ಮೊದ್ಲ ‘ಒಂದೂ ಗಂಡನ ಜೊತಿ ಸ್ಮಾರ್ಟ್ ಹೆಂಡ್ತಿನರ ಇರಬೇಕು ಇಲ್ಲ ಸ್ಮಾರ್ಟ್ ಫೋನರ ಇರಬೇಕು’ ಅಂತ ನಾ ಸ್ಮಾರ್ಟ್ ಫೋನ್ ತೊಗೊಂಡಿದ್ದಿಲ್ಲ, ಆದರ ಯಾವಾಗ ಕಂಪನಿಯವರ ತಮ್ಮ ಕೆಲಸಕ್ಕ ಅನಕೂಲ ಆಗಲಿ ಅಂತ ಸ್ಮಾರ್ಟ್ ಫೋನ್ ಕೊಡಸಿದರ ಆವಾಗಿಂದ ಮನಿ ಮಂದಿಗೆಲ್ಲ ಸ್ಮಾರ್ಟ್ ಫೋನ್ ಚಟಾ ಹತ್ತ. ನಮಗೆಲ್ಲ ಮಂದಿ ಫೋನನಾಗ ಆ ಸುಡಗಾಡ ಕ್ಯಾಂಡಿ ಕ್ರಶ್ ಆಡೋದ ನೋಡಿ ಕ್ರಶ್ ಆಗಿತ್ತ. ಹಿಂಗಾಗಿ ಒಂದ ಸ್ಮಾರ್ಟ್ ಫೋನ್ ಬರೋದ ತಡಾ ಎಲ್ಲಾರೂ ಕ್ಯಾಂಡಿ ಕ್ರಶ್ ಶುರು ಹಚ್ಗೊಂಡ್ವಿ.
ಅದರಾಗ ಹಿಂದಕ ಒಂದ ಸರತೆ ನನ್ನ ಹೆಂಡ್ತಿ ಮಠದವರ ಮನಿಗೆ ಅರಿಷಣ-ಕುಂಕಮಕ್ಕ ಹೋದಾಗ ಬಾಜು ಕೂತಿದ್ದ ಮುತೆôದಿಗೊಳ ಕ್ಯಾಂಡಿ ಕ್ರಶ್ ಬಗ್ಗೆ ಮಾತಾಡ್ಲಿಕತ್ತಿದ್ದರಂತ. ಪಾಪ ನನ್ನ ಹೆಂಡತಿಗಂತೂ ನನ್ನ ಮ್ಯಾಲಿನ ಕ್ರಶ್ ಬಿಟ್ಟರ ಬ್ಯಾರೆ ಕ್ರಶ್ ಗೊತ್ತಿದ್ದಿದ್ದಿಲ್ಲಾ. ‘ನಾ ಇಷ್ಟನೇ ಲೇವಲ್ವಾ, ನಿಂದ ಎಷ್ಟನೇ ಲೆವಲ್?’ ಅಂತ ಅವರ ಮಾತಾಡೋದ ಕೇಳಿ ಇಕಿ ತಲಿಕೆಟ್ಟ ಹೋತ. ಅದರಾಗ ಉಮಾ ಆಂಟಿ, ‘ಪ್ರೇರಣಾ ನಿಂದ ಯಾ ಲೇವಲ್’ ಅಂತ ಕೇಳಿದರಂತ. ಪಾಪ ಇಕಿ ಕಡೆ ನೋಡಿದರ ಸ್ಮಾರ್ಟ್ ಫೋನ್ ಇರಲಿಲ್ಲ.
