| ಶಿವು ಹುಣಸೂರು
ಯುವ ಕೃಷಿಕನೊಬ್ಬ ಅಣಬೆ ಬೇಸಾಯದ ಮೂಲಕ ಆರ್ಥಿಕವಾಗಿ ಸ್ವಾವಲಂಬನೆ ಗಳಿಸಿದ್ದಾರೆ. ಅಣಬೆ ಕೃಷಿಗೆ ಅಗತ್ಯವಾದ ಯಂತ್ರೋಪಕರಣವನ್ನೂ ತಾವೇ ಆವಿಷ್ಕರಿಸಿರುವುದು ಇವರ ಮತ್ತೊಂದು ವಿಶೇಷ. ಹುಣಸೂರು ನಗರ ಹೊರವಲಯದ ಹಾಲಗೆರೆಯ ವೆಂಕಟೇಶ್-ಗೌರಮ್ಮ ದಂಪತಿಯ ಪುತ್ರ ಸುನೀಲ್, ಅಣಬೆ ಕೃಷಿಯಲ್ಲಿ ತೊಡಗಿರುವ ಯುವಕ. ಖಾಸಗಿ ಮೊಬೈಲ್ ಕಂಪನಿಯ ಮಾರುಕಟ್ಟೆ ವಿಭಾಗದಲ್ಲಿ ಕೆಲಸಮಾಡುತ್ತಿದ್ದ ಸುನೀಲ್, ದಿನವಿಡೀ ದುಡಿದರೂ ಸಂಪಾದನೆ ಅಷ್ಟಕ್ಕಷ್ಟೇ ಇತ್ತು. ಈ ನಡುವೆ, ಅಣಬೆ ಕೃಷಿ ಬಗ್ಗೆ ಮಾಧ್ಯಮಗಳಲ್ಲಿ ಗಮನಿಸಿದ ಸುನೀಲ್, ತಾನೇಕೆ ಅಣಬೆ ಕೃಷಿ ಮಾಡಬಾರದೆಂದು ಯೋಚಿಸಿ ಹೊಸ ಕಾರ್ಯಕ್ಕೆ ಕೈಹಾಕಿದರು. ಎರಡು ವರ್ಷದ ಪರಿಶ್ರಮದಿಂದಾಗಿ ಪ್ರಸ್ತುತ ಅಣಬೆ ಕೃಷಿಯಲ್ಲಿ ಯಶಸ್ಸು ಸಾಧಿಸಿ ಮಾರುಕಟ್ಟೆಯನ್ನೂ ಕಂಡುಕೊಂಡಿದ್ದು, ಉತ್ತಮ ಲಾಭ ಗಳಿಸುತ್ತಿದ್ದಾರೆ.
ಚಿಪ್ಪು ಅಣಬೆ: ಸುನೀಲ್ ಚಿಪ್ಪು ಅಣಬೆಯ ಕೃಷಿ ಕೈಗೊಂಡಿದ್ದು, ಮೈಸೂರಿನ ತೋಟಗಾರಿಕೆ ಇಲಾಖೆಯಿಂದ ಅಣಬೆ ಬೀಜ(ಸ್ಪಾನ್) ಖರೀದಿಸುತ್ತಾರೆ. 12*18 ಇಂಚಿನ ಪಾಲಿಥಿನ್ ಕವರ್ಗಳಲ್ಲಿ ಭತ್ತದ ಹುಲ್ಲಿನ ನಡುವೆ 3&4 ಹಂತಗಳಲ್ಲಿ ಬೀಜಗಳನ್ನು ಹಾಕಿ ಕವರ್ ಮುಚ್ಚಿಡುತ್ತಾರೆ. ಉದ್ದನೆ ದಾರದಲ್ಲಿ ಮಾಡಿರುವ ಸ್ಟ್ಯಾಂಡ್ನಲ್ಲಿ ಅದನ್ನು ಇರಿಸುತ್ತಾರೆ. ಅಣಬೆ ಕೃಷಿಗೆ ಕತ್ತಲ ಕೋಣೆಯ ಅಗತ್ಯವಿರುತ್ತದೆ. ಕೋಣೆಯ ನೆಲ ಮತ್ತು ಗೋಡೆಗಳು ಮಣ್ಣಿನಿಂದ ಕೂಡಿರಬೇಕು. ಕಾರಣ ಅಣಬೆ ಬೆಳೆಯಲು ತೇವಾಂಶದ ಹವಾಮಾನ (14&16 ಡಿಗ್ರಿ ಸೆ.) ಅತ್ಯಗತ್ಯ. ಅಣಬೆ ಬೆಳೆಸಲು ಮರದ ಅಥವಾ ಇನ್ಯಾವುದೇ ಲೋಹದ ಸ್ಟಾ$್ಯಂಡ್ಗಳನ್ನು ಸುನೀಲ್ ಬಳಸುತ್ತಿಲ್ಲ. ಪ್ಲಾಸ್ಟಿಕ್ ದಾರದ ನೇತು ಹಾಕುವ ಸ್ಟ್ಯಾಂಡ್ಗಳೇ ಸಾಕಾಗುತ್ತವೆ ಎನ್ನುತ್ತಾರೆ ಅವರು. ಇದನ್ನು ನಿರ್ಮಿಸಿಕೊಳ್ಳಲು ಖರ್ಚು ಕೂಡ ಕಡಿಮೆ. ಒಮ್ಮೆ ಬೀಜಗಳನ್ನು ಕವರ್ನಲ್ಲಿ ಹಾಕಿದ ನಂತರ 20&22 ದಿನಗಳ ಕಾಲ ಬೀಜಗಳಿಗೆ ಬೆಳಕು ತಾಗಬಾರದು. 20 ದಿನಗಳ ನಂತರದ 20 ದಿನಗಳ ಕಾಲ ಅಣಬೆ ಬೆಳೆಯುತ್ತಲೇ ಇರುತ್ತದೆ.
ಗ್ರೀನ್ ಫಂಗಸ್ ರೋಗ
ಹವಾಮಾನ ವೈಪರೀತ್ಯದಿಂದಾಗಿ ಅಣಬೆಗೆ ಗ್ರೀನ್ ಫಂಗಸ್ (ಪಾಚಿರೋಗ) ತಗಲುತ್ತದೆ. ಬಾವಿಸ್ಟಿನ್ ಔಷಧವನ್ನು ಸಿರೀಂಜ್ ಮೂಲಕ ಹಸಿರು ಪಾಚಿಯಾಗಿರುವ ಸ್ಥಳಕ್ಕೆ ನೀಡಿದಲ್ಲಿ ರೋಗ ವಾಸಿಯಾಗುತ್ತದೆ.
ಆರೋಗ್ಯಪೂರ್ಣ ಆಹಾರ
ಅಣಬೆ ರುಚಿಯಷ್ಟೇ ಅಲ್ಲ, ಅತ್ಯುತ್ತಮ ಹಾಗೂ ಆರೋಗ್ಯಪೂರ್ಣ ಆಹಾರವೂ ಹೌದು. ವಿಟಮಿನ್ ಡಿ ಯುಕ್ತ, ಆ್ಯಂಟಿ ಆಕ್ಸಿಡೆಂಟ್, ರೋಗನಿರೋಧಕ ಶಕ್ತಿ ವೃದ್ಧಿಸುತ್ತದೆ. ಕ್ಯಾನ್ಸರ್ ವಿರುದ್ಧ ಹೋರಾಡಲು, ಆಟೋ ಇಮ್ಮೂನ್ ಕಾಯಿಲೆಗಳನ್ನು ನಿರ್ವಹಿಸಲು, ಆಯಿಸ್ಟರ್ ಮಶ್ರೂಮ್ ಉತ್ತಮ ಔಷಧವಾಗಿ ಪರಿಗಣಿತವಾಗಿದೆ. ಆ್ಯಂಟಿ ಮೈಕ್ರೋಬಿಯಲ್, ಆ್ಯಂಟಿ ವೈರಲ್, ರಕ್ತದಲ್ಲಿ ಸಕ್ಕರೆ ಅಂಶವನ್ನು ನಿಯಂತ್ರಿಸುವ, ಕೆಟ್ಟ ಕೊಲೆಸ್ಟ್ರಾಲ್ ಮತ್ತು ಟ್ರೆಗ್ಲಿಸರೈಡ್ಸ್ ಅಂಶ ಕಡಿಮೆ ಗೊಳಿಸುತ್ತದೆ. ಆಯಿಸ್ಟರ್ ಮಶ್ರೂಮ್ ಅನ್ನು ಒಣಗಿಸಿ ಪುಡಿ ಮಾಡಿ ಜೋಳದ ರೊಟ್ಟಿ ಜತೆಯಲ್ಲಿ ಸೇವಿಸುತ್ತಾರೆ.
