ವಾಷಿಂಗ್ಟನ್: ಚೀನಾ ಮೂಲದ ವಿಡಿಯೋ ಷೇರಿಂಗ್ ಆಪ್ ಟಿಕ್ಟಾಕ್ ನಿಷೇಧಿಸಲು ಚಿಂತನೆ ನಡೆಸಿರುವುದಾಗಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತಿಳಿಸಿದ್ದಾರೆ. ನಾವು ಟಿಕ್ಟಾಕ್ನತ್ತ ಗಮನ ಹರಿಸಿದ್ದೇವೆ. ಅದನ್ನು ನಿಷೇಧಿಸಲು ಚಿಂತನೆ ನಡೆಸಿದ್ದೇವೆ. ಹಾಗೆಯೇ ಕೆಲವು ಕಠಿಣ ಕ್ರಮಗಳನ್ನು ಕೈಗೊಳ್ಳಲಾಗುವುದೆಂದು ಅವರು ಶನಿವಾರ ಪುನರುಚ್ಚರಿಸಿದ್ದಾರೆ.
ಆಪ್ ಬಳಕೆದಾರರ ಮಾಹಿತಿ ನಿರ್ವಹಣೆ ಮತ್ತು ರಾಷ್ಟ್ರೀಯ ಭದ್ರತೆ ಬಗ್ಗೆ ಕಳೆದ ತಿಂಗಳಷ್ಟೇ ಕಳವಳ ವ್ಯಕ್ತಪಡಿಸಿದ್ದ ಅಮೆರಿಕ ವಿದೇಶಾಂಗ ಕಾರ್ಯದರ್ಶಿ ಮೈಕ್ ಪಾಂಪಿಯೊ, ಟಿಕ್ಟಾಕ್ ಸೇರಿ ಚೀನಾದ ಹಲವು ಮೊಬೈಲ್ ಅಪ್ಲಿಕೇಷನ್ ನಿಷೇಧಿಸುವ ಚಿಂತನೆ ಆರಂಭಿಸಿರುವುದಾಗಿ ಹೇಳಿದ್ದರು. ಟಿಕ್ಟಾಕ್, ವಿ ಚಾಟ್ ಸೇರಿದಂತೆ ಭಾರತ ಈಗಾಗಲೇ 100ಕ್ಕೂ ಹೆಚ್ಚು ಚೀನಾ ಆಪ್ಗಳನ್ನು ನಿರ್ಬಂಧಿಸಿದೆ.
ಇದನ್ನೂ ಓದಿ: PHOTOS: ಶ್ರೀರಾಮಮಂದಿರ ನಿರ್ಮಾಣಕ್ಕೆ ಶಿಲಾನ್ಯಾಸದ ತಯಾರಿ ಸಂಭ್ರಮದಲ್ಲಿ ಜಗಮಗಿಸುತ್ತಿದೆ ಅಯೋಧ್ಯೆ
ಮೈಕ್ರೋಸಾಫ್ಟ್ ತೆಕ್ಕೆಗೆ ಟಿಕ್ಟಾಕ್?: ಅಮೆರಿಕದಲ್ಲಿ ಚೀನಾ ಆಪ್ಗಳನ್ನು ನಿಷೇಧಿಸುವ ಕುರಿತು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮುನ್ನಡಿ ಇಟ್ಟಿರುವಂತೆಯೇ ಖ್ಯಾತ ಟೆಕ್ ದಿಗ್ಗಜ ಮೈಕ್ರೋಸಾಫ್ಟ್, ಬೈಟ್ಡಾನ್ಸ್ ಒಡೆತನದಲ್ಲಿರುವ ಟಿಕ್ಟಾಕ್ ಖರೀದಿಸಲು ಪ್ರಯತ್ನ ಆರಂಭಿಸಿರುವುದಾಗಿ ತಿಳಿದು ಬಂದಿದೆ. ಅಮೆರಿಕದಲ್ಲಿ ಟಿಕ್ಟಾಕ್ ಕಾರ್ಯಾಚರಣೆ ಮುಂದುವರಿಸುವ ಹಕ್ಕನ್ನು ಪಡೆದುಕೊಳ್ಳಲು ಮೈಕ್ರೋಸಾಫ್ಟ್ ಚಿಂತನೆ ನಡೆಸಿದ್ದು, ಈ ಸಂಬಂಧ ಮಾತುಕತೆ ಕೂಡ ನಡೆಯುತ್ತಿರುವುದಾಗಿ ಮೂಲಗಳು ತಿಳಿಸಿವೆ.
