'ಜೈಭೀಮ್'​ ಡೈರೆಕ್ಟರ್ ಜೊತೆ​ ಮತ್ತೆ ಕೈಜೋಡಿಸಿದ ಸೂರ್ಯ! ಹೊಂಬಾಳೆ ಬ್ಯಾನರ್​ನಲ್ಲಿ 48ನೇ ಸಿನಿಮಾ, ನಾಯಕಿಯೂ ಫಿಕ್ಸ್

ಚೆನ್ನೈ: 'ಕರುಪ್ಪು' ಚಿತ್ರದ ಯಶಸ್ಸಿನ ಬಳಿಕ 'ವಿಶ್ವನಾಥ್ ಅಂಡ್ ಸನ್ಸ್' ಬಿಡುಗಡೆಗೆ ಸಜ್ಜಾಗಿರುವ ತಮಿಳು ನಟ ಸೂರ್ಯ ಅವರ ಮುಂದಿನ ಚಿತ್ರದ ಬಗ್ಗೆ ಹೊಸ ಅಪ್ಡೇಟ್​ ಹೊರಬಿದ್ದಿದೆ.

'ಸಿಂಗಂ' ಸೂರ್ಯ ಅಭಿನಯಿಸಲಿರುವ 48ನೇ ಹೊಸ ಸಿನಿಮಾದ ನಿರ್ಮಾಣ ಜವಾಬ್ದಾರಿಯನ್ನು ಕನ್ನಡದ ಹೆಸರಾಂತ ಸಂಸ್ಥೆ ಹೊಂಬಾಳೆ ಫಿಲಂಸ್​ ವಹಿಸಿಕೊಂಡಿದ್ದು, ಬ್ಲಾಕ್​ಬಸ್ಟರ್​ 'ಜೈಭೀಮ್'​ ಚಿತ್ರದ ನಿರ್ದೇಶಕರಾದ ಟಿಜೆ ಜ್ಞಾನವೇಲ್ ಅವರೇ ಈ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ. ಈ ಮೂಲಕ ಮತ್ತೆ ಸೂರ್ಯ ಮತ್ತು ಜ್ಞಾನವೇಲ್ ಜೋಡಿ ಒಂದಾಗಿದ್ದು, ಹೊಸ ಪ್ರಾಜೆಕ್ಟ್​ಗೆ ನಾಯಕಿ ಕೂಡ ಫಿಕ್ಸ್ ಆಗಿದ್ದಾರೆ.

ಈ ಕುರಿತು ಹೊಂಬಾಳೆ ಫಿಲಂಸ್​ ಅಧಿಕೃತ ಮಾಹಿತಿ ಹಂಚಿಕೊಂಡಿದ್ದು, ಮುಖ್ಯಭೂಮಿಕೆಯಲ್ಲಿ ನಟ ಸೂರ್ಯ ಮತ್ತು ನಾಯಕಿಯಾಗಿ 'ಡ್ರ್ಯಾಗನ್​' ಖ್ಯಾತಿಯ ನಟಿ ಕಯಾದು ಲೋಹರ್​ ಅಭಿನಯಿಸಲಿದ್ದಾರೆ ಎಂದು ತಿಳಿಸಿದೆ. ಟಿ.ಜೆ. ಜ್ಞಾನವೇಲ್ ನಿರ್ದೇಶನದಲ್ಲಿ ಮೂಡಿಬರಲಿರುವ ಈ ಚಿತ್ರಕ್ಕೆ ಸಾಯಿ ಅಭ್ಯಂಕರ್ ಸಂಗೀತ ಸಂಯೋಜಿಸಲಿದ್ದಾರೆ. ಎಸ್.ಆರ್. ಕಥಿರ್ ಮತ್ತು ಫಿಲೋಮಿನ್ ರಾಜ್ ಛಾಯಾಗ್ರಹಣ ಮತ್ತು ಸಂಕಲನದ ಜವಾಬ್ದಾರಿ ವಹಿಸಿಕೊಂಡಿದ್ದಾರೆ.

ಸಿನಿ ವರದಿಗಳ ಪ್ರಕಾರ, ಸೂರ್ಯ ನಟಿಸಲಿರುವ ಈ ಚಿತ್ರವು ಜನಪ್ರಿಯ 5 ರೂ. ಡಾಕ್ಟರ್‌ ಅವರ ಜೀವನ ಆಧರಿತ ಎನ್ನಲಾಗಿದೆ. ಆದರೆ, ಈ ಕುರಿತಾಗಿ ಇಲ್ಲಿಯವರೆಗೆ ಚಿತ್ರತಂಡದಿಂದ ಯಾವುದೇ ಅಧಿಕೃತ ಮಾಹಿತಿಯೂ ಹೊರಬಿದ್ದಿಲ್ಲ. ತಮ್ಮ ನೆಚ್ಚಿನ ನಟನ ಹೊಸ ಸಿನಿಮಾ ಬಗ್ಗೆ ಖುಷಿ ವ್ಯಕ್ತಪಡಿಸಿರುವ ಸೂರ್ಯ ಅವರ ಅಭಿಮಾನಿಗಳು, ಚಿತ್ರದ ಕಥೆ ಮತ್ತು ಟೈಟಲ್​ ಏನಿರಬಹುದು ಎಂಬ ಕುತೂಹಲದಿಂದ ಕಾಯತೊಡಗಿದ್ದಾರೆ,(ಏಜೆನ್ಸೀಸ್).