ಮಾ.19ರಂದೇ ರಿಲೀಸ್​! 'ಟಾಕ್ಸಿಕ್'​ ಎಕ್ಸಿಟ್​ ಬೆನ್ನಲ್ಲೇ 'ಧುರಂಧರ್'​ಗೆ ತೆಲುಗು ಸಿನಿಮಾ ಪೈಪೋಟಿ; ದಿಢೀರ್ ದಿನಾಂಕ ಬದಲಾವಣೆ

ಬೆಂಗಳೂರು: ಇದೇ ಮಾ.19ಕ್ಕೆ ರಾಕಿಂಗ್ ಸ್ಟಾರ್​ ಯಶ್​ ಅಭಿನಯದ ಬಹುನಿರೀಕ್ಷಿತ ಟಾಕ್ಸಿಕ್​ ಸಿನಿಮಾ ತೆರೆಗೆ ಬರಲು ಫಿಕ್ಸ್ ಆಗಿತ್ತು. ದೇಶಾದ್ಯಂತ ಮಾತ್ರವಲ್ಲದೇ ಜಾಗತಿಕ ಮಟ್ಟದಲ್ಲಿ ಏಕಕಾಲಕ್ಕೆ ರಿಲೀಸ್ ಆಗಲು ಸಜ್ಜಾಗಿತ್ತು. ಆದರೆ, ಇರಾನ್​ ಮತ್ತು ಇಸ್ರೇಲಿ-ಅಮೆರಿಕ ನಡುವಿನ ಯುದ್ಧದ ಬಿಕ್ಕಟ್ಟಿನಿಂದ ಮಧ್ಯಪ್ರಾಚ್ಯದಲ್ಲಿ ಪರಿಸ್ಥಿತಿ ಉದ್ವಿಗ್ನಗೊಂಡಿದೆ. ಇದರಿಂದ ತಮ್ಮ ಸಿನಿಮಾಗೆ ವಿದೇಶಿ ನೆಲಗಳಲ್ಲಿ ಹಿನ್ನೆಡೆ ಉಂಟಾಗಬಹುದು ಎಂದು ಮುಂದಾಲೋಚಿಸಿದ ಚಿತ್ರತಂಡ, ಸದ್ಯ ದಿಢೀರ್ ಎಂಬಂತೆ ದಿನಾಂಕದಲ್ಲಿ ಬದಲಾವಣೆ ತಂದಿದೆ.

ಮಾ.19ರಿಂದ ಈಗ ಜೂನ್​ 04ಕ್ಕೆ 'ಟಾಕ್ಸಿಕ್' ರಿಲೀಸ್​ ಡೇಟ್​ ಮುಂದೂಡಲಾಗಿದೆ. ರಣವೀರ್​ ಸಿಂಗ್ ಅಭಿನಯದ ಬ್ಲಾಕ್​ಬಸ್ಟರ್ ಹಿಟ್​ 'ಧುರಂಧರ್​ 2' ಕೂಡ ಮಾ.19ರಂದೇ ತೆರೆಕಾಣಲು ಸಜ್ಜಾಗಿದೆ. ಭಾರತೀಯ ಚಿತ್ರೋದ್ಯಮದಲ್ಲಿ ಬಹುನಿರೀಕ್ಷಿತ ಸಿನಿಮಾಗಳಲ್ಲಿ ಅಗ್ರಸ್ಥಾನದಲ್ಲಿದ್ದ ಚಿತ್ರಗಳೆಂದರೆ ಅವು 'ಟಾಕ್ಸಿಕ್'​ ಮತ್ತು 'ಧುರಂಧರ್ 2'​. ಇವರೆಡು ಬಾಕ್ಸ್ ಆಫೀಸ್​ನಲ್ಲಿ ದೊಡ್ಡ ಮಟ್ಟಿಗೆ ಪೈಪೋಟಿ ಕೊಡಲಿವೆ ಹಾಗೂ ನಿರೀಕ್ಷೆಗೂ ಮೀರಿದ ಲಾಭವನ್ನು ತಂದುಕೊಡಲಿದೆ ಎಂದೇ ಎಲ್ಲರೂ ನಿರೀಕ್ಷಿಸಿದ್ದರು. ಆದ್ರೆ, ಈಗ ದಿಢೀರ್​ ರಿಲೀಸ್ ಡೇಟ್​ ಬದಲಿಸಿರುವ ಚಿತ್ರತಂಡ ಬಾಕ್ಸ್ ಆಫೀಸ್​ ಕ್ಲ್ಯಾಶ್​ನಿಂದ ಹಿಂದೆ ಸರಿದಿರುವುದು ಬೇರೆ ಚಿತ್ರಗಳಿಗೆ ದಾರಿ ಮಾಡಿಕೊಟ್ಟಿದೆ.

