ನವದೆಹಲಿ: ಆಸ್ಟ್ರೇಲಿಯಾ ಕ್ರಿಕೆಟ್ನ ಸ್ಪೋಟಕ ಆರಂಭಿಕ ಆಟಗಾರ ಡೇವಿಡ್ ವಾರ್ನರ್ ಅವರ ಭಾರತ ಪ್ರೀತಿ ಎಲ್ಲರಿಗೂ ಗೊತ್ತಿರುವಂಥದ್ದೆ. ಆಗಾಗ ಮಾತಿನ ಮೂಲಕ ಭಾರತವನ್ನು ಹೊಗಳುವ ವಾರ್ನರ್, ಇದೀಗ ಬಾಲಿವುಡ್ ಚಿತ್ರದ ಐಟಂ ಸಾಂಗ್ ಒಂದಕ್ಕೆ ತಮ್ಮ ಮಗಳೊಂದಿಗೆ ಸೇರಿ ಹೆಜ್ಜೆ ಹಾಕಿರುವುದು ಮತ್ತೊಮ್ಮೆ ಭಾರತೀಯರೆಡೆಗಿನ ಪ್ರೀತಿಗೆ ಸಾಕ್ಷಿಯಾಗಿದೆ.
ಸದ್ಯ ಏನು ನಡೆಯುತ್ತಿದೆ ಎಂಬುದರ ಐಡಿಯಾ ನನಗಿಲ್ಲ. ಆದರೆ, ಟಿಕ್ಟಾಕ್ ಮಾಡುವಂತೆ ನನ್ನ 5 ವರ್ಷದ ಮಗಳು ಹೇಳಿದಳು ಎನ್ನುತ್ತಾ ಇತ್ತೀಚೆಗಷ್ಟೇ ಟಿಕ್ಟಾಕ್ ಲೋಕಕ್ಕೆ ವಾರ್ನರ್ ಕಾಲಿಟ್ಟಿದ್ದರು. ಇದನ್ನು ತಮ್ಮ ಇನ್ಸ್ಟಾಗ್ರಾಂನಲ್ಲಿ ಖಚಿತಪಡಿಸಿದ್ದರು.
ಮತ್ತೊಂದು ಟಿಕ್ಟಾಕ್ ವಿಡಿಯೋದಲ್ಲಿ ಶೂನ್ಯ ಹಿಂಬಾಲಕರು ಇದ್ದಾರೆ. ಯಾರಾದರೂ ನನಗೆ ಸಹಾಯ ಮಾಡಿ ಎನ್ನುತ್ತಾ ತಮ್ಮ ಮಗಳೊಂದಿಗೆ ನಟಿ ಕತ್ರಿನಾ ಕೈಫ್ ಸೊಂಟ ಬಳುಕಿಸಿರುವ ಬಾಲಿವುಡ್ ಸೂಪರ್ ಹಿಟ್ ಶೀಲಾ ಕಿ ಜವಾನಿ ಹಾಡಿಗೆ ಹೆಜ್ಜೆ ಹಾಕಿದ್ದಾರೆ.
ಇದರ ಒಂದು ಝಲಕ್ ಅನ್ನ ಇನ್ಸ್ಟಾಗ್ರಾಂನಲ್ಲಿ ವಾರ್ನರ್ ಹಂಚಿಕೊಂಡಿದ್ದು, ಕೆಲವೇ ಗಂಟೆಗಳಲ್ಲಿ 250,000 ವೀಕ್ಷಣೆ ಪಡೆದುಕೊಂಡಿದೆ.
ಇನ್ನು ಕ್ರಿಕೆಟ್ ವಿಚಾರಕ್ಕೆ ಬಂದರೆ ಕರೊನಾ ಲಾಕ್ಡೌನ್ ಇರದಿದ್ದರೆ ಇಷ್ಟೋತ್ತಿಗೆ ಐಪಿಎಲ್ 2020 ಆವೃತ್ತಿಯಲ್ಲಿ ಸನ್ ರೈಸರ್ಸ್ ಹೈದರಾಬಾದ್ ತಂಡವನ್ನು ವಾರ್ನರ್ ಮುನ್ನೆಡೆಸಬೇಕಾಗಿತ್ತು. ಆದರೆ, ಲಾಕ್ಡೌನ್ನಿಂದಾಗಿ ಐಪಿಎಲ್ ವಿಳಂಬಾವಗಿದ್ದು, ಯಾವಾಗ ಶುರುವಾಗುತ್ತೆ ಎಂಬುದರ ಬಗ್ಗೆ ಇನ್ನೂ ಅಧಿಕೃತ ಮಾಹಿತಿ ಬಂದಿಲ್ಲ.
ಮಾರ್ಚ್ 29ರಂದು ಆರಂಭವಾಗಬೇಕಿದ್ದ ಟೂರ್ನಿ, ಏಪ್ರಿಲ್ 15ಕ್ಕೆ ಮುಂದೂಡಲಾಗಿತ್ತು. ಆದರೆ, ಕರೊನಾ ಹಾವಳಿ ಕಡಿಮೆಯಾಗದ ಕಾರಣ ಲಾಕ್ಡೌನ್ ಮೇ 3ರವರೆಗೆ ವಿಸ್ತರಣೆಯಾಗಿದ್ದು, ಐಪಿಎಲ್ ಟೂರ್ನಿಯನ್ನು ಅನಿರ್ಧಿಷ್ಟಾವಧಿ ವರೆಗೆ ಮುಂದೂಡಲಾಗಿದೆ. (ಏಜೆನ್ಸೀಸ್)