Allu Arjun Shares Heartwarming Moment With Young Leukaemia Patient
- ಮಾರಕ ಕಾಯಿಲೆಯಿಂದ ಬಳಲುತ್ತಿರುವ ಪುಟ್ಟ ಬಾಲಕಿ ಜೊತೆ ಮಾತನಾಡಿದ ಸ್ಟೈಲಿಶ್ ಸ್ಟಾರ್
- ಪುಷ್ಪ ಡೈಲಾಗ್ ಹೇಳಿಸಿ ನಕ್ಕು ನಗಾಡಿದ ಟಾಲಿವುಡ್ ಐಕಾನ್ ಅಲ್ಲು ಅರ್ಜುನ್
- ಹೈದರಾಬಾದ್ಗೆ ಬಂದು ಅಲ್ಲು ಅರ್ಜುನ್ರನ್ನು ಭೇಟಿಯಾಗಲು ಮನವಿ
ಹೈದರಾಬಾದ್: ಇತ್ತೀಚೆಗೆ ಆಂಧ್ರ ಡಿಸಿಎಂ ಮತ್ತು ನಟ ಪವನ್ ಕಲ್ಯಾಣ್ ಅವರು ಅಪರೂಪದ ಕಾಯಿಲೆಯಿಂದ ಬಳಲುತ್ತಿದ್ದ ತಮ್ಮ ಅಭಿಮಾನಿಯನ್ನು ಭೇಟಿ ಮಾಡಿ, ಮಾತನಾಡಿ ಆತನ ಜೊತೆಗೆ ಸಮಯ ಕಳೆದಿರುವ ಫೋಟೋ, ವಿಡಿಯೋಗಳು ವೈರಲ್ ಆಗಿತ್ತು. ಅವರ ಮಾನವೀಯತೆ ಬಗ್ಗೆ ಫ್ಯಾನ್ಸ್ ಕೊಂಡಾಡಿದ್ದರು. ಸದ್ಯ ನಟ ಅಲ್ಲು ಅರ್ಜುನ್ ಅವರು ಸಹ ಲ್ಯುಕೇಮಿಯಾದಿಂದ ಬಳಲುತ್ತಿರುವ ಪುಟ್ಟ ಅಭಿಮಾನಿ ಜೊತೆ ಮಾತನಾಡಿ ಮನಗೆದ್ದಿದ್ದಾರೆ.
ಅಪರೂಪದ ಹಾಗೂ ಮಾರಕ ಕಾಯಿಲೆಯಿಂದ ಬಳಲುತ್ತಿರುವ ಮಕ್ಕಳ ಆಸೆಯನ್ನು ಈಡೇರಿಸುವ ನಿಟ್ಟಿನಲ್ಲಿ, ಮೇಕ್ ಆ ವಿಶ್ ಫೌಂಡೇಶನ್ ಕೆಲಸ ಮಾಡುತ್ತಿದೆ, ಅದರಂತೆ ಗಂಭೀರ ಕಾಯಿಲೆಯಿಂದ ಬಳಲುತ್ತಿರುವ ಬಾಲಕಿ ಶ್ರದ್ಧಾಗೆ ಟಾಲಿವುಡ್ ಸ್ಟಾರ್ ಅಲ್ಲು ಅರ್ಜುನ್ರೊಂದಿಗೆ ಮಾತನಾಡುವ ಆಸೆ ಇತ್ತಂತೆ. ಈ ಹಿನ್ನೆಲೆ ಸಂಸ್ಥೆ ನಟನೊಂದಿಗೆ ಸಂಪರ್ಕಿಸಿ, ಪುಟ್ಟ ಬಾಲಕಿಯ ಇಚ್ಛೆಯನ್ನು ಈಡೇರಿಸುವ ಕೆಲಸ ಮಾಡಿದೆ.
ಅಲ್ಲು ಅರ್ಜುನ್ ಟೀಂ ಪೋಸ್ಟ್
ಅಲ್ಲು ಅರ್ಜುನ್ ಅವರು ಮಗುವಿನೊಂದಿಗೆ ಮಾತನಾಡಿದ ವಿಡಿಯೋವನ್ನು ಎಕ್ಸ್ನಲ್ಲಿ ಅಲ್ಲು ಅರ್ಜುನ್ ಟೀಂ ಎಂಬ ಖಾತೆಯಿಂದ ಪೋಸ್ಟ್ ಹಂಚಿಕೊಳ್ಳಲಾಗಿದೆ. ಸಿನಿಮಾ ಮೀರಿ ನಗುವನ್ನು ಹರಡುವುದು ಐಕಾನ್ ಸ್ಟಾರ್ ಅಲ್ಲು ಅರ್ಜುನ್ ಅವರ ಕಾರ್ಯ. ಮೇಕ್-ಎ-ವಿಶ್ ಫೌಂಡೇಶನ್ ಮೂಲಕ ಶ್ರದ್ಧಾ ಅವರೊಂದಿಗೆ ಸಂವಹನ ನಡೆಸಿ, ಆ ಚಿಕ್ಕ ಹುಡುಗಿಗೆ ಮರೆಯಲಾಗದ ಕ್ಷಣವನ್ನು ಸೃಷ್ಟಿಸಿದರು. ಇದು ಅವರ ನಿಜವಾದ ಸಹಾನುಭೂತಿಯನ್ನು ಪ್ರತಿಬಿಂಬಿಸುವ ಸನ್ನೆಯಾಗಿದೆ ಎಂದು ಅವರ ಅಭಿಮಾನಿಗಳು ಬರೆದುಕೊಂಡಿದ್ದಾರೆ.
