ವೈರಲ್ ಆಗುತ್ತಿರುವ ಸಲ್ಮಾನ್ ಖಾನ್ ಫೋಟೊ, ಧುರಂಧರ್ 2 ಪೋಸ್ಟರ್
- ಈ ವರ್ಷದ ಬಹು ನೀರಿಕ್ಷಿತ ಸಿನಿಮಾ ಧುರಂಧರ್ 2
- ಬಡೇ ಸಾಬ್ ಪಾತ್ರದಲ್ಲಿ ಸಲ್ಮಾನ್ ಖಾನ್ ನಟಿಸಲಿದ್ದಾರೆ ಎಂಬ ವದಂತಿ
- ಧುರಂಧರ್ 2 ಮಾರ್ಚ್ 19 ರಂದು ಬಿಡುಗಡೆ
- ಇದೇ ದಿನ ಯಶ್ ಅಭಿನಯದ ಟಾಕ್ಸಿಕ್ ಸಿನಿಮಾ ಸಹ ತೆರೆಕಾಣಲಿದೆ
ಬಾಲಿವುಡ್: ಈಗ ಸದ್ಯ ಭಾರತದ ಪ್ರತಿ ಸಿನಿಮಾ ಪ್ರೇಮಿ ತುದಿಗಾಲಿನಿಂದ ನೀರಿಕ್ಷೆ ಮಾಡುತ್ತಿರುವ ಸಿನಿಮಾ ಯಾವುದೆಂದರೆ ಧುರಂಧರ್ 2 (Dhurandhar 2), ಮಂಗಳವಾರ (ಫೆ.3) ಈ ಸಿನಿಮಾದ ಟೀಸರ್ ರಿಲೀಸ್ ಆಗಿದ್ದು ಮಾರ್ಚ್ 19 ರಂದು ವಿಶ್ವದಾದ್ಯಂತ ಚಿತ್ರ ಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ.
ಈ ಸಿನಿಮಾದ ಕುರಿತಂತೆ ಹಲವಾರು ವಿಷಯಗಳು ಚರ್ಚೆಯಲ್ಲಿವೆ, ಆದರೆ ಈ ಒಂದು ಸುದ್ದಿ ಸಾಮಾಜಿಕ ಮಾಧ್ಯಮಗಳಲ್ಲಿ ಸಖತ್ ವೈರಲ್ ಆಗುತ್ತಿದ್ದು, ಇದೇನಾದರೂ ನಿಜವಾದರೆ ಸಿನಿಮಾದ ಮೊದಲ ಭಾಗಕ್ಕಿಂತ ಹೆಚ್ಚಿನ ಗಳಿಕೆ ಕಟ್ಟಿಟ್ಟ ಬುತ್ತಿ ಎಂದು ಸಿನಿ ಪ್ರೀಯರು ಹೇಳುತ್ತಿದ್ದಾರೆ.
ಅಷ್ಟಕ್ಕೂ ಈಗ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗುತ್ತಿರುವ ಸಂಗತಿ ಏನೆಂದರೆ ಬಾಲಿವುಡ್ ಖ್ಯಾತ ನಟ ಸಲ್ಮಾನ್ ಖಾನ್ ಧುರಂಧರ್ 2 ಸಿನಿಮಾದಲ್ಲಿ 'ಬಡೇ ಸಾಬ್' ಪಾತ್ರದಲ್ಲಿ ಅಭಿನಯಿಸಲಿದ್ದಾರೆ ಎಂದು ಹೇಳಲಾಗುತ್ತಿದ್ದು, ಇದಕ್ಕೆ ಪೂರಕ ಎಂಬಂತೆ ಈ ಸಿನಿಮಾದ ಮೊದಲ ಭಾಗದಲ್ಲಿ ಅಭಿನಯಿಸಿದ್ದ ಅರ್ಜುನ್ ರಾಂಪಾಲ್ (ಇಲಿಯ್ಯಾಸ್ ಕಶ್ಮೀರಿ) ಮತ್ತು ಸಂಜಯ್ ದತ್ತ್ ( ಚೌಧರಿ ಅಸ್ಲಂ) ಜತೆಗೆ ಸಲ್ಮಾನ್ ಖಾನ್ ಇರುವ ಫೋಟೊವೊಂದು ಸಾಮಾಜಿಕ ಮಾಧ್ಯಮದಲ್ಲಿ ಹರಿದಾಡುತ್ತಿದೆ.
ಆದರೆ ಈ ವದಂತಿಗೆ ಧುರಂಧರ್ ಚಿತ್ರತಂಡವಾಗಲಿ ಅಥವಾ ಸಲ್ಮಾನ್ ಖಾನ್ ಆಗಲಿ ಯಾವುದೇ ಸ್ಪಷ್ಟನೆಯನ್ನು ಇಲ್ಲಿಯವರೆಗೆ ನೀಡಿಲ್ಲ. ಕೆಲವರಂತೂ ಇದು ಶುದ್ಧ ಸುಳ್ಳು ವೈರಲ್ ಆಗುತ್ತಿರುವ ಫೋಟೊ ಎಐ ಯಿಂದ ರಚಿತವಾಗಿದೆ ಎಂದು ಹೇಳುತ್ತಿದ್ದಾರೆ. ಮತ್ತೊಂದು ಗುಂಪಿನ ಜನರು ಸಲ್ಮಾನ್ ಖಾನ್ ಈ ಸಿನಿಮಾದಲ್ಲಿ ಕೆಮಿಯೋ ರೋಲ್ ಅಂದರೆ ಅತಿಥಿ ಪಾತ್ರದಲ್ಲಿ ಅಭಿನಯಿಸಬಹುದು ಎಂದೂ ಹೇಳುತ್ತಿದ್ದರೆ. ಈ ಎಲ್ಲಾ ಅಂತೆ-ಕಂತೆಗಳಿಗೆ ಮಾರ್ಚ್ 19 ರಂದು ಸಿನಿಮಾ ಮಂದಿರದಲ್ಲೇ ಉತ್ತರ ದೊರೆಯಲಿದೆ ಎನ್ನುವುದು ಸಿನಿಮಾ ತಜ್ಞರ ಅಭಿಪ್ರಾಯವಾಗಿದೆ.
