Arundhati : ಟಾಲಿವುಡ್ ಸ್ಟಾರ್ ಹೀರೋಯಿನ್ ಅನುಷ್ಕಾ ಶೆಟ್ಟಿ ನಟನೆಯ ಲೇಡಿ ಓರಿಯೆಂಟೆಡ್ ಬ್ಲಾಕ್ ಬಸ್ಟರ್ ಸಿನಿಮಾ ಯಾವುದು ಎಂದು ಸಿನಿ ರಸಿಕರನ್ನು ಪ್ರಶ್ನೆ ಮಾಡಿದರೆ ಥಟ್ಟನೆ ‘ಅರುಂಧತಿ’ ಎಂದು ಹೇಳುತ್ತಾರೆ. ಎಲ್ಲಾ ಭಾಷಿಗರು ಸಿನಿಮಾವನ್ನು ನೋಡಿ, ಹಾಡಿ ಹೊಗಳಿದ್ದಾರೆ. ಈ ಚಿತ್ರವನ್ನು ಖ್ಯಾತ ನಿರ್ದೇಶಕ ಕೋಡಿ ರಾಮಕೃಷ್ಣ ನಿರ್ದೇಶನ ಮಾಡಿದರು. 2009ರಲ್ಲಿ ಬಿಡುಗಡೆಯಾದ ಈ ಸಿನಿಮಾ ಭರ್ಜರಿ ಕಲೆಕ್ಷನ್ ಮಾಡಿ, ಬಾಕ್ಸ್ಆಫೀಸ್ನಲ್ಲಿ ಧೂಳೆಬ್ಬಿಸಿತು. ಈ ಸಿನಿಮಾ ಅನುಷ್ಕಾ ಶೆಟ್ಟಿ ವೃತ್ತಿ ಬದುಕಿಗೆ ಮಹತ್ವದ ತಿರುವು ನೀಡಿತು ಎನ್ನಬಹುದು.
ಇನ್ನೂ ಈ ಚಿತ್ರದಲ್ಲಿ ನಟ ಸೋನು ಸೂದ್, ಅರ್ಜುನ್ ಬಾಜ್ವಾ ಮತ್ತು ಶಾಯಾಜಿ ಶಿಂಧೆ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಅದರಲ್ಲೂ ಪಶುಪತಿಯಾಗಿ ಸೋನು ಸೂದ್ ಮತ್ತು ಜೇಜಮ್ಮಳಾಗಿ ಅನುಷ್ಕಾ ಈ ಸಿನಿಮಾದ ಹೈಲೈಟ್ಸ್. ಮೇಲಾಗಿ ಅನುಷ್ಕಾ ಅಭಿನಯಕ್ಕೆ ಪ್ರೇಕ್ಷಕರಿಂದ ಒಳ್ಳೆ ಮಾರ್ಕ್ಸ್ ಸಿಕ್ಕಿದೆ. ಈ ಚಿತ್ರ ತೆರೆ ಮೇಲೆ ಬಿಡುಗಡೆಯಾದಾಗಲೆಲ್ಲ ಅತ್ಯುತ್ತಮ ರೇಟಿಂಗ್ ಹಾಗೂ ರೆಸ್ಪಾನ್ಸ್ ಪಡೆಯುತ್ತಿರುವುದು ಗೊತ್ತೇ ಇದೆ. ಅಂದಹಾಗೆ ಅರುಂಧತಿ ಚಿತ್ರದಲ್ಲಿ ಅನುಷ್ಕಾ ಅವರ ಬಾಲ್ಯದ ಪಾತ್ರ ಎಲ್ಲರಿಗೂ ನೆನಪಿರುತ್ತದೆ. ಆ ಬಾಲ ನಟಿ ಈಗ ಬೆಳೆದು ದೊಡ್ಡವಳಾಗಿದ್ದು, ಮದುವೆಗೆ ತಯಾರಿ ನಡೆಸುತ್ತಿದ್ದಾರೆ.