ತಿಂಗಳಿಗೆ 30 ಸಾವಿರ ರೂ. ಆದಾಯ
ಒಂದು ಕೆಜಿ ಬೀಜದಲ್ಲಿ 5&6 ಕೆಜಿ ಅಣಬೆ ಇಳುವರಿ ಪಡೆಯಲು ಸಾಧ್ಯ. ಒಂದರ ನಂತರ ಒಂದರಂತೆ ಬೆಳೆ ತೆಗೆದರೆ ತಿಂಗಳಿಗೆ ಖರ್ಚು ಕಳೆದು ಕನಿಷ್ಠ 30 ಸಾವಿರ ರೂ. ಆದಾಯ ಗಳಿಸಲು ಸಾಧ್ಯವೆನ್ನುತ್ತಾರೆ ಸುನೀಲ್. ಅಣಬೆ ಕರಾವಳಿ ಭಾಗದ ಜನರ ಅಚ್ಚುಮೆಚ್ಚಿನ ಆಹಾರ. ಮೈಸೂರು ವ್ಯಾಪ್ತಿಯಲ್ಲೂ ಅಣಬೆಯನ್ನು ಆಹಾರವಾಗಿ ಬಳಸುವವರ ಸಂಖ್ಯೆ ಹೆಚ್ಚಾಗುತ್ತಿದ್ದು, ಗುಣಮಟ್ಟದ ಅಣಬೆಗೆ ಬೇಡಿಕೆ ಇದ್ದೇಇದೆ. ಸುನೀಲ್ ಅವರನ್ನು ಸಂಪರ್ಕಿಸಲು: 99648 85050
ಬ್ಯಾಚ್ ಮೂಲಕ ಬೆಳೆ
ಅಣಬೆ ಕೃಷಿಗಾಗಿ ಮೂರರಿಂದ ನಾಲ್ಕು ದಿನಗಳ ಕಾಲ ಬೆಳಗ್ಗೆ 5ರಿಂದ 9 ಗಂಟೆವರೆಗೆ ದುಡಿದರೆ ಸಾಕು. ನಂತರ 22 ದಿನ ಕೆಲಸವಿಲ್ಲ. ಬೆಳೆ ಬಂದ ಬಳಿಕ ಕಟಾವು ಮಾಡಿ ಮಾರುಕಟ್ಟೆ ಮಾಡುವ ಕಾರ್ಯ ಇರಲಿದೆ. ಸುನೀಲ್, ಮೂರು ಕೋಣೆಗಳನ್ನು ಮಾಡಿಕೊಂಡು ಒಂದರ ನಂತರ ಒಂದರಂತೆ ಬೆಳೆ ತೆಗೆಯುತ್ತಾರೆ. ಹಾಗಾಗಿ, ಇವರಲ್ಲಿ ಸದಾ ಅಣಬೆ ಸಿಗುತ್ತದೆ. ಅಣಬೆ ಕಟಾವಾದ ಕೂಡಲೇ 200 ಗ್ರಾಂ ಮತ್ತು ಅರ್ಧ ಕೆಜಿ ಪ್ಯಾಕ್ ಮಾಡಿ ಮಡಿಕೇರಿಯರೆಗೂ ಮಾಲ್ಗಳು, ದಿನಸಿ ಅಂಗಡಿಗಳಿಗೆ ಬೆಳಗ್ಗೆ 10 ಗಂಟೆಯೊಳಗೆ ಸರಬರಾಜು ಮಾಡುತ್ತಾರೆ. ಯಾಕೆಂದರೆ, ಅಣಬೆ ಆಯಸ್ಸು ಕೇವಲ ಒಂದು ದಿನ ಮಾತ್ರ.