ವಿಡಿಯೋದಲ್ಲಿ ಏನಿದೆ?
ಹಾಯ್ ಶ್ರದ್ಧಾ ಹೇಗಿದ್ದೀಯಾ ಎಂದು ಕೇಳಿದ ನಟ ಅಲ್ಲು ಅರ್ಜುನ್ ಪ್ರಶ್ನೆಗೆ ಆಕೆ ಚೆನ್ನಾಗಿದ್ದೀನಿ ಎನ್ನುತ್ತಾಳೆ. ಪುಷ್ಪಾ ಸಿನಿಮಾದ ಫೈರ್ ಡೈಲಾಗ್ ಕೇಳುತ್ತಾರೆ. ಆಗ ಆಕೆ ಪುಷ್ಪಾ ಹೆಸರು ಕೇಳು ಹೂ ಎಂದುಕೊಂಡ್ರಾ? ಹೂ ಅಲ್ಲ ಪುಷ್ಪಾ ಅಂದ್ರೆ ಫೈರ್ ಎಂದು ಹೇಳುತ್ತಾಳೆ. ಹೈದರಾಬಾದ್ಗೆ ಬಂದ್ರೆ ನನ್ನನ್ನು ಭೇಟಿಯಾಗುವಂತೆ ಅಲ್ಲು ಅರ್ಜುನ್ ಕೇಳಿಕೊಂಡರು. ಆಕೆ ತಾನು ವೈದ್ಯೆಯಾಗಬೇಕು ಎನ್ನುವುದನ್ನು ವ್ಯಕ್ತಪಡಿಸಿದಳು. ನಂತರ ಅಲ್ಲೇ ಇದ್ದ ಆಕೆಯ ಪೋಷಕರ ಬಳಿ ಮಾತನಾಡಿಸಿ, ಸೂಕ್ತ ಚಿಕಿತ್ಸೆ ಕೊಡಿಸಿ ಎಂದು ಮನವಿ ಮಾಡಿಕೊಂಡರು.
ಅಲ್ಲು ಅರ್ಜುನ್ಗೆ ಸಮನ್ಸ್ ಜಾರಿ
ಪುಷ್ಪಾ ಸಿನಿಮಾ ರಿಲೀಸ್ ವೇಳೆ ಸಂಧ್ಯಾ ಚಿತ್ರಮಂದಿರದಲ್ಲಿ ನಡೆದ ಕಾಲ್ತುಳಿತ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸೋಮವಾರ ಕೋರ್ಟ್ಗೆ ಹಾಜರಾಗುವಂತೆ ಸಮನ್ಸ್ ಜಾರಿ ಮಾಡಿದೆ. ಈ ಪ್ರಕರಣದಡಿ 23 ಆರೋಪಿಗಳಿಗೆ ಸಮನ್ಸ್ ಜಾರಿಯಾಗಿದೆ. ಪೊಲೀಸರು ನಟನನ್ನು ಆರೋಪಿ ಸಂಖ್ಯೆ 11 (A11) ಎಂದು ಪಟ್ಟಿ ಮಾಡಿದ್ದಾರೆ.
2024ರಲ್ಲಿ ಸಂಧ್ಯಾ ಚಿತ್ರಮಂದಿರದಲ್ಲಿ ನಡೆದ ಕಾಲ್ತುಳಿತದಲ್ಲಿ ಒಬ್ಬ ಮಹಿಳೆ ಸಾವನ್ನಪ್ಪಿದ್ದರು. ಆಕೆಯ ಮತ್ತು 8 ವರ್ಷದ ಮಗು ಗಂಭೀರ ಸ್ಥಿತಿಯಲ್ಲಿ ಆಸ್ಪತ್ರೆಗೆ ದಾಖಲಾದ ನಂತರ, ಅರ್ಜುನ್ ಅವರನ್ನು ಪೊಲೀಸರು ಬಂಧಿಸಿದರು. ಜಾಮೀನಿನ ಮೇಲೆ ಹೊರಬಂದಿದ್ದರು, (ಏಜೆನ್ಸೀಸ್).