ಅರುಂಧತಿ ಸಿನಿಮಾ ನೋಡಿದವರು ಅನುಷ್ಕಾ ಅವರ ಬಾಲ್ಯದ ಪಾತ್ರವನ್ನು ಮರೆಯುವುದಿಲ್ಲ. ಬಾಲನಟಿ ತುಂಬಾ ಅದ್ಭುತವಾಗಿ ನಟನೆ ಮಾಡಿದರು. ಹೀಗಾಗಿಯೇ ಆ ಚಿತ್ರದಲ್ಲಿನ ಅಭಿನಯಕ್ಕಾಗಿ ಉತ್ತಮ ಪ್ರಶಂಸೆಯೂ ಸಿಕ್ಕಿತು. ಅಷ್ಟಕ್ಕೂ ಆ ಬಾಲ ಕಲಾವಿದೆಯ ಹೆಸರು ಏನು ಅಂದರೆ ‘ದಿವ್ಯಾ ಗಣೇಶ್’. ದಿವ್ಯಾ ಇದೀಗ ಮದುವೆಗೆ ಸಜ್ಜಾಗಿದ್ದು, ಪ್ರಸ್ತುತ ತಮ್ಮ ಸ್ನೇಹಿತರೊಂದಿಗೆ ಬ್ಯಾಚುಲರ್ ಪಾರ್ಟಿ ಮಾಡುತ್ತಿದ್ದಾರೆ. ಹಾಗಾದರೆ ಮದುವೆ ಯಾವಾಗ? ಯಾರನ್ನು ಮದುವೆಯಾಗಲಿದ್ದಾರೆ ಎಂಬುದನ್ನು ನಾವೀಗ ತಿಳಿದುಕೊಳ್ಳೋಣ.
ತೆಲುಗು-ತಮಿಳು ಮೂಲದ ಕುಟುಂಬಕ್ಕೆ ಸೇರಿದ ದಿವ್ಯಾ ನಾಗೇಶ್, ಪ್ರಸ್ತುತ ನರ್ತಕಿ ಮತ್ತು ರೂಪದರ್ಶಿಯಾಗಿದ್ದಾರೆ. ಅಲ್ಲದೆ, ನಟಿಯಾಗಿ ಅವಕಾಶಗಳನ್ನು ಹುಡುಕುತ್ತಿದ್ದಾರೆ. ಕಳೆದ ಐದು ವರ್ಷಗಳಿಂದ ತಮ್ಮ ಸಹನಟ ಮತ್ತು ನೃತ್ಯ ಸಂಯೋಜಕ ಅಜಯ್ ಕುಮಾರ್ ಅವರನ್ನು ಪ್ರೀತಿಸುತ್ತಿದ್ದ ದಿವ್ಯಾ, ಈ ವರ್ಷದ ಜನವರಿಯಲ್ಲಿ ನಿಶ್ಚಿತಾರ್ಥ ಮಾಡಿಕೊಂಡರು. ಇನ್ನು 8 ದಿನಗಳಲ್ಲಿ, ಅಂದರೆ ಆಗಸ್ಟ್ 18 ರಂದು ವಿವಾಹವಾಗಲಿದ್ದಾರೆ.
ಈ ಸಂದರ್ಭದಲ್ಲಿ, ದಿವ್ಯಾ ಮದುವೆಯ ಫೋಟೋಶೂಟ್ಗಳಲ್ಲಿ ಬಿಜಿಯಾಗಿದ್ದಾರೆ. ಅವರು ತಮ್ಮ ಲೇಡಿ ಫ್ರೆಂಡ್ಸ್ ಜೊತೆ ಬ್ಯಾಚುಲರ್ ಪಾರ್ಟಿ ಕೂಡ ಮಾಡಿದ್ದಾರೆ. ಅದಕ್ಕೆ ಸಂಬಂಧಿಸಿದ ಕೆಲವು ಫೋಟೋಗಳನ್ನು ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ಫೋಟೋ ವೈರಲ್ ಆಗಿದ್ದು, ಅಭಿಮಾನಿಗಳು ಹಾಗೂ ಚಿತ್ರರಂಗದವರು ಶುಭ ಹಾರೈಸುತ್ತಿದ್ದಾರೆ. 'ಅರುಂಧತಿ' ಚಿತ್ರದಲ್ಲಿ ಪಾತ್ರ ನಿರ್ವಹಿಸಿದ ಬಾಲನಟಿ ಇದೀಗ ಮದುವೆಯಾಗುತ್ತಿದ್ದಾರೆ. ಆದರೆ, ಅದೇ ಚಿತ್ರದಲ್ಲಿ ಪಾತ್ರ ನಿರ್ವಹಿಸಿದ ಅನುಷ್ಕಾ ಇನ್ನೂ ಒಂಟಿಯಾಗಿದ್ದಾರೆ. ಅನುಷ್ಕಾ ಮದುವೆಯಾಗುತ್ತಾರೋ? ಇಲ್ಲವೋ? ಕಾದು ನೋಡಬೇಕಿದೆ. (ಏಜೆನ್ಸೀಸ್)