ಮಾ.19ರಿಂದ 'ಟಾಕ್ಸಿಕ್'​ ಎಕ್ಸಿಟ್​ ಆಗ್ತಿದ್ದಂತೆ, ಇದೇ ನಮಗೆ ಸರಿಯಾದ ಸಮಯ ಎಂದು ನಿರ್ಧರಿಸಿದ ಪವಾನ್ ಕಲ್ಯಾಣ್​ ಅಭಿನಯದ 'ಉಸ್ತಾದ್​ ಭಗತ್ ಸಿಂಗ್'​ ಚಿತ್ರದ ನಿರ್ಮಾಪಕರು, ಈ ಹಿಂದೆ ನಿಗದಿಪಡಿಸಿದ್ದ ದಿನಾಂಕವನ್ನು ದಿಢೀರ್ ರದ್ದುಗೊಳಿಸಿ, 'ಧುರಂಧರ್​ 2' ಜೊತೆಗೆ ತೆರೆಗೆ ಬರಲು ಸಿದ್ಧವಾಗಿದೆ. ಈ ಬಗ್ಗೆ ಅಧಿಕೃತವಾಗಿ ಚಿತ್ರತಂಡ ಮಾಹಿತಿ ಹಂಚಿಕೊಂಡಿದ್ದು, ಒಂದು ವಾರ ಮುಂಚಿತವಾಗಿಯೇ ನಾವು ಚಿತ್ರಮಂದಿರಗಳಿಗೆ ಬರುತ್ತಿದ್ದೇವೆ ಎಂದು ತಿಳಿಸಿದೆ.

ಟಾಕ್ಸಿಕ್​ ಹೊರಬಿದ್ದ ಬೆನ್ನಲ್ಲೇ ತಮ್ಮ ರಿಲೀಸ್​ ದಿನಾಂಕವನ್ನು ಬದಲಿಸಿಕೊಂಡಿರುವ ಉಸ್ತಾದ್ ಭಗತ್ ಸಿಂಗ್ ಚಿತ್ರತಂಡ, ಯುಗಾದಿ ಮತ್ತು ರಂಜಾನ್​ ಹಬ್ಬಗಳ ಜೊತೆ ವಾರಾಂತ್ಯಗಳು ಸಿಗುವುದರಿಂದ ಚಿತ್ರಪ್ರೇಮಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಬಂದು, ಸಿನಿಮಾ ನೋಡುತ್ತಾರೆ ಎಂಬುದೇ ಲೆಕ್ಕಾಚಾರ. ಮತ್ತೊಂದೆಡೆ, ಬಾಕ್ಸ್ ಆಫೀಸ್​ನಲ್ಲಿ ಉತ್ತಮ ಓಪನಿಂಗ್ ಸಿಗಬಹುದು ಎಂಬ ನಿರೀಕ್ಷೆ,(ಏಜೆನ್ಸೀಸ್).

ಮೈತ್ರಿ ಮೂವಿ ಮೇಕರ್ಸ್​ ನಿರ್ಮಿಸಿರುವ ಈ ಚಿತ್ರದಲ್ಲಿ ಪವನ್ ಕಲ್ಯಾಣ್​, ಶ್ರೀಲೀಲಾ ಮತ್ತು ರಾಶಿ ಖನ್ನಾ ಮುಖ್ಯಭೂಮಿಕೆಯಲ್ಲಿ ನಟಿಸಿದ್ದಾರೆ. ದೇವಿ ಶ್ರೀ ಪ್ರಸಾದ್​ ಮತ್ತು ಎಸ್​.ಥಮನ್ ಅವರ ಸಂಗೀತ ಚಿತ್ರಕ್ಕಿದೆ. ಒಟ್ಟಾರೆ, ಟಾಕ್ಸಿಕ್​ ಬದಲಿಗೆ ಧುರಂಧರ್ ಜೊತೆಗೆ ಪೈಪೋಟಿ ಕೊಡಲು ಬರುತ್ತಿರುವ ಉಸ್ತಾದ್​ ಭಗತ್ ಸಿಂಗ್, ಬಾಕ್ಸ್ ಆಫೀಸ್​ನಲ್ಲಿ ಹೇಗೆ ಕಮಾಲ್ ಮಾಡಲಿದೆ ಎಂಬುದನ್ನು ಕಾದು ನೋಡಬೇಕಿದೆ,(ಏಜೆನ್ಸೀಸ್).