‘ಇಲ್ಲರಿ ನನ್ನ ಕಡೆ ಸ್ಮಾರ್ಟ್ ಫೋನ್ ಇಲ್ಲ’ ಅಂತ ಅಂದ ಕೂಡ್ಲೆ ಅವರ ಇಕಿದ ಲೇವಲ್ ತಿಳ್ಕೊಂಡ ನಕ್ಕ ಬಿಟ್ಟರಂತ. ನನ್ನ ಹೆಂಡ್ತಿ ಅದನ್ನ ಪರ್ಸನಲ್ ತೊಗೊಂಡ ‘ನನ್ನ ಕಡೆ ಸ್ಮಾರ್ಟ್ ಫೋನ್ ಇಲ್ಲ, ಅರಿಷಣ ಕುಂಕಮಕ್ಕ ಹೋದಲ್ಲೆಲ್ಲ ಅಸಂಯ್್ಯ ಆಗತದ. ಸ್ಮಾರ್ಟ್ ಫೋನ್ ಕೊಡಸಲಿಲ್ಲಾಂದರ ಇನ್ನ ಮುಂದ ನಾ ಅರಿಷಣ ಕುಂಕಮಕ್ಕ ಹೋಗಂಗಿಲ್ಲ’ ಅಂತ ಹಟಾ ಮಾಡಿ ಅಕಿನೂ ಒಂದ ಫೋನ್ ತೊಗೊಂಡ ಕ್ಯಾಂಡಿ ಕ್ರಶ್ ಉದ್ಘಾಟನೆ ಮಾಡಿದ್ಲು.
ಯಾವಾಗಿಂದ ಅಕಿದ ಕ್ಯಾಂಡಿ ಕ್ರಶ್ ಶುರು ಆತ ಅಕಿಗೆ ನನ್ನ ಮ್ಯಾಲಿನ ಕ್ರಶ್ ಕಡಮಿ ಆತ, ಸ್ಮಾರ್ಟ್ ಫೋನ್ ಬಂದ ಮ್ಯಾಲೆ ಸ್ಮಾರ್ಟನಿ ಗಂಡನ್ನು ಮರತ್ಲು, ಮನಿ ಕೆಲಸಾನೂ ಬಿಟ್ಲು. ಇತ್ತಲಾಗ ನಮ್ಮವ್ವಾ ರಾತ್ರಿ ನಿದ್ದಿ ಬರಂಗಿಲ್ಲಾ ಅಂತ ಟ್ಯಾಬ್ ಕೊಡಿಸಿಕೊಂಡ ಅಕಿನೂ ಕ್ಯಾಂಡಿ ಕ್ರಶ್ ಶುರು ಮಾಡಿದ್ಲು, ಅತ್ತಲಾಗ ಮಕ್ಕಳು ಆನ್ಲೈನ್ ಕ್ಲಾಸ್ ಅಂತ ಮೊಬೈಲ್ ಹಿಡ್ಕೊಂಡ ಆಡ್ಲಿಕತ್ತರು.
ನಮ್ಮವ್ವಂತು ‘ಒಗ್ಗರಣಿ ಹೊತ್ತೇದಲ್ವಾ... ನೀ ಏನ ಮಾಡ್ಲಿಕತ್ತಿದ್ದಿ?’ ಅಂದರ ಅಗದಿ ಕ್ಲೀಯರ್ ಆಗಿ ‘ನಾ ಕ್ಯಾಂಡಿ ಕ್ರಶ್ ಆಡಲಿಕತ್ತಿದ್ದೆ’ ಅಂತ ಹೇಳೋಕಿ...‘ನೀನರ ನೋಡಬೇಕಿಲ್ಲ?’ ಅಂದರ ನನ್ನ ಹೆಂಡ್ತಿ, ‘ನಂಗೇನ ಗೊತ್ತರಿ ಅವರ ಒಗ್ಗರಣಿ ಹೊತ್ತಿದ್ದ.. ನನ್ನಷ್ಟಕ್ಕ ನಾ ಸುಮ್ಮನ ಕ್ಯಾಂಡಿ ಕ್ರಶ್ ಆಡ್ಕೊತ ಕೂತಿದ್ದೆ’ ಅಂತ ಅನ್ನೋಕಿ. ಯಾರಿಗೂ ಏನೂ ಅನ್ನೋಹಂಗ ಇಲ್ಲ. ಕಡಿಕೆ ತಲಿಕೆಟ್ಟ ನಾ ಟೆನ್ಶನ್ ತೊಗೊಂಡ relieve your stress ಅಂತ ನಾನೂ ಒಂದ್ಯಾರಡ ಲೇವಲ್ ಕ್ಯಾಂಡಿ ಕ್ರಶ್ ಆಡಿ ಸ್ಟ್ರೆಸ್ ರೀಲೀವ್ ಮಾಡ್ಕೊಳೊಂವಾ.
