ವಿಜಯವಾಣಿ ಸುದ್ದಿಜಾಲ ಬೆಂಗಳೂರು:
"ಮೆಜೆಸ್ಟಿಕ್' ಚಿತ್ರದ "ದಾಸ' ಪಾತ್ರದ ಮೂಲಕ ದರ್ಶನ್ 2002ರಲ್ಲಿ ಕನ್ನಡ ಚಿತ್ರರಂಗಕ್ಕೆ ನಾಯಕನಾಗಿ ಪದಾರ್ಪಣೆ ಮಾಡಿದ್ದರು. ಇದೀಗ 22 ವರ್ಷಗಳ ನಂತರ ನಿರ್ಮಾಪಕ, ವಿತರಕ ಶಿಲ್ಪಾ ಶ್ರೀನಿವಾಸ್ ಪುತ್ರ "ಮರಿದಾಸ'ನಾಗಿ "ಮೆಜೆಸ್ಟಿಕ್ 2' ಚಿತ್ರದ ಮೂಲಕ ಚಿತ್ರರಂಗಕ್ಕೆ ಎಂಟ್ರಿ ಕೊಡುತ್ತಿದ್ದಾರೆ. ಇತ್ತೀಚೆಗಷ್ಟೆ ಚಿತ್ರದ ಮುಹೂರ್ತ ನೆರವೇರಿಸಲಾಗಿದೆ. ಅಂದು "ಮೆಜೆಸ್ಟಿಕ್'ಗೆ ಕಥೆ ಬರೆದಿದ್ದ ರಾಮು ಇದೀಗ, ಇಂದಿನ ಮೆಜೆಸ್ಟಿಕ್ ಕಥೆಯೊಂದಿಗೆ ಸೀಕ್ವಲ್ಗೆ ಆ್ಯಕ್ಷನ್-ಕಟ್ ಹೇಳುತ್ತಿದ್ದಾರೆ.
"ನಿರ್ದೇಶಕ ಪಿ.ಎನ್. ಸತ್ಯ ಮತ್ತು "ಜೋಗಿ' ಪ್ರೇಮ್ ಜತೆ ಕೆಲಸ ಮಾಡಿದ್ದೆ. ನಾನು ಬೆಂಗಳೂರಿಗೆ ಬಂದಾಗ ಮೆಜೆಸ್ಟಿಕ್ನಲ್ಲಿ ಏನೆಲ್ಲಾ ಚಟುವಟಿಕೆಗಳು ನಡೆಯುತ್ತಿದ್ದವು ಎಂಬುದನ್ನು ಕಣ್ಣಾರೆ ನೋಡಿ "ಮೆಜೆಸ್ಟಿಕ್' ಕಥೆ ಬರೆದಿದ್ದೆ. ಈಗಿನ ರೌಡಿಸಂ ಹೇಗಿದೆ ಅಂತ ಈ ಸೀಕ್ವಲ್ನಲ್ಲಿ ಹೇಳಲಿದ್ದೇನೆ. ಇದು ರೌಡಿಸಂ ಮತ್ತು ಆ್ಯಕ್ಷನ್ ಕಥೆ. ಮೊದಲ ಚಿತ್ರಕ್ಕಿಂತ ಹತ್ತು ಪಟ್ಟು ಹೆಚ್ಚು ವಿಷಯ ಈ ಚಿತ್ರದಲ್ಲಿರಲಿದೆ' ಎಂದು ಮಾಹಿತಿ ನೀಡಿದರು ನಿರ್ದೇಶಕ ರಾಮು.
ನಾಯಕ ಭರತ್, "ನಮ್ಮ ಚಿತ್ರದ ಪ್ರಮುಖ ಆಕರ್ಷಣೆಯೇ ಟೈಟಲ್. ಪಾತ್ರಕ್ಕಾಗಿ ತುಂಬ ಸಿದ್ಧತೆ ಮಾಡಿಕೊಂಡಿದ್ದೇನೆ' ಎಂದರು. ಭರತ್ಗೆ ಸಂಹಿತಾ ವಿನ್ಯಾ ನಾಯಕಿಯಾಗಿದ್ದು, ನಾಯಕನ ತಾಯಿಯ ಪಾತ್ರದಲ್ಲಿ ಶ್ರುತಿ ನಟಿಸಲಿದ್ದಾರೆ. ಚಿತ್ರಕ್ಕೆ ವಿನು ಮನಸು ಸಂಗೀತ, ವೀನಸ್ ಪೂರ್ತಿ ಛಾಯಾಗ್ರಹಣ ಇರಲಿದೆ.