ಆತ ಮೆಕ್ಯಾನಿಕ್ ಮನು ಅಲಿಯಾಸ್ ಮನೋಹರ (ಚೇತನ್ ಚಂದ್ರ). ವೃತ್ತಿಯಲ್ಲಿ ಮೆಕ್ಯಾನಿಕ್ ಆದರೂ, ಪ್ರವೃತ್ತಿಯಲ್ಲಿ ದುಷ್ಟರ ವಿರುದ್ಧ ತನ್ನದೇ ರೀತಿಯಲ್ಲಿ ಸಮರ ಸಾರುವ ಜನ ಸಾಮಾನ್ಯರ ಸೂಪರ್ ಹೀರೋ. ಆಕೆ ಪರಿಸರವಾದಿ ಅನು (ಪಾವನಾ ಗೌಡ). ಇಬ್ಬರ ಅನಿರೀಕ್ಷಿತ ಪರಿಚಯ, ಪ್ರೀತಿಗೆ ತಿರುಗುತ್ತದೆ. ಆದರೆ, ಅಷ್ಟರಲ್ಲಿ ಮನುವಿನ ಹೋರಾಟಗಳೇ ಆತನನ್ನು ಸಂಕಷ್ಟಕ್ಕೆ ಸಿಲುಕಿಸುತ್ತವೆ. ಮುಳ್ಳನ್ನು, ಮುಳ್ಳಿನಿಂದಲೇ ತೆಗೆಯಬೇಕು. ಹಿಂಸೆಯ ಸದ್ದನ್ನು ಹಿಂಸೆಯಿಂದಲೇ ಅಡಗಿಸಬೇಕು ಎಂಬ ನೀತಿ ಅನುಸರಿಸುವ ಮನು, ಎಂಎಲ್ಎ ವಿಜಯಲಕ್ಷ್ಮಿ ಸಹೋದರ ರವಿ (ಹರೀಶ್ ರಾಯ್) ಕೊಲೆಯಲ್ಲಿ ಆರೋಪಿ ಸ್ಥಾನದಲ್ಲಿ ನಿಲ್ಲುತ್ತಾನೆ. ಖಡಕ್ ಪೊಲೀಸ್ ಅಧಿಕಾರಿ (ಶಶಿಕುಮಾರ್) ಆತನನ್ನು ಬಂಧಿಸುತ್ತಾರೆ. ಮುಂದೆ? ಅಲ್ಲಿಗೆ ದುಷ್ಟರ ವಿರುದ್ಧದ ಮನು ಹೋರಾಟ ಕೊನೆಯಾಗುತ್ತಾ? ಅನು, ಮನು ಲವ್ಸ್ಟೋರಿ ಏನಾಗುತ್ತೆ? ಗಾಡಿ ರಿಪೇರಿ ಮಾಡುವ ಮನು ಸಮಾಜದ ರಿಪೇರಿಗೆ ಇಳಿಯಲು ಕಾರಣವೇನು? ಆತನೇ ರವಿಯ ಕೊಲೆ ಮಾಡಿರುತ್ತಾನಾ? ಹೀಗೆ ಪ್ರೇಕ್ಷಕರಲ್ಲಿ ಮೂಡುವ ಹಲವು ಪ್ರಶ್ನೆಗಳಿಗೆ ಸಿನಿಮಾದಲ್ಲಿ ಉತ್ತರವಿದೆ.
ಲೇಟ್ ಆದರೂ ಪ್ರಭುತ್ವ ಲೇಟೆಸ್ಟಾಗಿ ರಿಲೀಸ್ ಆಗಿರುವ ಸಿನಿಮಾ. ಶಿಷ್ಟರನ್ನು ರಕ್ಷಿಸಿ, ದುಷ್ಟರನ್ನು ಶಿಕ್ಷಿಸುವ ಯೂನಿವರ್ಸಲ್ ಸಬ್ಜೆಕ್ಟ್ ಆಗಿರುವ ಕಾರಣ ಥಿಯೇಟರ್ನಲ್ಲಿ ತಡವಾದರೂ ತಡೆದುಕೊಳ್ಳಬಹುದು. ಸಮಾಜದಲ್ಲಿನ ದುಷ್ಟ ಶಕ್ತಿಗಳ ಶಿಕಾರಿ ಮಾಡುವ ಆ್ಯಂಗ್ರಿ ಯಂಗ್ ಮ್ಯಾನ್ ಪಾತ್ರದಲ್ಲಿ ನಾಯಕ ಚೇತನ್ ಚಂದ್ರ ಗಮನ ಸೆಳೆಯುತ್ತಾರೆ. ಫೈಟ್ಗಳಲ್ಲಿ ಮಿಂಚುವ ಅವರು, ಡೈಲಾಗ್ಗಳಲ್ಲೂ ಅಬ್ಬರಿಸಿದ್ದಾರೆ. ನಾಯಕಿ ಪಾವನಾ ಕೂಡ ಅವರಿಗೆ ಸರಿಸಮನಾಗಿ ಸಾಥ್ ನೀಡಿದ್ದಾರೆ. ರಾಜೇಶ್ ನಟರಂಗ, ನಾಸರ್, ಶಶಿಕುಮಾರ್, ವೀಣಾ ಸುಂದರ್, ಆದಿ ಲೋಕೇಶ್, ಶರತ್ ಲೋಹಿತಾಶ್ವ ತಮ್ಮ ಪಾತ್ರಗಳನ್ನು ಅಚ್ಚುಕಟ್ಟಾಗಿ ನಿಭಾಯಿಸಿದ್ದಾರೆ. ಸಿನಿಮಾ ಸ್ವಲ್ಪ ನಿಧಾನ ಎನಿಸಿದರೂ, ತಾಳ್ಮೆ ಪರೀಕ್ಷೆ ಮಾಡದೇ ನೋಡಿಸಿಕೊಂಡು ಹೋಗುತ್ತದೆ. ಅದಕ್ಕೆ ಕಾರಣ ಚಿತ್ರದ ಸಂಭಾಷಣೆ. ರೊಮ್ಯಾಂಟಿಕ್ ಆ್ಯಕ್ಷನ್ ಡ್ರಾಮಾ ಜಾನರ್ ಅಭಿಮಾನಿಗಳಿಗೆ ಪ್ರಭುತ್ವ ಇಷ್ಟವಾಗಬಹುದು.