Amitabh Bachchan : ಎಂಬತ್ಮೂರರ ಹರೆಯದಲ್ಲೂ ಸಿನಿಮಾ ಹಾಗೂ ಕಿರುತೆರೆ ಕಾರ್ಯಕ್ರಮಗಳ ಮೂಲಕ ಅಭಿಮಾನಿಗಳನ್ನು ರಂಜಿಸುತ್ತಿರುವ ಬಾಲಿವುಡ್ ಹಿರಿಯ ನಟ ಅಮಿತಾಭ್ ಬಚ್ಚನ್‌ ಅವರಿಗೆ ಕೌನ್ ಬನೇಗಾ ಕರೋಡ್ಪತಿ ಸೀಸನ್ 18 ಶೂಟಿಂಗ್ ವೇಳೆ ಮಂಡಿಗೆ ಗಾಯವಾಗಿದೆ. ಶೂಟಿಂಗ್ ವೇಳೆ ಜಾರಿ ಬಿದ್ದ ಪರಿಣಾಮ ಮೊಣಕಾಲಿಗೆ ಗಾಯವಾಗಿದ್ದು, ಬಳಿಕ ಎದ್ದು ನಿಲ್ಲಲು ಸ್ವಲ್ಪ ಕಷ್ಟವಾಯಿತು. ಸದ್ಯ ಗಾಯ ಗಂಭೀರವಾಗಿಲ್ಲ ಎಂದು ಅಮಿತಾಭ್ ಅಭಿಮಾನಿಗಳಿಗೆ ಮಾಹಿತಿ ನೀಡಿದ್ದಾರೆ.
ಅಮಿತಾಭ್ ಬಚ್ಚನ್‌ ಅವರ ಈ ಘಟನೆ ವಯಸ್ಸಾದಂತೆ ಮಂಡಿಯ ಆರೋಗ್ಯದ ಬಗ್ಗೆ ಮತ್ತೊಮ್ಮೆ ಗಮನ ಸೆಳೆಯುವಂತೆ ಮಾಡಿದೆ. ಹಾಗಾದರೆ ವಯಸ್ಸು ಹೆಚ್ಚಾದಂತೆ ನಮ್ಮ ಮೊಣಕಾಲುಗಳಲ್ಲಿ ಏನೆಲ್ಲ ಬದಲಾವಣೆಗಳು ಸಂಭವಿಸುತ್ತವೆ? ಮಂಡಿ ನೋವು ಬಂದರೆ ಅದು ವಯಸ್ಸಿನ ಸಹಜ ಪರಿಣಾಮವೇ?
ನಮ್ಮ ದೇಹದ ಬಹುತೇಕ ಭಾರವನ್ನು ಹೊರುವ ಸಂಧಿಗಳಲ್ಲಿ ಮೊಣಕಾಲು ಪ್ರಮುಖವಾದದ್ದು. ನಡೆಯುವುದು, ಮೆಟ್ಟಿಲು ಹತ್ತುವುದು, ಕುಳಿತುಕೊಳ್ಳುವುದು ಹಾಗೂ ಎದ್ದು ನಿಲ್ಲುವುದು ಸೇರಿದಂತೆ ದಿನನಿತ್ಯದ ಬಹುತೇಕ ಚಟುವಟಿಕೆಗಳಲ್ಲಿ ಮೊಣಕಾಲು ನಿರಂತರವಾಗಿ ಕೆಲಸ ಮಾಡುತ್ತದೆ. ವಯಸ್ಸು ಹೆಚ್ಚಾದಂತೆ ಮೊಣಕಾಲಿನ ಮೂಳೆಗಳ ತುದಿಗಳನ್ನು ರಕ್ಷಿಸುವ ಕಾರ್ಟಿಲೇಜ್‌ನಲ್ಲಿ ಬದಲಾವಣೆಗಳು ಉಂಟಾಗಬಹುದು. ಕಾರ್ಟಿಲೇಜ್‌ ತೆಳುವಾಗುವುದರಿಂದ ಮೂಳೆಗಳ ನಡುವಿನ ಘರ್ಷಣೆ ಹೆಚ್ಚಾಗಿ ನೋವು, ಬಿಗಿತ ಮತ್ತು ಚಲನೆಯ ಸಮಸ್ಯೆ ಕಾಣಿಸಿಕೊಳ್ಳುವ ಸಾಧ್ಯತೆ ಹೆಚ್ಚು ಇರುತ್ತದೆ. ಇದರ ಜೊತೆಗೆ ಮೊಣಕಾಲಿನ ಸುತ್ತಲಿನ ಸ್ನಾಯುಗಳ ಬಲವೂ ವಯಸ್ಸಿನೊಂದಿಗೆ ಕಡಿಮೆಯಾಗಬಹುದು. ಸ್ನಾಯುಗಳು ದುರ್ಬಲವಾದಾಗ ಮೊಣಕಾಲಿಗೆ ಸಿಗುವ ಬೆಂಬಲ ಕಡಿಮೆಯಾಗಬಹುದು.