ಇದ ನಮ್ಮನಿದ ಒಂದ ಕಥಿ ಅಲ್ಲಾ. ಜಗತ್ತಿನಾಗ ಭಾಳ ಮನ್ಯಾಗ ಇದ ಹಣೆಬರಹ. ಇವತ್ತ ‘ಕ್ಯಾಂಡಿ ಕ್ರಶ್’ ಆಡಲಾರದ ಮನಿ ಇಲ್ಲ ಅಂತ ಅಂದರೂ ಅಡ್ಡಿಯಿಲ್ಲ. ನಮ್ಮ ಮನಿ ಬಾಜು ಹುಡುಗಿ ಅಂತೂ ಕಾಲೇಜ್ ಬಸ್ ವಾರಕ್ಕ ಮೂರ ಸರತೆ ಮಿಸ್ ಮಾಡ್ಕೊಳೊಕಿ. ಕಡಿಕೆ ಬಸ್ ಸ್ಟಾಪ್ ಮುಂದ ನಾ ಹೋಗಬೇಕಾರ ‘ಮಾಮಾ ಡ್ರಾಪ್ ಕೊಡ’ ಅನ್ನೋಕಿ, ‘ಯಾಕ ಕಾಲೇಜ್ ಬಸ್ ಏನಾತ?’ ಅಂದರ, ‘ಏ ಅದ ಯಾವಾಗ ಬಂತ ಯಾವಾಗ ಹೋತ ಗೊತ್ತಾಗಲಿಲ್ಲ?’ ಅನ್ನೋಕಿ. ‘ಬಸ್ ಬಂದಾಗ ನೀ ಏನ್ ಮಾಡ್ಲಿಕತ್ತಿದ್ದಿ? ಅಂತ ಕೇಳಿದರ. ಅಗದಿ ಹಲ್ಲ ತಗದ ‘ನಾ ಬಸ್ ಬರೋತನಕಾ ಅಂತ ಕ್ಯಾಂಡಿ ಕ್ರಶ್ ಆಡ್ಲಿಕತ್ತಿದ್ದೆ’ ಅನ್ನೋಕಿ.
ನನ್ನ ತಂಗಿ ಮಗಾ ತನ್ನ ಐದನೇ ವರ್ಷದ ಹುಟ್ಟಿದ ಹಬ್ಬಕ್ಕ ಕ್ಯಾಂಡಿ ಕ್ರಶ್ ಕೇಕ್ ಬೇಕಂತ ಹಟಾ ಮಾಡಿ ಮಾಡಿಸ್ಗೊಂಡ ಅದರಾಗ ಮೂರ ಕಲರ್ ಬಾಂಬ್ ಸಾಲಕ ಇಟಗೊಂಡ ಕೇಕ್ ಕಟ್ ಮಾಡಿದಾ, ಏನಂತಿರಿ?
