ್ಥೆ ಮುಂಚೂಣಿಯಲ್ಲಿತ್ತು. ಆದರೆ, ಸದ್ಯದ ಪರಿಸ್ಥಿತಿಗಳಿಂದ ಗೊಂದಲಕ್ಕೊಳಗಾದ ಹೆಸರಾಂತ ಒಟಿಟಿ ಪ್ಲಾಟ್ಫಾರ್ಮ್, ತನ್ನ ಡೀಲ್ನಿಂದ ಹಿಂದೆ ಸರಿದಿದೆ ಎಂದು ವರದಿಯಾಗಿದೆ. ಇದಕ್ಕೆ ಚಿತ್ರತಂಡ ರಿಲೀಸ್ ದಿನಾಂಕ ಯಾವಾಗ ಎಂದು ಸ್ಪಷ್ಟಪಡಿಸದೆ ಇರುವುದೇ ಮುಖ್ಯ ಕಾರಣ ಎನ್ನಲಾಗಿದೆ.
ಎಚ್. ವಿನೋತ್ ನಿರ್ದೇಶನದ ಹಾಗೂ ಕೆವಿಎನ್ ಸಂಸ್ಥೆ ನಿರ್ಮಿಸಿರುವ ಜನ ನಾಯಗನ್ ಚಿತ್ರದಲ್ಲಿ ದಳಪತಿ ವಿಜಯ್, ಪೂಜಾ ಹೆಗ್ಡೆ ಮುಖ್ಯಭೂಮಿಕೆಯಲ್ಲಿ ನಟಿಸಿದ್ದಾರೆ. ಬಾಬಿ ಡಿಯೋಲ್, ಮಮಿತಾ ಬಿಜ್ಜು, ಗೌತಮ್ ವಾಸುದೇವ್ ಮೆನೆನ್, ಪ್ರಕಾಶ್ ರಾಜ್, ಪ್ರಿಯಾಮಣಿ ಮತ್ತು ನರೈನ್ ಸೇರಿದಂತೆ ಹಲವರು ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ,(ಏಜೆನ್ಸೀಸ್).