ಹನುಮ ಜಯಂತಿಯ ದಿನ ರಣಬೀರ್ ಕಪೂರ್ ಅಭಿನಯದ 'ರಾಮಾಯಣ' ಚಿತ್ರದ ಫಸ್ಟ್ ಲುಕ್ ಬಿಡುಗಡೆ
- ಹನುಮ ಜಯಂತಿಯ ದಿನ ರಣಬೀರ್ ಕಪೂರ್ ಅಭಿನಯದ 'ರಾಮಾಯಣ' ಚಿತ್ರದ ಫಸ್ಟ್ ಲುಕ್ ಬಿಡುಗಡೆ
- ರಾಮನಾಗಿ ರಣಬೀರ್, ರಾವಣನಾಗಿ ಯಶ್ ಹಾಗೂ ಸೀತೆಯಾಗಿ ಸಾಯಿ ಪಲ್ಲವಿ ಅಭಿನಯ
- ಟ್ವಿಟರ್ನಲ್ಲಿ ಈ ಸಿನಿಮಾ ಫುಲ್ ಟ್ರೆಂಡಿಂಗ್
ಮುಂಬೈ: ಇಂದು (ಏ.2) ಪ್ರಭು ಶ್ರೀರಾಮನ ಬಂಟ ಹನುಮನ ಜಯಂತಿ ದಿನ ನಿತೇಶ್ ತಿವಾರಿ ನಿರ್ದೇಶನದ ಮತ್ತು ರಣಬೀರ್ ಕಪೂರ್ ಮುಖ್ಯ ಭೂಮಿಕೆಯಲ್ಲಿ ನಟಿಸುತ್ತಿರುವ ರಾಮಾಯಣ (Ramayan) ದ ಫಸ್ಟ್ ಲುಕ್ ಹೊರಬಿದ್ದಿದ್ದು, ಈಗ #Ramayan ಎಂಬ ಹ್ಯಾಶ್ಟ್ಯಾಗ್ ಎಕ್ಸ್ (ಟ್ವಿಟರ್) ನಲ್ಲಿ ಟ್ರೆಂಡಿಂಗ್ನಲ್ಲಿದೆ.
ರಣವೀರ್,ಯಶ್, ಸಾಯಿ... ಟ್ರೆಂಡಿಂಗ್!
ಅಮೆರಿಕದ ಲಾಸ್ ಎಂಜಲೀಸ್ ಮತ್ತು ಮುಂಬೈನಲ್ಲಿ ನಡೆಸ ಸ್ಕ್ರೀನಿಂಗ್ನಲ್ಲಿ ಹೊರಬಿದ್ದ ಫಸ್ಟ್ ಲುಕ್, ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸಂಚಲನವನ್ನು ಸೃಷ್ಟಿಸಿದೆ. ಈ ಸಿನಿಮಾದ ಪ್ರಮುಖ ಪಾತ್ರಧಾರಿಗಳಾದ ರಣಬೀರ್ ಕಪೂರ್ (ಪ್ರಭು ಶ್ರೀರಾಮ) ರಾಕಿಂಗ್ ಸ್ಟಾರ್ ಯಶ್ (ರಾವಣ) ಮತ್ತು ಸಾಯಿ ಪಲ್ಲವಿ ( ಸೀತೆ) ಇವರುಗಳು ಟ್ವಿಟರ್ನಲ್ಲಿ ಟಾಪ್ ಟ್ರೆಂಡಿಂಗ್ನಲ್ಲಿ ಪಟ್ಟಿಯಾಗಿದ್ದಾರೆ.
ಈ ಸಿನಿಮಾವನ್ನು ನಿತೇಶ್ ತಿವಾರಿ ನಿರ್ದೇಶಿಸಿದ್ದು, ನಮಿತ್ ಮಲ್ಹೋತ್ರಾ ಈ ಚಿತ್ರದ ನಿರ್ಮಾಪಕರಾಗಿದ್ದಾರೆ. ಈ ಸಿನಿಮಾವು ಎರಡು ಭಾಗಗಳಲ್ಲಿ ಬಿಡುಗಡೆಯಾಗಲಿದ್ದು, ಮೊದಲ ಭಾಗವು ಈ ವರ್ಷ(2026) ದ ದೀಪಾವಳಿಗೆ ಬಿಡುಗಡೆಯಾದರೆ ಎರಡನೇ ಭಾಗವು 2027 ರ ದೀಪಾವಳಿಗೆ ತೆರೆಕಾಣಲಿದೆ.
ಪತಿಯನ್ನು ಹೊಗಳಿದ ಆಲಿಯಾ
ರಾಮಾಯಣ ಸಿನಿಮಾದ ಫಸ್ಟ್ ಲುಕ್ ವಿಡಿಯೋ ಬಿಡುಗಡೆಗೆ ಮೊದಲು ರಣಬೀರ್ ಪತ್ನಿ ಆಲಿಯಾ ಭಟ್ ನೀಡಿರುವ ಹೇಳಿಕೆಯೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು, ಈ ಸಿನಿಮಾ ಔಟ್ ಆಫ್ ದಿ ವರ್ಲ್ಡ್ ಎಂದು ಆಲಿಯಾ ಬಣ್ಣಿಸಿದ್ದಾರೆ. ಈ ಸಿನಿಮಾಗಾಗಿ ರಣಬೀರ್ ಬಹಳ ಶ್ರಮ ವಹಿಸಿದ್ದು, ಭಕ್ತಿಯಿಂದ ಪ್ರಭು ಶ್ರೀರಾಮನಲ್ಲಿ ಬೇಡಿಕೊಂಡರೆ ಎಲ್ಲವೂ ದೊರೆಯುತ್ತದೆ ಎಂದು ಆಲಿಯಾ ಭಟ್ ರಿಯಾಕ್ಷನ್ ಕೊಟ್ಟಿದ್ದಾರೆ.
ಫಸ್ಟ್ ಲುಕ್ನಲ್ಲಿ ಏನಿದೆ?
ಏಪ್ರಿಲ್ 2 ರಂದು ಬಿಡುಗಡೆಯಾಗಿರುವ ರಾಮಾಯಣದ ಫಸ್ಟ್ ಲುಕ್ನಲ್ಲಿ ಅಯೋಧ್ಯೆಯ ರಾಜ ವೈಭೋಗವನ್ನು, ವನ ವಾಸದಲ್ಲಿರುವ ರಾಮನನ್ನು ಮತ್ತು ವಿಡಿಯೋದ ಕೊನೆಯಲ್ಲಿ ರಾವಣನ ಪುಷ್ಪಕ ವಿಮಾನವನ್ನು ತೋರಿಸಿದ್ದಾರೆ.
ಇನ್ನು ಪಾತ್ರದ ವಿಚಾರಕ್ಕೆ ಬಂದರೆ, ಈ ಫಸ್ಟ್ ಲುಕ್ನಲ್ಲಿ ಕೇವಲ ಪ್ರಭು ಶ್ರೀ ರಾಮನ ಪಾತ್ರಾಧಾರಿಯಾದ ರಣಬೀರ್ ಕಪೂರ್ನನ್ನು ಮಾತ್ರ ತೋರಿಸಿದ್ದು, ಮುಂದಿನ ದಿನಗಳಲ್ಲಿ ಇತರೆ ಪಾತ್ರಗಳನ್ನು ಪರಿಚಯಿಸುವ ಸಾಧ್ಯತೆಯಿದೆ,(ಏಜನ್ಸೀಸ್).