ಇವತ್ತ ಜಗತ್ತಿನಾಗ ಇಷ್ಟ ಜನಾ ಇದಕ್ಕ ಅಡಿಕ್ಟ್ ಆಗ್ಯಾರ ಅಂದರ ಅದರಿಂದ ಮುಕ್ತಿ ಹೊಂದಲಿಕ್ಕೆ ಫಾರೇನದಾಗ rehabilitation center for candy crush addicts ಅಂತ ಶುರು ಮಾಡ್ಯಾರ. ನಾ ವಾರದಾಗ ಒಂದ ಸರತೆ ಬಿಟ್ಟ ಮೂರ ಸರತೆ occasionally ಹೊರಗ ಪಾರ್ಟಿಗೆ ಹೋದರ ನನ್ನ ಹೆಂಡ್ತಿ ‘ಯಾಕ ಭಾಳ ಜೋರ ನಡದದಲಾ rehabilitation centerಗೆ ಅಡ್ಮಿಟ್ ಮಾಡಸಬೇಕಿನ?’ ಅಂತ ನಂಗ ಟಾಂಟ್ ಹೊಡಿತಾಳ. ತಾ ನೋಡಿದರ ದಿನಕ್ಕ ಮೂರ ಮೂರ ತಾಸ ಕ್ಯಾಂಡಿ ಕ್ರಶ್ ಆಡ್ತಾಳ. ಮ್ಯಾಲೆ ಕ್ಯಾಂಡಿ ಕ್ರಶ್ ಒಳಗ ತನ್ನ ಲೈಫ್ ಕಡಮಿ ಆದರ ಮತ್ತೊಬ್ಬರಿಗೆ ಲೈಫ್ ಉದ್ರಿ ಕೇಳ್ತಾಳ. ‘ನಂದ ಖಾಲಿ ಆದಾಗ ನೀ ಕೊಡ, ನಿಂದ ಖಾಲಿ ಆದಾಗ ನಾ ಕೋಡ್ತೇನಿ’ ಅಂತಾಳ. ಅಲ್ಲಾ ಒಂದ ಕಾಲದಾಗ ಜನಾ ಹೆಪ್ಪಿಗೆ ಮೊಸರು, ಪಾನಕಕ್ಕ ಲಿಂಬೆಹಣ್ಣು, ಚಹಾಕ್ಕ ಸಕ್ಕರಿ ಕಡಾ ಇಸ್ಗೊಂಡ ಬರ್ತಿದ್ದರು ಈಗ ಕ್ಯಾಂಡಿ ಕ್ರಶದ್ದ ಲೈಫ್ ಕಡಾ ಇಸ್ಗೋತಾರ.
ನಮ್ಮಕ್ಕ ಒಬ್ಬೋಕಿ ಇದ್ದಾಳ, ಅಕಿ ಅಂತೂ ನಮ್ಮ ಸಂಬಂಧಿಕರ ಒಳಗ ಎಲ್ಲಾರ ಕಡೆನೂ ಸಾಲಾ ಮಾಡ್ಯಾಳ..ರೊಕ್ಕಾ ಅಲ್ಲ ಮತ್ತ ಕ್ಯಾಂಡಿ ಕ್ರಾ್ಯಶ ಲೈವ್ಸ್. ಮುಂದ ಯಾವಾಗ ಅಕಿಗೆ ಇನ್ನ ಯಾರು ಕಡಾ ಕೊಡಂಗಿಲ್ಲಾ ಅಂತ ಗೊತ್ತಾತ ಆವಾಗಿಂದ ಅಕಿ candy crush next level after 30 mins ಅಂದಾಗೊಮ್ಮೆ ತನ್ನ ಮೊಬೈಲದ್ದ ಟೈಮ್ ಚೇಂಜ್ ಮಾಡಿ ಲೈಫ್ ತೊಗೊತಾಳ. ಮತ್ತ ಲೈಫ್ ಮುಗಿತ, ಮತ್ತ ಮೊಬೈಲ್ ಟೈಮ್ ಚೇಂಜ್ ಮಾಡ್ತಾಳ. ಹಿಂಗ ಮಾಡ್ತ..ಮಾಡ್ತ, ಟೈಮ್ ಡೇಟ್, ಮಂತ್, ಇಯರ್ ಚೇಂಜ್ ಮಾಡ್ಕೊತ ಇವತ್ತ ಅಕಿ ಮೊಬೈಲದ ಡೇಟ್ 10.04.2100ಕ್ಕ ಮುಟ್ಟೇದ. ಇಷ್ಟ ಮಾಡಿನೂ ಅಕಿ ಇನ್ನೂ ಕ್ಯಾಂಡಿ ಕ್ರಶ್ ಒಳಗ 2020 level ದಾಟಿಲ್ಲಾ ಆ ಮಾತ ಬ್ಯಾರೆ.
