ಅಪರಿಚಿತರಿಬ್ಬರಿಂದ ತೋಪಿನಲ್ಲಿ ಗಂಟೆಗಟ್ಟಲೆ ನಿರಂತರ ಅತ್ಯಾಚಾರ; ದೂರು ದಾಖಲಾಗಿ 10 ದಿನವಾದ್ರೂ ಕ್ರಮಕೈಗೊಳ್ಳದ್ದಕ್ಕೆ ಸಂತ್ರಸ್ತೆಯ ಪಾಲಕರ ಬೇಸರ

ಬೆಂಗಳೂರು: ಯುವತಿಯೊಬ್ಬಳನ್ನು ಡ್ರಾಪ್​ ಕೊಡುವುದಾಗಿ ನಂಬಿಸಿ ಬೈಕ್​ನಲ್ಲಿ ಕರೆದೊಯ್ದ ಅಪರಿಚಿತರು ಬಳಿಕ ಆಕೆಯನ್ನು ತೋಪೋಂದಕ್ಕೆ ಒಯ್ದು ಅತ್ಯಾಚಾರ ಮಾಡಿದ್ದರು. ಬೆಂಗಳೂರು ಗ್ರಾಮಾಂತರ ಜಿಲ್ಲೆ ಹೊಸಕೋಟೆ ಹೊರವಲಯದ ನೀಲಗಿರಿ ತೋಪಿನಲ್ಲಿ ಈ ಅತ್ಯಾಚಾರ ನಡೆದಿತ್ತು.

38 ವರ್ಷದ ಅವಿವಾಹಿತೆ ಮೇಲೆ ನ. 14ರಂದು ಅಪರಿಚಿತರು ಅತ್ಯಾಚಾರ ಎಸಗಿದ್ದರು. ಅಂದು ವಾಕಿಂಗ್ ಮುಗಿಸಿ ಮರಳುತ್ತಿದ್ದ ಆಕೆಯನ್ನು ಮನೆ ಬಳಿ ಬಿಡುವುದಾಗಿ ಹೇಳಿ ಬೈಕ್​ನಲ್ಲಿ ಕೂರಿಸಿಕೊಂಡಿದ್ದ ಆರೋಪಿಗಳು ಈ ಕೃತ್ಯವೆಸಗಿದ್ದರು.

ಇದನ್ನೂ ಓದಿ: ಮುದ್ದಾದ ಗಂಡು ಮಗುವಿಗೆ ಜನ್ಮವಿತ್ತ ಮೂರೇ ದಿನಕ್ಕೆ ಅಮ್ಮ ಇನ್ನಿಲ್ಲ; ಸಿಜೇರಿಯನ್ ಮಾಡಿದ ವೈದ್ಯರ ನಿರ್ಲಕ್ಷ್ಯ ಎಂದು ಪಾಲಕರ ಆರೋಪ

ಪ್ರತ್ಯೇಕ ಬೈಕ್​​ಗಳಲ್ಲಿ ಬಂದಿದ್ದ ಅಪರಿಚಿತರು ಆಕೆಯನ್ನು ತೋಪಿಗೆ ಕರೆದೊಯ್ದು ಮಧ್ಯರಾತ್ರಿ ವರೆಗೂ ಅತ್ಯಾಚಾರ ಎಸಗಿದ್ದರು. ಬಳಿಕ ಆಕೆಯನ್ನು ಅಲ್ಲಿಯೇ ಬಿಟ್ಟು ಪರಾರಿಯಾಗಿದ್ದರು. ಇತ್ತ ರಾತ್ರಿ ಹತ್ತು ಗಂಟೆಯಾದರೂ ಮಗಳು ಮನೆಗೆ ಬರದ್ದರಿಂದ ಪಾಲಕರು ಪೊಲೀಸ್​ ಠಾಣೆಗೆ ನಾಪತ್ತೆ ದೂರು ನೀಡಿದ್ದರು.

ನಂತರ ಸ್ಥಳೀಯರ ಸಹಾಯದಿಂದ ಸಂತ್ರಸ್ತೆ ತೋಪಿನಿಂದ ಮನೆಗೆ ಮರಳಿದ್ದರು. ಮುಂಜಾನೆ ಮೂರು ಗಂಟೆ ಸುಮಾರಿಗೆ ಮನೆಗೆ ಬಂದ ಮಗಳನ್ನು ವಿಚಾರಿಸಿದಾಗ ಅತ್ಯಾಚಾರ ಪ್ರಕರಣ ತಿಳಿದುಬಂದಿತ್ತು. ಈ ಸಂಬಂಧ ಸಂತ್ರಸ್ತೆಯ ತಂದೆ ಹೊಸಕೋಟೆ ಪೊಲೀಸರಿಗೆ ನ. 15ರಂದು ದೂರು ನೀಡಿದ್ದರು.

ಇದನ್ನೂ ಓದಿ: ಗಂಡ-ಹೆಂಡಿರ ಬೇರೆ ಮಾಡಿ ತಾನು ಅಕ್ರಮ ಸಂಬಂಧ ಹೊಂದಿದ ಪೊಲೀಸ್; ನೇಣು ಹಾಕಿದ ಸ್ಥಿತಿಯಲ್ಲಿ ಆಕೆಯ ಶವ ಪತ್ತೆ, ಕಾನ್​ಸ್ಟೆಬಲ್ ಪರಾರಿ..

ನ. 16ರಂದು ಸಂತ್ರಸ್ತೆಯನ್ನು ವೈದ್ಯಕೀಯ ಪರೀಕ್ಷೆಗೆ ಒಳಪಡಿಸಿದ್ದ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದರು. ಆದರೆ ಪ್ರಕರಣ ದಾಖಲಾಗಿ ಹತ್ತು ದಿನಗಳು ಕಳೆದರೂ ಯಾವುದೇ ಕ್ರಮ ಜರುಗಿಲ್ಲ ಎಂದು ಸಂತ್ರಸ್ತೆಯ ಪಾಲಕರು ತೀವ್ರ ಬೇಸರ ವ್ಯಕ್ತಪಡಿಸಿದ್ದಾರೆ.

https://www.vijayavani.net/he-was-ips-officer-now-working-as-security-officer/

https://www.vijayavani.net/person-who-faced-big-loss-in-cryptocurrency-committed-suicide/