'ಧುರಂದರ್'​ಗೆ ಬಂದ ಸ್ಥಿತಿಯೇ 'ಬಾರ್ಡರ್​ 2' ಚಿತ್ರಕ್ಕೂ! ಮುಂಚೆಯೇ ಟಿಕೆಟ್​ ಬುಕ್​ ಮಾಡಿದ ಸಿನಿಪ್ರಿಯರಿಗೆ ಭಾರೀ ನಿರಾಶೆ

ಮುಂಬೈ: ಬಾಲಿವುಡ್​ನ ಬಹುನಿರೀಕ್ಷಿತ 'ಬಾರ್ಡರ್​​ 2' ಸಿನಿಮಾ ಇಂದು ದೇಶವ್ಯಾಪಿ ಬಹುತೇಕ ಚಿತ್ರಮಂದಿರಗಳಲ್ಲಿ ತೆರೆಕಂಡಿದ್ದು, ಸಿನಿಪ್ರಿಯರಿಂದ ಉತ್ತಮ ಪ್ರತಿಕ್ರಿಯೆಗಳನ್ನೇ ಪಡೆದುಕೊಳ್ಳುತ್ತಿದೆ. ಆದರೆ, ಮೊದಲ ದಿನದ ಮೊದಲ ಶೋಗೆ ಉಂಟಾದ ತಾಂತ್ರಿಕ ಸಮಸ್ಯೆಗಳು ಸದ್ಯ ಚಿತ್ರತಂಡಕ್ಕೆ ದೊಡ್ಡ ತಲೆನೋವಾಗಿ ಕಾಡಿದ್ದಂತು ಸತ್ಯ.   

'ಧುರಂದರ್'​ ಬಳಿಕ ಬಾಲಿವುಡ್​ನ ಮತ್ತೊಂದು ಚಿತ್ರದ ಮೇಲೆ ಭಾರೀ ನಿರೀಕ್ಷೆ ಹಾಗೂ ಹೈಪ್​ ಪಡೆದ ನಟ ಸನ್ನಿ ಡಿಯೋಲ್​, ವರುಣ್ ಧವನ್​ ಮುಖ್ಯಭೂಮಿಕೆಯಲ್ಲಿ ನಟಿಸಿರುವ 'ಬಾರ್ಡರ್​ 2' ಚಿತ್ರದ ಮಾರ್ನಿಂಗ್​​ ಶೋಗೆ ಮುಂಚಿತವಾಗಿಯೇ ಟಿಕೆಟ್ ಬುಕ್ ಮಾಡಿಕೊಂಡಿದ್ದ ಸಿನಿಪ್ರಿಯರಿಗೆ ಕೊನೆ ಸಮಯದಲ್ಲಿ ಭಾರೀ ನಿರಾಶೆ ಉಂಟಾಯಿತು. ಕಾರಣ, ಟೆಕ್ನಿಕಲ್ ಸಮಸ್ಯೆಯಿಂದ ಬೆಳಗ್ಗಿನ ಶೋಗಳು ದಿಢೀರ್ ರದ್ದಾಯಿತು. ಈ ತೊಂದರೆ ಒಂದಲ್ಲ, ಎರಡಲ್ಲ ಹಲವು ಚಿತ್ರಮಂದಿರಗಳಲ್ಲಿ ಕಾಡಿತು. 

ಇಂದು ಬೆಳಗ್ಗೆ 7.30 ಮತ್ತು 8 ಗಂಟೆಯ ಫಸ್ಟ್​ ಶೋಗಳನ್ನು ಎಂದಿನಂತೆ ಪ್ರಸಾರ ಮಾಡಲು ನಿಗದಿ ಪಡಿಸಲಾಗಿತ್ತು. ಆದಾಗ್ಯೂ, ತಾಂತ್ರಿಕ ಸಮಸ್ಯೆಗಳಿಂದಾಗಿ, ಚಿತ್ರದ ಫೈನಲ್​ ಪ್ರಿಂಟ್​ ಅನ್ನು ಕೆಲವು ಚಿತ್ರಮಂದಿರಗಳಿಗೆ ಸಮಯಕ್ಕೆ ಸರಿಯಾಗಿ ತಲುಪಿಸಲು ಸಾಧ್ಯವಾಗಲಿಲ್ಲ. ವರದಿಗಳ ಪ್ರಕಾರ, 192 ನಿಮಿಷಗಳ ದೊಡ್ಡ ರನ್​ಟೈಮ್ ಹೊಂದಿರುವ ಬಾರ್ಡರ್ 2 ಚಿತ್ರದ ಡೌನ್​ಲೋಡಿಂಗ್​ ಸುಮಾರು 3ರಿಂದ 4 ಗಂಟೆಗಳ ಅವಧಿ ತೆಗೆದುಕೊಂಡಿದ್ದೇ ಪ್ರದರ್ಶಕರಿಗೆ ಬೆಳಗಿನ ಶೋಗಳನ್ನು ರದ್ದು ಮಾಡುವಂತಾಯಿತು ಎಂದು ವರದಿಯಾಗಿದೆ.  

ಈ ಸಮಸ್ಯೆ ಕೇವಲ 'ಬಾರ್ಡರ್​ 2' ಚಿತ್ರಕ್ಕೆ ಮಾತ್ರವಲ್ಲ, ರಣವೀರ್ ಸಿಂಗ್ ಅಭಿನಯದ ಬ್ಲಾಕ್​ಬಸ್ಟರ್​ ಹಿಟ್​ 'ಧುರಂದರ್'​ಗೂ ತಟ್ಟಿದೆ ಎನ್ನಲಾಗಿದೆ. ಡಿ.04ರಂದು ಪ್ರೀಮಿಯರ್​ ಶೋ ಪ್ರಸಾರಕ್ಕೆ ಮುಂದಾಗಿದ್ದ ಚಿತ್ರತಂಡಕ್ಕೆ ಇದೇ ರೀತಿ ಟೆಕ್ನಿಕಲ್ ಸಮಸ್ಯೆಗಳು ಕಾಡತೊಡಗಿತು. ಸದ್ಯ ವರುಣ್ ಧವನ್ ಸಿನಿಮಾಗೆ ಕಾಡಿರುವ ಸಮಸ್ಯೆಯಿಂದ ಮೊದಲ ದಿನದ ಗಳಿಕೆಗೆ ಹೊಡೆತ ಬಿದ್ದಿದ್ದು, ಗಳಿಕೆಯಲ್ಲಿ ವ್ಯತ್ಯಾಸ ಕಂಡುಬರಲಿದೆ ಎಂಬುದು ಖಚಿತ,(ಏಜೆನ್ಸೀಸ್).