ಇನ್ನ ನನ್ನ ಮಗಳ ಅಂತೂ ಒಮ್ಮೊಮ್ಮೆ ಬರೇ ಒಂದ ಜೆಲ್ಲಿ ಇದ್ದಾಗ ಅದು nightmerishly hard level ಒಳಗ ಮೂವ್ಸ್ ಮುಗದ ಬಿಟ್ಟರ ಕಣ್ಣಾಗ ನೀರ ತಗಿತಾಳ. ನೋಡಿದವರ ಅಗದಿ ಏನಾತೋ ಅನ್ನಬೇಕ ಅಷ್ಟ ದುಃಖ ಉಕ್ಕಿ ಬಂದಿರತದ.
ನಮ್ಮ ದೋಸ್ತ್ ಒಬ್ಬೊಂವ ಇದ್ದಾನ, ಅಗದಿ ಕ್ಯಾಂಡಿ ಕ್ರಶ್ ಭಕ್ತ. ಅಂವಾ ಅಂತೂ ಮುಂಜಾನೆ ಎದ್ದ ಕೂಡಲೇ ಮೊಬೈಲ್ ಹಿಡ್ಕೊಂಡ ಬಾತ್ರೂಮಿಗೆ ಹೋಗ್ತಾನ. ಒಂದ ಐದ ಲೇವಲ್ ದಾಟೋ ಮಟಾ ಅವಂದ ಹೊಟ್ಟಿ ಸ್ವಚ್ಛ ಆಗಂಗಿಲ್ಲಾ.
ಒಟ್ಟ ಮಂದಿ ಒಂದ ಚೂರ ಟೈಮ್ ಸಿಗ್ತಿಲ್ಲೊ ಕ್ಯಾಂಡಿ ಕ್ರಶ್ ಹಿಡ್ಕೊಂಡ ಕೂಡ್ತಾರ. ಕಾಪೋರೇಟ್ ಆಫೀಸನಾಗ ಡೇಲಿ ಮೀಟಿಂಗ್ನಿಂದ ಹಿಡದ ಕಟಿಂಗ್ ಅಂಗಡಿ ಒಳಗ ಕಟಿಂಗ್ ಮಾಡಿಸ್ಗೊಬೇಕಾರ ಸಹಿತ ಆಡ್ತಾರ ಅಂದರ ವಿಚಾರ ಮಾಡ್ರಿ ಜನರಿಗೆ ಎಷ್ಟ ಕ್ರಶ್ ಅದ ಈ ಕ್ಯಾಂಡಿ ಕ್ರಶದ್ದ ಅಂತ.
ಅನ್ನಂಗ ಇವತ್ತ ಎಲ್ಲ ಬಿಟ್ಟ ಈ ವಿಷಯ ಯಾಕ ಬಂತು ಅಂದರ ನಾಡದ ಅಂದರ ಏಪ್ರಿಲ್ 12ಕ್ಕ ಕ್ಯಾಂಡಿ ಕ್ರಶ್ ಆಫಿಸಿಯಲಿ ರೀಲೀಸ್ ಆಗಿ ಒಂಬತ್ತ ವರ್ಷಾತ. ಅಂದರ ಒಂಬತ್ತ ತುಂಬಿ ಹತ್ತರಾಗ ಬಿತ್ತ ಅನ್ನರಿ. ಹಂಗ ಅದೇನ ದಿಂದಾಗಿಲ್ಲಾ, ಅದಕ್ಕೇನ ಡಿಲೇವರಿ ಆಗಂಗಿಲ್ಲಾ ಆದರ ಹಿಂದ ಬಿದ್ದ ನಮ್ಮ ನಾರ್ಮಲ್ ಲೈಫ್ ಸಿಜರಿನ್ ಆಗಲಿಕತ್ತದ ಇಷ್ಟ್. ಅನ್ನಂಗ ಇನ್ನೊಂದ ಕೇಳೋದ ಮರತೆ, ನೀವ ಎಷ್ಟನೇ ಲೇವಲಗೆ ಇದ್ದೀರಿ ಕ್ಯಾಂಡ್ರಿ ಕ್ರಶ್ ಒಳಗ? ಹಂಗೇನರ ಲೈಫ್ ಬೇಕಂದರ ಕೇಳ್ರಿ ನನಗ, ಕಡಾ ಕೊಡ್ತೇನಿ.
(ಲೇಖಕರು ಹಾಸ್ಯ ಬರಹಗಾರರು)