ವಿಮಾನ ನಿಲ್ದಾಣಗಳಲ್ಲಿ ವಿಶೇಷ ಭದ್ರತೆ ಇರುತ್ತದೆ. ಸಿಐಎಸ್ಎಫ್ ಯೋಧರು ಪ್ರತಿಯೊಬ್ಬರ ಬೋರ್ಡಿಂಗ್ ಪಾಸ್ ಹಾಗೂ ಗುರುತಿನ ಚೀಟಿ ಪರಿಶೀಲಿಸಿ ಒಳಗೆ ಬಿಡುತ್ತಾರೆ. ಬಡವ, ಶ್ರೀಮಂತ ಎನ್ನದೇ ಎಲ್ಲರೂ ಸರತಿ ಸಾಲಿನಲ್ಲಿ ನಿಂತು, ಸೆಕ್ಯೂರಿಟಿ ಚೆಕ್ಗೆ ಒಳಗಾಗಿಯೇ ನಿಲ್ದಾಣದ ಒಳಗೆ ಬರಬೇಕು. ಆದರೆ, ಇತ್ತೀಚೆಗಷ್ಟೆ ಬಾಲಿವುಡ್ ನಟಿ ಕರೀನಾ ಕಪೂರ್, ಮುಂಬೈ ವಿಮಾನ ನಿಲ್ದಾಣದಲ್ಲಿ ಸರತಿ ಸಾಲಿನಲ್ಲಿ ನಿಲ್ಲದೇ, ಜನರ ನಡುವೆಯೇ ಮುಂದಕ್ಕೆ ಬಂದು, ಸೆಕ್ಯೂರಿಟಿ ಚೆಕ್ಕಿಂಗ್ ಕೂಡ ಮಾಡಿಸಿಕೊಳ್ಳದೇ, ನೇರ ಒಳಗೆ ಪ್ರವೇಶಿಸಿದ್ದಾರೆ. ಅದರ ವಿಡಿಯೋ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಹಲವರು ಕರೀನಾ ನಡೆಯ ಬಗ್ಗೆ ಅಸಮಾಧಾನ ವ್ಯಕ್ತಪಡಿಸಿದ್ದರೆ, ಕೆಲವರು ಮುಂಬೈ ಏರ್ಪೋರ್ಟ್ ಸೆಕ್ಯೂರಿಟಿ ಸಿಬ್ಬಂದಿ ಕುರಿತು ಬೇಸರ ವ್ಯಕ್ತಪಡಿಸಿದ್ದಾರೆ.
"ಸ್ಟಾರ್ಗಳನ್ನು ಇಷ್ಟು ಹೊತ್ತು ಮೆರೆಸುವುದು ಭಾರತದಲ್ಲಿ ಮಾತ್ರ. ರಕ್ಷಣೆ ವಿಷಯ ಬಂದಾಗ ಎಲ್ಲರನ್ನೂ ಒಂದೇ ರೀತಿ ನೋಡಬೇಕು, ಒಂದೇ ರೂಲ್ ಇರಬೇಕು' ಎಂದು ಕಿವಿಮಾತು ನುಡಿದಿದ್ದಾರೆ. ಕರೀನಾ ಕಪೂರ್ ಮಾತ್ರವಲ್ಲ ಈ ಹಿಂದೆ ಸಲ್ಮಾನ್ ಖಾನ್, ಅಲ್ಲು ಅರ್ಜುನ್ ಸೇರಿ ಕೆಲ ತಾರೆಯರು ಸರತಿ ಸಾಲಿನಲ್ಲಿ ನಿಲ್ಲದೇ, ಸೆಕ್ಯೂರಿಟಿ ಚೆಕ್ಗಾಗಿ ಕಾಯದೇ ಏರ್ಪೋರ್ಟ್ ಒಳಗೆ ಹೋಗಿದ್ದು ಸುದ್ದಿಯಾಗಿತ್ತು. ಇನ್ನು ಶಾರುಖ್ ಖಾನ್, ಇರ್ಫಾನ್, ಜಾನ್ ಅಬ್ರಹಾಂ ಸೇರಿ ಕೆಲ ಸ್ಟಾರ್ಗಳನ್ನು ಅಮೆರಿಕದ ವಿವಿಧ ವಿಮಾನ ನಿಲ್ದಾಣಗಳಲ್ಲಿ ವಿಚಾರಣೆಗೂ ಒಳಪಡಿಸಲಾಗಿತ್ತು ಎಂದು ವರದಿಗಳಾಗಿದ್ದವು.