ಬೆಂಗಳೂರು: ಶೂಟಿಂಗ್ ಹಂತದಲ್ಲಿಯೇ ‘ರಾಕಿಂಗ್ ಸ್ಟಾರ್’ ಯಶ್ ನಟನೆಯ ‘ಕೆಜಿಎಫ್: ಚಾಪ್ಟರ್ 2’ ಸಿನಿಮಾ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡುತ್ತಿದೆ. ಅದ್ಯಾವ ಮಟ್ಟಿಗೆ ಎಂದರೆ, ಬಾಲಿವುಡ್ನ ಸ್ಟಾರ್ ನಟರ ಸಿನಿಮಾಗಳಿಗೆ ‘ಕೆಜಿಎಫ್’ ಟಕ್ಕರ್ ಕೊಡುತ್ತಿದೆ!
ಕನ್ನಡದಲ್ಲಿ ಸದ್ದು ಮಾಡಿದ್ದ ‘ಕೆಜಿಎಫ್’ ಬಾಲಿವುಡ್ನಲ್ಲೂ ಅದೇ ಮಟ್ಟಿಗಿನ ಹವಾ ಇಟ್ಟುಕೊಂಡಿತ್ತು. ಅದರ ಪರಿಣಾಮ ‘..ಚಾಪ್ಟರ್ 2’ ಮೇಲೆ ನಿರೀಕ್ಷೆಗಳು ದುಪ್ಪಟ್ಟಾಗಿವೆ. ಅದಕ್ಕೆ ಉತ್ತರ ಎಂಬಂತೆ ಓರ್ವ್ಯಾಕ್ಸ್ ಮೀಡಿಯಾ ಸಂಸ್ಥೆ, ಸರ್ವೆ ನಡೆಸಿ ಅದರ ವರದಿಯೊಂದನ್ನು ತನ್ನ ಅಧಿಕೃತ ಟ್ವಿಟರ್ ಖಾತೆಯಲ್ಲಿ ಪೋಸ್ಟ್ ಮಾಡಿದೆ. 2020ರ ಟಾಪ್-5 ಬಹುನಿರೀಕ್ಷಿತ ಬಾಲಿವುಡ್ ಸಿನಿಮಾಗಳ ಪಟ್ಟಿ ಬಿಡುಗಡೆ ಮಾಡಿದ್ದು, ಅದರಲ್ಲಿ ಕನ್ನಡದ ‘ಕೆಜಿಎಫ್: ಚಾಪ್ಟರ್ 2’ ಮೊದಲ ಸ್ಥಾನದಲ್ಲಿದೆ.
ಅಜಯ್ ದೇವಗನ್, ಅರ್ಶದ್ ವಾರ್ಸಿ, ತುಷಾರ್ ಕಪೂರ್ ಮುಂತಾದವರು ಇರುವ ಬಹುತಾರಾಗಣದ ‘ಗೋಲ್ವಾಲ್ 5’, ರಣಬೀರ್ ಕಪೂರ್, ಆಲಿಯಾ ಭಟ್ ನಟಿಸುತ್ತಿರುವ ‘ಬ್ರಹ್ಮಾಸ್ತ್ರ’, ಅಕ್ಷಯ್ ಕುಮಾರ್ ಅಭಿನಯದ ‘ಸೂರ್ಯವಂಶಿ’ ಮತ್ತು ರಣವೀರ್ ಸಿಂಗ್ ಕ್ರಿಕೆಟರ್ ಆಗಿ ಕಾಣಿಸಿಕೊಂಡಿರುವ ‘83’ ಕ್ರಮವಾಗಿ ಟಾಪ್-5ನ 2, 3, 4 ಮತ್ತು 5ನೇ ಸ್ಥಾನದಲ್ಲಿವೆ. ಈ ಖುಷಿಯ ವಿಚಾರವನ್ನು ಬಾಲಿವುಡ್ ನಟ, ನಿರ್ವಪಕ ಫರ್ಹಾನ್ ಅಖ್ತರ್ ಶೇರ್ ಮಾಡಿಕೊಂಡು, ‘ರಾಕಿ ಬರುವಿಕೆಗಾಗಿ ಕಾಯುತ್ತಿದ್ದಾರೆ’ ಎಂದಿದ್ದಾರೆ. ಅದಕ್ಕೆ ಪ್ರತಿಯಾಗಿ, ‘ಆದಷ್ಟು ಬೇಗ ರಾಕಿಯ ತೂಫಾನ್ ಅಪ್ಪಳಿಸಲಿದೆ’ ಎಂದಿದ್ದಾರೆ ನಟ ಯಶ್.