ವಯಸ್ಸಾದವರಲ್ಲಿ ಸಾಮಾನ್ಯವಾಗಿ ಕಂಡುಬರುವ ಮಂಡಿ ಸಮಸ್ಯೆಗಳಲ್ಲಿ ಆಸ್ಟಿಯೊಆರ್ಥ್ರೈಟಿಸ್‌ ಪ್ರಮುಖವಾಗಿದೆ. ಈ ಸ್ಥಿತಿಯಲ್ಲಿ ಕಾರ್ಟಿಲೇಜ್‌ ಮಾತ್ರವಲ್ಲದೆ ಸಂಧಿಯಲ್ಲಿರುವ ಹಲವು ಅಂಗಾಂಶಗಳಲ್ಲಿ ಬದಲಾವಣೆಗಳು ಸಂಭವಿಸುತ್ತವೆ. ಪರಿಣಾಮವಾಗಿ ಮೊಣಕಾಲಿನಲ್ಲಿ ನೋವು, ಬಿಗಿತ, ಊತ ಹಾಗೂ ಚಲನೆಯ ವ್ಯಾಪ್ತಿ ಕಡಿಮೆಯಾಗಬಹುದು. ಕೆಲವರಿಗೆ ನಡೆಯುವಾಗ, ಮೆಟ್ಟಿಲು ಹತ್ತುವಾಗ ಅಥವಾ ಹೆಚ್ಚು ಸಮಯ ನಿಂತಾಗ ನೋವು ಹೆಚ್ಚಾಗಬಹುದು. ಮೊಣಕಾಲಿನಲ್ಲಿ ಉಜ್ಜುವ ಅಥವಾ ಕಟಕಟ ಎನ್ನುವ ಅನುಭವವೂ ಕೆಲವರಲ್ಲಿ ಕಂಡುಬರಬಹುದು.
ಕುರ್ಚಿಯಲ್ಲಿ ಕುಳಿತ ನಂತರ ಎದ್ದು ನಿಲ್ಲುವುದು ಸಾಮಾನ್ಯ ಚಟುವಟಿಕೆಯಾದರೂ, ಇದಕ್ಕೆ ಮೊಣಕಾಲು, ಸೊಂಟ ಹಾಗೂ ಸುತ್ತಲಿನ ಸ್ನಾಯುಗಳ ಸಮನ್ವಯ ಅಗತ್ಯ. ಮೊಣಕಾಲಿನಲ್ಲಿ ನೋವು ಅಥವಾ ಬಿಗಿತವಿದ್ದರೆ, ಸುತ್ತಲಿನ ಸ್ನಾಯುಗಳು ದುರ್ಬಲವಾಗಿದ್ದರೆ ಅಥವಾ ಗಾಯವಾಗಿದ್ದರೆ ಕುಳಿತಲ್ಲಿಂದ ಎದ್ದು ನಿಲ್ಲುವುದು ಕಷ್ಟವಾಗಬಹುದು. ಆದರೆ ಗಾಯವಾದ ನಂತರ ಎದ್ದು ನಿಲ್ಲಲು ಕಷ್ಟವಾಗುವುದನ್ನು ಮಾತ್ರ ವಯಸ್ಸಿನ ಪರಿಣಾಮ ಅಥವಾ ಆಸ್ಟಿಯೊಆರ್ಥ್ರೈಟಿಸ್‌ ಎಂದು ಪರಿಗಣಿಸಬಾರದು. ಅಮಿತಾಭ್ ಬಚ್ಚನ್‌ ಅವರ ಶೂಟಿಂಗ್ ಸಮಯದಲ್ಲಿ ಕಾಲಿ ಜಾರಿ ಬಿದ್ದಾಗ ಉಂಟಾದ ಮಂಡಿ ಗಾಯದ ನಂತರ ಅವರಿಗೆ ಮಂಡಿ ನೋವು ಕಾಣಿಸಿಕೊಂಡಿದೆ.