ಯಾರು ಈ ಬಡೇ ಸಾಬ್ ?
ಧುರಂಧರ್ ಸಿನಿಮಾದ ಬಹು ಚರ್ಚಿತ ಪಾತ್ರವೆಂದರೆ ಈ ಬಡೇ ಸಾಬ್ ಪಾತ್ರವಾಗಿದೆ. ಸಿನಿಮಾದ ಮೊದಲ ಭಾಗದ ಹಲವಾರು ಸನ್ನಿವೇಶಗಳಲ್ಲಿ ಈ ಪಾತ್ರದ ಕುರಿತು ವಿವರಣೆಗಳನ್ನು ನೀಡಲಾಗಿದೆ. ಆದರೆ ಈ ಪಾತ್ರ ನೈಜ ಜೀವನದ ಯಾವ ವ್ಯಕ್ತಯನ್ನು ಆಧರಿಸಿದೆ ಎಂದು ಇಲ್ಲಿಯವರೆಗೆ ತಿಳಿದು ಬಂದಿಲ್ಲ. ಆದರೆ ಈ ಪಾತ್ರದ ಕುರಿತು ಸಿನಿಮಾದಲ್ಲಿ ನೀಡಲಾದ ವಿವಿರಣೆಯ ಪ್ರಕಾರ ಈ ಪಾತ್ರವು ಭೂಗತ ಪಾತಕಿ ದಾವೂದ್ ಇಬ್ರಾಹಿಂನನ್ನು ಆಧಾರವಾಗಿಟ್ಟುಕೊಂಡು ಹೆಣೆಯಲಾದ ಪಾತ್ರವೆಂದು ಹೇಳಲಾಗುತ್ತಿದೆ.
ಧುರಂಧರ್ 2 ಟೀಸರ್ ಬಿಡುಗಡೆ
ಮಂಗಳವಾರ (ಫೆ.3) ರಣವೀರ್ ಸಿಂಗ್ ತಮ್ಮ ಇನ್ಸ್ಟಾಗ್ರಾಮ್ ಹ್ಯಾಂಡಲ್ನಲ್ಲಿ ಮುಂಬರುವ ಸೀಕ್ವೆಲ್ನ ಟೀಸರ್ನ್ನು ಬಿಡುಗಡೆ ಮಾಡಿದ್ದಾರೆ. ಈ ಟೀಸರ್ನಲ್ಲಿ ರಣವೀರ್ ಸಿಂಗ್ ಅವರ ಹಮ್ಜಾ ಪಾಕಿಸ್ತಾನದಲ್ಲಿ ಭಾರತದ ಶತ್ರುಗಳ ವಿರುದ್ಧ ಹೋರಾಡುವ ಹಲವಾರು ಝಲಕ್ಗಳಿವೆ. ಅವರು ಯೇ ನಯಾ ಹಿಂದೂಸ್ತಾನ್ ಹೈ ಯೇ ಘರ್ ಮೇ ಗುಸೇಗಾ ಭಿ ಔರ್ ಮಾರೇಗಾ ಭಿ ಎಂದು ಹೇಳುವುದನ್ನು ನಾವು ಕೇಳಬಹುದಾಗಿದೆ. ಈ ಟೀಸರ್ನಲ್ಲಿ ಅರ್ಜುನ್ ರಾಂಪಾಲ್, ಆರ್. ಮಾಧವನ್ ಮತ್ತು ಸಂಜಯ್ ದತ್ ಅವರ ಝಲಕ್ಗಳಿವೆ.
ಆದಿತ್ಯ ಧರ್ ನಿರ್ದೇಶನದ ಧುರಂಧರ್ 2 ಮಾರ್ಚ್ 19, 2026 ರಂದು ಥಿಯೇಟರ್ಗಳಲ್ಲಿ ಬಿಡುಗಡೆಯಾಗಲಿದ್ದು, ಇದೇ ದಿನ ಯಶ್ ಅವರ ಬಹುನಿರೀಕ್ಷಿತ ಚಿತ್ರ ಟಾಕ್ಸಿಕ್ ಕೂಡ ಬಿಡುಗಡೆಯಾಗಲಿದೆ. ಅಂದರೆ ಈ ದಿನ ಭಾರತೀಯ ಸಿನಿಮಾ ರಂಗದಲ್ಲಿ ಎರಡು ಮಧಗಜಗಳ ಕಾಳಗ ನಡೆಯುವುದು ನಿಶ್ಚಿತ ಎಂದು ಹೇಳಲಾಗುತ್ತಿದೆ.(ಏಜನ್ಸೀಸ್).