ಇದನ್ನೂ ಓದಿ: ತ್ರಿಪುರಾದಲ್ಲಿ ಮರುಸಂಘಟನೆಗೆ ಬಂಡುಕೋರರ ಪ್ರಯತ್ನ: ಮಾಣಿಕ್ ಸರ್ಕಾರ್ ಹೊಸ ರಾಜಕೀಯ ವರಸೆ
ಈಗಾಗಲೇ ಭಾರತದಲ್ಲಿ ಟಿಕ್ಟಾಕ್ ನಿಷೇಧಗೊಂಡಿರುವುದರಿಂದ ಅಮೆರಿಕದಲ್ಲೂ ಆಂತರಿಕ ಭದ್ರತೆ ಕಾರಣಕ್ಕೆ ನಿಷೇಧ ಸಾಧ್ಯತೆ ದಟ್ಟವಾಗುತ್ತಿದೆ. ಈ ಹಿನ್ನೆಲೆಯಲ್ಲಿ ಟಿಕ್ಟಾಕ್ ಅನ್ನು ಮೈಕ್ರೋಸಾಫ್ಟ್ಗೆ ನೀಡಲು ಬೈಟ್ಡಾನ್ಸ್ ಒಪ್ಪಿಗೆ ಸೂಚಿಸುವ ಸಾಧ್ಯತೆ ಹೆಚ್ಚಿರುವುದಾಗಿ ಹೇಳಲಾಗುತ್ತಿದೆ.
ವಿಶ್ವಾದ್ಯಂತ 80 ಕೋಟಿ ಟಿಕ್ಟಾಕ್ ಬಳಕೆದಾರರಿದ್ದಾರೆ. ಆದರೆ ಟಿಕ್ಟಾಕ್ನ ಸುರಕ್ಷತೆ ಬಗ್ಗೆಯೇ ಗುಮಾನಿ ಎದ್ದಿದೆ. ಟಿಕ್ಟಾಕ್ ಮೊಬೈಲ್ನಿಂದ ಪ್ರತಿ 30 ಸೆಕೆಂಡಿಗೆ ಒಮ್ಮೆ ಲೊಕೇಷನ್ಗೆ ಸಂಬಂಧಿಸಿದ ಮಾಹಿತಿ ರವಾನೆ ಮಾಡುತ್ತದೆಯಂತೆ. ಜತೆಗೆ ಐಪಿ ವಿಳಾಸ, ವೈಫೈ ಆಕ್ಸೆಸ್ ಪಾಯಿಂಟ್ಗಳ ಹೆಸರನ್ನೂ ಕದ್ದು ಕಳುಹಿಸುತ್ತದೆ ಎಂಬ ಅಪವಾದವಿದೆ. ಈ ಎಲ್ಲ ಕಾರಣಗಳಿಗಾಗಿಯೇ ಭಾರತ ಈ ಆಪ್ ನಿರ್ಬಂಧಿಸಿದೆ. (ಏಜೆನ್ಸೀಸ್)
ರಾಷ್ಟ್ರೀಯ ಶಿಕ್ಷಣ ನೀತಿಯ ತಿರಳು ಎಲ್ಆರ್ಐ : ಪ್ರಧಾನಿ ನರೇಂದ್ರ ಮೋದಿ