ಕಾರ್ಟಿಲೇಜ್‌ ಮೂಳೆಗಳ ತುದಿಗಳನ್ನು ಆವರಿಸುವ ಮೃದುವಾದ ಅಂಗಾಂಶವಾಗಿದ್ದು, ಮೂಳೆಗಳು ಪರಸ್ಪರ ಸರಾಗವಾಗಿ ಚಲಿಸಲು ಸಹಾಯ ಮಾಡುತ್ತದೆ. ವಯಸ್ಸು ಹೆಚ್ಚಾದಂತೆ ಅಥವಾ ಆಸ್ಟಿಯೊಆರ್ಥ್ರೈಟಿಸ್‌ ಉಂಟಾದಾಗ ಕಾರ್ಟಿಲೇಜ್‌ ಸೇರಿದಂತೆ ಸಂಧಿಯ ಹಲವು ಅಂಗಾಂಶಗಳಲ್ಲಿ ಬದಲಾವಣೆಗಳು ಉಂಟಾಗಬಹುದು. ಇದರಿಂದ ಮೊಣಕಾಲಿನಲ್ಲಿ ನೋವು ಮತ್ತು ಬಿಗಿತ ಉಂಟಾಗುವುದರ ಜತೆಗೆ ಚಲನೆ ಸೀಮಿತವಾಗಬಹುದು. ಕೆಲವು ಸಂದರ್ಭಗಳಲ್ಲಿ ಸಂಧಿಯ ಸುತ್ತಲೂ ಮೂಳೆಯ ಹೆಚ್ಚುವರಿ ಬೆಳವಣಿಗೆಗಳು ಕೂಡ ಕಾಣಿಸಿಕೊಳ್ಳಬಹುದು. ಆದರೆ ಆಸ್ಟಿಯೊಆರ್ಥ್ರೈಟಿಸ್‌ ಎಂದರೆ ಕೇವಲ ಮಂಡಿ ಸವೆದುಹೋಗುವುದು ಎಂದರ್ಥವಲ್ಲ. ಇದು ಸಂಧಿಯಲ್ಲಿರುವ ಹಲವು ಅಂಗಾಂಶಗಳಲ್ಲಿ ಬದಲಾವಣೆ ಉಂಟಾಗುವ ಸ್ಥಿತಿಯಾಗಿದೆ.
ವಯಸ್ಸು ಹೆಚ್ಚಾದಂತೆ ಆಸ್ಟಿಯೊಆರ್ಥ್ರೈಟಿಸ್‌ನ ಸಾಧ್ಯತೆ ಹೆಚ್ಚಾಗಬಹುದು. ಆದರೆ ಮಂಡಿ ಸಮಸ್ಯೆಗೆ ವಯಸ್ಸು ಮಾತ್ರ ಕಾರಣವಲ್ಲ. ಹಿಂದಿನ ಮಂಡಿ ಗಾಯ ಅಥವಾ ಶಸ್ತ್ರಚಿಕಿತ್ಸೆ, ಅಧಿಕ ದೇಹತೂಕ, ಮಂಡಿಯ ಮೇಲೆ ನಿರಂತರ ಒತ್ತಡ ಹಾಗೂ ಕುಟುಂಬದ ಇತಿಹಾಸ ಕೂಡ ಅಪಾಯವನ್ನು ಹೆಚ್ಚಿಸಬಹುದು. ಹೀಗಾಗಿ ಯುವಕರಿಗೂ, ವಿಶೇಷವಾಗಿ ಹಿಂದಿನ ಗಂಭೀರ ಮಂಡಿ ಗಾಯದ ನಂತರ, ಆಸ್ಟಿಯೊಆರ್ಥ್ರೈಟಿಸ್‌ ಕಾಣಿಸಿಕೊಳ್ಳುವ ಸಾಧ್ಯತೆ ಇದೆ.
