ಮುಂಬೈ: ಬಾಲಿವುಡ್ನ ಇತಿಹಾಸದಲ್ಲಿ ಸೂಪರ್ ಹಿಟ್ ಚಿತ್ರಗಳೆಂಬ ಹೆಗ್ಗಳಿಕೆಗೆ ಪಾತ್ರವಾಗಿದ್ದ ಆಮೀರ್ ಖಾನ್ ಅಭಿನಯದ 'ಲಗಾನ್' ಮತ್ತು ಸನ್ನಿ ಡಿಯೋಲ್ ಅಭಿನಯದ 'ಗದರ್ - ಏಕ್ ಪ್ರೇಮ್ ಕಥಾ' ಚಿತ್ರಗಳು ಬಿಡುಗಡೆಯಾಗಿ ಇಂದಿಗೆ ಎರಡು ದಶಕಗಳಾಗಿವೆ. 20 ವರ್ಷಗಳ ಹಿಂದೆ ಸರಿಯಾಗಿ ಇದೇ ದಿನದಂದು (15 ಜೂನ್ 2001), ಈ ಎರಡೂ ಚಿತ್ರಗಳು ಬಿಡುಗಡೆಯಾಗಿದ್ದವು ಮತ್ತು ಎರಡೂ ಸೂಪರ್ ಹಿಟ್ ಆಗಿದ್ದು ವಿಶೇಷ.
ಆಮೀರ್ ಖಾನ್ ಮತ್ತು ಸಂಜಯ್ ದತ್ ಅವರ ಚಿತ್ರಗಳು ಒಂದೇ ದಿನ ಕ್ಲಾಶ್ ಆಗಿದ್ದು ಹೊಸದೇನಲ್ಲ. 1990ರಲ್ಲಿ ಆಮೀರ್ ಅಭಿನಯದ 'ದಿಲ್' ಮತ್ತು ಸನ್ನಿ ಡಿಯೋಲ್ ಅಭಿನಯದ 'ಘಾಯಲ್' ಒಂದೇ ದಿನ ಬಿಡುಗಡೆಯಾಗಿತ್ತಂತೆ. ಅಷ್ಟೇ ಅಲ್ಲ, ಎರಡೂ ಚಿತ್ರಗಳು ಯಶಸ್ವಿಯಾಗಿದ್ದವು. ಆ ನಂತರ 1996ರಲ್ಲಿ 'ರಾಜ ಹಿಂದೂಸ್ತಾನಿ' ಮತ್ತು 'ಘಾತಕ್' ಚಿತ್ರಗಳು ಬಿಡುಗಡೆಯಾಗಿ ಯಶಸ್ಸು ಪುನರಾವರ್ತನೆಗೊಂಡಿತು. ಅದಾಗಿ 2001ರಲ್ಲಿ 'ಲಗಾನ್' ಮತ್ತು 'ಗದರ್' ಚಿತ್ರಗಳು ಬರೀ ಒಂದೇ ದಿನ ಬಿಡುಗಡೆಯಾಗಿ ಯಶಸ್ವಿಯಾಗಿದ್ದಷ್ಟೇ ಅಲ್ಲ, ಎರಡೂ ಚಿತ್ರಗಳು ಸೂಪರ್ ಹಿಟ್ ಎಂದನಿಸಿಕೊಂಡವು.
