ಸಿನಿಮಾ ತಾರೆಯರು ರಿಲೀಸ್ ಸಮಯದಲ್ಲಿ ಟೆಂಪಲ್ ರನ್ ಮಾಡುವುದು, ಬಾಕ್ಸಾಫಿಸಿನಲ್ಲಿ ಚೆನ್ನಾಗಿ ಗಳಿಕೆ ಮಾಡಿಕೊಳ್ಳಲಿ ಎಂದು ಹರಕೆ ಹೊರುವುದು ಸಾಮಾನ್ಯ. ಆದರೆ, ಬಾಲಿವುಡ್ ನಟ ಆಮಿರ್ ಖಾನ್ ಮಗನ ಚಿತ್ರಕ್ಕಾಗಿ ಶಪಥ ಮಾಡಿದ್ದಾರಂತೆ. ಪುತ್ರ ಜುನೈದ್ ಖಾನ್ ನಟಿಸಿರುವ "ಲವ್ಯಾಪಾ' ಸಿನಿಮಾ ಯಶಸ್ಸು ಗಳಿಸಿದರೆ, ಧೂಮಪಾನ ತ್ಯಜಿಸುವುದಾಗಿ ಅವರು ಪ್ರಮಾಣ ಮಾಡಿದ್ದಾರಂತೆ.
ಅಂದಹಾಗೆ, "ಲವ್ಯಾಪಾ' ಜುನೈದ್ ಖಾನ್ ನಟಿಸಿರುವ ಎರಡನೇ ಚಿತ್ರ. ಅವರು ನಾಯಕನಾಗಿ ಡೆಬ್ಯೂ ಮಾಡಿದ್ದ ಮೊದಲ ಸಿನಿಮಾ "ಮಹಾರಾಜ' ಕಳೆದ ವರ್ಷ ನೇರವಾಗಿ ಒಟಿಟಿಯಲ್ಲಿ ರಿಲೀಸ್ ಆಗಿತ್ತು. "ಲವ್ಯಾಪಾ' ಥಿಯೇಟರ್ಗಳಲ್ಲಿ ರಿಲೀಸ್ ಆಗಲಿರುವ ಮೊದಲ ಸಿನಿಮಾ. ಹೀಗಾಗಿ ಆಮಿರ್ಗೆ ಚಿತ್ರದ ಬಗ್ಗೆ ಸಾಕಷ್ಟು ನಿರೀಕ್ಷೆಯಿದೆ. ಇತ್ತೀಚೆಗಷ್ಟೆ ಸಿನಿಮಾ ನೋಡಿದ ಆಮಿರ್, ಇಡೀ ತಂಡದ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಇದು 2022ರ ತಮಿಳಿನ ಹಿಟ್ "ಲವ್ ಟುಡೇ' ಚಿತ್ರದ ಹಿಂದಿ ರಿಮೇಕ್ ಆಗಿದ್ದು, ಅದ್ವೈತ್ ಚಂದನ್ ನಿರ್ದೇಶಿಸಿದ್ದಾರೆ. ನಟಿ ಶ್ರೀದೇವಿ ಪುತ್ರಿ ಖುಷಿ ಕಪೂರ್, ಜುನೈದ್ಗೆ ನಾಯಕಿಯಾಗಿದ್ದು ಇದೇ ಫೆ. 7ರಂದು "ಲವ್ಯಾಪಾ' ತೆರೆಗೆ ಬರಲಿದೆ. &ಏಜೆನ್ಸೀಸ್