ನಿಯಮಿತ ದೈಹಿಕ ಚಟುವಟಿಕೆ ಸ್ನಾಯುಗಳ ಬಲ, ಚಲನಶೀಲತೆ, ಸಮತೋಲನ ಹಾಗೂ ದೈನಂದಿನ ಚಟುವಟಿಕೆಗಳನ್ನು ಸುಲಭವಾಗಿ ನಿರ್ವಹಿಸುವ ಸಾಮರ್ಥ್ಯವನ್ನು ಕಾಪಾಡಿಕೊಳ್ಳಲು ಸಹಾಯ ಮಾಡಬಹುದು. ಕೆಲವರಿಗೆ ವಾಕಿಂಗ್‌, ಈಜು ಮತ್ತು ಸೈಕ್ಲಿಂಗ್‌ನಂತಹ ಕಡಿಮೆ ಒತ್ತಡದ ಚಟುವಟಿಕೆಗಳು ಮಂಡಿಗೆ ಅನುಕೂಲಕರವಾಗಿರಬಹುದು. ಕಾಲು ಮತ್ತು ಸೊಂಟದ ಸುತ್ತಲಿನ ಸ್ನಾಯುಗಳನ್ನು ಬಲಪಡಿಸುವ ವ್ಯಾಯಾಮಗಳೂ ಸಹಾಯಕವಾಗಬಹುದು. ಆದರೆ ಎಲ್ಲರೂ ಒಂದೇ ರೀತಿಯ ವ್ಯಾಯಾಮ ಮಾಡುವುದು ಸೂಕ್ತವಲ್ಲ. ವಯಸ್ಸು, ದೈಹಿಕ ಸಾಮರ್ಥ್ಯ, ಹಿಂದಿನ ಗಾಯಗಳು ಮತ್ತು ಆರೋಗ್ಯ ಸ್ಥಿತಿಗೆ ಅನುಗುಣವಾಗಿ ವ್ಯಾಯಾಮದ ವಿಧಾನವನ್ನು ಆಯ್ಕೆ ಮಾಡಬೇಕು.
ಒಮ್ಮೊಮ್ಮೆ ಹೆಚ್ಚಿನ ದೈಹಿಕ ಚಟುವಟಿಕೆಯ ನಂತರ ಮಂಡಿಯಲ್ಲಿ ನೋವು ಕಾಣಿಸಿಕೊಳ್ಳಬಹುದು. ಆದರೆ ನೋವು ಪದೇಪದೆ ಕಾಣಿಸಿಕೊಂಡರೆ ಅಥವಾ ನಿರಂತರವಾಗಿದ್ದರೆ ವೈದ್ಯರ ಸಲಹೆ ಪಡೆಯುವುದು ಸೂಕ್ತ. ನಿರಂತರ ಮಂಡಿ ನೋವು, ಊತ, ಬಿಗಿತ, ಚಲನೆ ಕಡಿಮೆಯಾಗುವುದು, ಮೊಣಕಾಲು ಅಸ್ಥಿರವಾಗುವುದು ಅನುಭವ ಕಂಡುಬಂದರೆ ನಿರ್ಲಕ್ಷಿಸಬೇಡಿ. ಗಾಯದ ನಂತರ ಕಾಲಿನ ಮೇಲೆ ಭಾರ ಹಾಕಲು ಸಾಧ್ಯವಾಗದಿದ್ದರೆ, ಹೆಚ್ಚು ಊತ ಕಂಡುಬಂದರೆ ಅಥವಾ ಮೊಣಕಾಲನ್ನು ಸಾಮಾನ್ಯವಾಗಿ ಚಲಿಸಲು ಸಾಧ್ಯವಾಗದಿದ್ದರೆ ವೈದ್ಯಕೀಯ ಪರೀಕ್ಷೆ ಅಗತ್ಯವಾಗಬಹುದು.