ಎರಡೂ ಚಿತ್ರಗಳು ಒಂದೇ ದಿನ ಬಿಡುಗಡೆಯಾದ ಬಗ್ಗೆ ಮಾತನಾಡಿರುವ ಆಮೀರ್, 'ನಾನು 'ಗದರ್' ಕಥೆ ಕೇಳಿದ್ದೆ. ಆ ಕಾಲಕ್ಕೆ ಅದೊಂದು ದೊಡ್ಡ ಬಜೆಟ್ನ ಚಿತ್ರವಾಗಿದ್ದಷ್ಟೇ ಅಲ್ಲ, ಬಹಳ ಎಮೋಷನಲ್ ಕಥೆ ಇತ್ತು. ಆ ಚಿತ್ರ ಸೂಪರ್ ಹಿಟ್ ಆಗುತ್ತದೆ ಎಂದು ಮನಸ್ಸು ಹೇಳುತ್ತಿತ್ತು. ಈ ಹಿಂದೆ ಸಹ ಎರಡು ಬಾರಿ ಸನ್ನಿ ಜತೆಗೆ ನನ್ನ ಚಿತ್ರಗಳು ಬಾಕ್ಸ್ ಆಫೀಸ್ನಲ್ಲಿ ಕ್ಲಾಶ್ ಆಗಿವೆ. ನನಗೆ ಆ ಬಗ್ಗೆ ಭಯವಿರಲಿಲ್ಲ. ಆದರೂ 'ಗದರ್' ಚಿತ್ರದ ಬಗ್ಗೆ ನಮ್ಮ ತಂಡದವರಿಗೆ ಎಚ್ಚರಿಸಿದ್ದೆ. ಆ ಚಿತ್ರ ಬಹಳ ಚೆನ್ನಾಗಿ ಮೂಡಿ ಬಂದಿರುತ್ತದೆ, ಹುಷಾರಾಗಿರಿ ಎಂದು ನಮ್ಮ ತಂಡದವರಿಗೆ ಹೇಳಿದ್ದೆ' ಎಂದು ಆಮೀರ್ ಹೇಳಿಕೊಂಡಿದ್ದಾರೆ.
'ಗದರ್' ಚೆನ್ನಾಗಿರುತ್ತದೆ ಎಂದು ಗೊತ್ತಿತ್ತು. ಆದರೆ, ಅದು ಸೂಪರ್ ಹಿಟ್ ಆಗುತ್ತದೆ ಎಂದು ಗೊತ್ತಿರಲಿಲ್ಲ ಎಂದು ಹೇಳಿರುವ ಆಮೀರ್, 'ಆ ಚಿತ್ರ ಸೂಪರ್ ಹಿಟ್ ಆಯ್ತು. ಹಲವು ರಾಜ್ಯಗಳಲ್ಲಿ ಚಿತ್ರ ನೋಡೋದಕ್ಕೆ ಜನ ಟ್ರಾಕ್ಟರ್ಗಳಲ್ಲಿ ಚಿತ್ರಮಂದಿರಕ್ಕೆ ಹೋಗುತ್ತಿದ್ದರು. ಅದು 'ಲಗಾನ್'ಗಿಂತ ಮೂರು ಪಟ್ಟು ದೊಡ್ಡದಿತ್ತು. ಅಂತ ಸುನಾಮಿ ಚಿತ್ರದ ಎದುರು ಹೇಗೆ ನಿಂತು ಬಿಡುಗಡೆ ಮಾಡಿದೆವು ಅಂತ ಈಗಲೂ ಗೊತ್ತಿಲ್ಲ. ಆ ಚಿತ್ರದ ಬಿಜಿನೆಸ್ ಎದುರು ನಮ್ಮದೇನೂ ಇಲ್ಲ. ಆದರೂ ಜನ ನಮ್ಮ ಚಿತ್ರವನ್ನೂ ಮೆಚ್ಚಿಕೊಂಡು ಗೆಲ್ಲಿಸಿದರು. 'ಲಗಾನ್' ಸಹ ಒಳ್ಳೆಯ ಬಿಜಿನೆಸ್ ಮಾಡಿತು. ನಮ್ಮ ಚಿತ್ರ ಅದರಷ್ಟು ಬಿಜಿನೆಸ್ ಮಾಡದಿದ್ದರೂ, ಜನರಿಂದ ಮೆಚ್ಚುಗೆ ಪಡೆಯಿತು ಎನ್ನುವುದೇ ಖುಷಿಯ ವಿಚಾರ' ಎಂದು ಆಮೀರ್ ಹೇಳಿದ್ದಾರೆ.