ಬಾಲಿವುಡ್ ನಟ ಸೈಫ್ ಅಲಿ ಖಾನ್ ತಮಾಷೆಗೆ ಹೇಳಿದ ಮಾತೊಂದು ಜಾಲತಾಣದಲ್ಲಿ ಟ್ರೆಂಡ್ ಆಗಿ, ಎರಡು ವರ್ಷಗಳ ತುಪ್ಪ ಅವರ ಮನೆ ಸೇರುವಂತೆ ಮಾಡಿದೆ! ಹೌದು, ಕಳೆದ ಸೆಪ್ಟೆಂಬರ್ನಲ್ಲಿ "ಹೈವಾನ್' ಚಿತ್ರದ ಪ್ರಚಾರದ ವೇಳೆ ನಟ ಅಕ್ಷಯ್ ಕುಮಾರ್ ಜತೆ ಸೈಫ್ ಕೂಡ "ಕೌನ್ ಬನೇಗಾ ಕರೋಡ್ಪತಿ' ಸೀಸನ್ 18ರಲ್ಲಿ ಪಾಲ್ಗೊಂಡಿದ್ದರು. 10ನೇ ಪ್ರಶ್ನೆಗೆ ಸರಿಯಾದ ಉತ್ತರ ನೀಡುವವರಿಗೆ "ಗೋವರ್ಧನ್ ಘೀ' ವತಿಯಿಂದ ಎರಡು ವರ್ಷಗಳ ತುಪ್ಪ ಸಿಗಲಿದೆ ಎಂದು ನಿರೂಪಕ ಅಮಿತಾಭ್ ಬಚ್ಚನ್ ಹೇಳಿದ್ದರು. ಆ ಸಂಚಿಕೆ ಮುಗಿದ ಕೆಲ ದಿನಗಳಲ್ಲೇ ಅ. 11ರಂದು ಸೈಫ್ ಅಲಿ ಖಾನ್ ಇನ್ಸ್ಟಾಗ್ರಾಂನಲ್ಲಿ ಖಾತೆ ತೆರೆದರು. ಆ ಸಮಯದಲ್ಲಿ ಹಲವಾರು ಅಭಿಮಾನಿಗಳು ""ಕೆಬಿಸಿ'ಯಲ್ಲಿ ಹೇಳಿದಂತೆ ತುಪ್ಪ ದೊರೆಯಿತೇ?' ಎಂದು ಪ್ರಶ್ನಿಸತೊಡಗಿದರು. ಆದರೆ, ಅದನ್ನು ನಟ ಗಂಭೀರವಾಗಿ ಪರಿಗಣಿಸಿರಲಿಲ್ಲ. ಇನ್ನು ಕೆಲ ದಿನಗಳ ಹಿಂದಷ್ಟೇ ಸೈಫ್ ಮತ್ತು ಕರೀನಾ ದಂಪತಿ ನಟ ಕಪಿಲ್ ಶರ್ಮಾ ನಡೆಸಿಕೊಡುವ ಕಾಮಿಡಿ ಶೋನಲ್ಲಿ ಅತಿಥಿಗಳಾಗಿ ಬಂದಿದ್ದರು. ಆ ಸಮಯದಲ್ಲಿ ಕಪಿಲ್ ಕೂಡ ತುಪ್ಪದ ಬಗ್ಗೆ ಪ್ರಶ್ನಿಸಿದರು. ಅದಕ್ಕೆ ಸೈಫ್ "ತುಪ್ಪನೂ ಸಿಕ್ಕಿಲ್ಲ, ಚೆಕ್ ಕೂಡ ಸಿಕ್ಕಿಲ್ಲ' ಎಂದು ನಗುತ್ತಾ ಹೇಳಿಕೊಂಡಿದ್ದರು. ಅದಾಗುತ್ತಲೇ ಆನ್ಲೈನ್ನಲ್ಲಿ ಹಲವು ಫ್ಯಾನ್ಗಳು ಸೈಫ್ಗೆ ತುಪ್ಪ ಕೊಡಿ ಎಂದು ಗೋವರ್ಧನ್ ಘೀ ಹಿಂದೆ ಬಿದ್ದರು. ಟ್ರೋಲ್ ಮಾಡಿದರು, ಹ್ಯಾಶ್ಟ್ಯಾಗ್ ಟ್ರೆಂಡ್ ಮಾಡಿದರು. ಕೊನೆಗೆ ತುಪ್ಪದ ಕಂಪನಿಯವರು ಸೈಫ್ ಮನೆಗೆ ಎರಡು ವರ್ಷಗಳಿಗೆ ಆಗುವಷ್ಟು ತುಪ್ಪದ ಬಾಟಲಿಗಳನ್ನು ಕಳುಹಿಸಿಕೊಟ್ಟಿದ್ದಾರೆ. ಸದ್ಯ, ಸೈಫ್ ತುಪ್ಪ ಮನೆ ಸೇರಿರುವ ವಿಡಿಯೋ ಹಂಚಿಕೊಂಡಿದ್ದು, ಒಂದೇ ದಿನದಲ್ಲಿ 10 ಲಕ್ಷಕ್ಕೂ ಅಧಿಕ ಲೈಕ್ಸ್ ಮತ್ತು ಎರಡು ಕೋಟಿಗೂ ಅಧಿಕ ವೀವ್ಸ್ ದೊರೆತು ಮತ್ತೆ ಟ್ರೆಂಡಿಂಗ್ನಲ್ಲಿದೆ. -ಏಜೆನ್ಸೀಸ್