ನಿತ್ಯವೂ ದೈಹಿಕವಾಗಿ ಸಕ್ರಿಯವಾಗಿರುವುದು ಮುಖ್ಯ. ಕಾಲು ಮತ್ತು ಸೊಂಟದ ಸ್ನಾಯುಗಳನ್ನು ಬಲಪಡಿಸುವ ವ್ಯಾಯಾಮಗಳನ್ನು ಸೂಕ್ತ ರೀತಿಯಲ್ಲಿ ಮಾಡಿ. ಆರೋಗ್ಯಕರ ದೇಹತೂಕವನ್ನು ಕಾಪಾಡಿಕೊಳ್ಳಲು ಪ್ರಯತ್ನಿಸಿ. ವ್ಯಾಯಾಮ ಆರಂಭಿಸುವ ಮುನ್ನ ದೇಹವನ್ನು ನಿಧಾನವಾಗಿ ಸಿದ್ಧಪಡಿಸಿಕೊಳ್ಳಿ. ತೀವ್ರ ನೋವು ಕಾಣಿಸಿಕೊಂಡಾಗ ಅದನ್ನು ನಿರ್ಲಕ್ಷಿಸಿ ವ್ಯಾಯಾಮ ಮುಂದುವರಿಸಬೇಡಿ. ವಯಸ್ಸು ಮತ್ತು ದೈಹಿಕ ಸಾಮರ್ಥ್ಯಕ್ಕೆ ಅನುಗುಣವಾಗಿ ವ್ಯಾಯಾಮದ ತೀವ್ರತೆಯನ್ನು ಬದಲಾಯಿಸಿಕೊಳ್ಳಿ.
ಅಮಿತಾಭ್ ಬಚ್ಚನ್‌ ಅವರ ಮಂಡಿ ಗಾಯವು ವಯಸ್ಸಾದಂತೆ ಚಲನಶೀಲತೆಯನ್ನು ಕಾಪಾಡಿಕೊಳ್ಳುವುದು ಎಷ್ಟು ಮುಖ್ಯ ಎಂಬುದನ್ನು ನೆನಪಿಸುತ್ತದೆ. ಆದರೆ, ಗಾಯದ ನಂತರ ಎದ್ದು ನಿಲ್ಲಲು ಕಷ್ಟವಾಗುವುದನ್ನು ಮಾತ್ರ ವಯಸ್ಸಿನ ಪರಿಣಾಮ ಎಂದು ನಿರ್ಧರಿಸಲು ಸಾಧ್ಯವಿಲ್ಲ. ಮಂಡಿಯ ಆರೋಗ್ಯಕ್ಕಾಗಿ ನಿಯಮಿತ ಚಟುವಟಿಕೆ, ಸೂಕ್ತ ಸ್ನಾಯುಬಲ, ಆರೋಗ್ಯಕರ ದೇಹತೂಕ ಮತ್ತು ನಿರಂತರ ಸಮಸ್ಯೆಗಳಿಗೆ ಸಮಯಕ್ಕೆ ಸರಿಯಾಗಿ ವೈದ್ಯಕೀಯ ಸಲಹೆ ಪಡೆಯುವುದು ಮುಖ್ಯ. ಮಂಡಿ ನೋವು ನಿಮ್ಮ ದಿನನಿತ್ಯದ ಚಟುವಟಿಕೆಗಳಿಗೆ ಅಡ್ಡಿಯಾಗುತ್ತಿದ್ದರೆ, ಅದನ್ನು ಸಹಜ ಎಂದು ನಿರ್ಲಕ್ಷಿಸದೆ ವೈದ್ಯರನ್ನು ಸಂಪರ್ಕಿಸಿ.