ಬೆಂಗಳೂರು: ಚೀನಾದಲ್ಲಿ ಸಾವಿರಾರು ಜೀವಗಳನ್ನು ಬಲಿ ತೆಗೆದುಕೊಂಡ ಕರೊನಾ ವೈರಸ್ ದೇಶ ಮತ್ತು ರಾಜ್ಯಕ್ಕೆ ಬಂದಾಗಿದೆ. ಬೆಂಗಳೂರಿನಲ್ಲಿ ನಾಲ್ಕು ಜನರಲ್ಲಿ ವೈರಸ್ ಇರುವುದು ಧೃಡವಾಗಿದೆ. ನಾಲ್ವರಲ್ಲಿ ಇಬ್ಬರು ಪ್ರಸಿದ್ಧ ಟೆಕ್ ಕಂಪನಿಯ ಸಿಬ್ಬಂದಿಗಳು ಎನ್ನುವ ಮಾಹಿತಿ ಲಭ್ಯವಾಗಿದೆ.
ಟೆಕ್ ಕಂಪನಿಯೊಂದರಲ್ಲಿ ಹಲವು ವರ್ಷಗಳಿಂದ ಕೆಲಸ ಮಾಡುತ್ತಿರುವ 46 ವರ್ಷದ ಉದ್ಯೋಗಿ ಇತ್ತೀಚೆಗೆ ಅಮೆರಿಕದ ಆಸ್ಟಿನ್ ಮತ್ತು ಟೆಕ್ಸಾಸ್ ನಗರಕ್ಕೆ ಪ್ರವಾಸ ಕೈಗೊಂಡಿದ್ದರು. ದುಬೈ ಮಾರ್ಗವಾಗಿ ಬೆಂಗಳೂರಿಗೆ ಮಾರ್ಚ್ 1ರಂದು ಬಂದಿಳಿದಿದ್ದರು. ಅಮೆರಿಕದಿಂದ ಬಂದ ಅವರಲ್ಲಿ ವೈರಸ್ ಇರುವುದು ಧೃಡವಾಗಿದೆ. ಅವರ ಜತೆಯಲ್ಲಿ ಅವರ ಪತ್ನಿ (47) ಮತ್ತು ಮಗಳಲ್ಲಿಯೂ (13) ಸಹ ವೈರಸ್ ಇರುವುದು ಧೃಡವಾಗಿದೆ.
ಮತ್ತೊಂದು ಟೆಕ್ ಕಂಪನಿಯ ಉದ್ಯೋಗಿ(50)ಯೊಬ್ಬರು ಅಮೆರಿಕ ಪ್ರವಾಸಕ್ಕೆ ತೆರಳಿದ್ದು, ಲಂಡನ್ ಮಾರ್ಗವಾಗಿ ಬೆಂಗಳೂರಿಗೆ ಬಂದಿಳಿದಿದ್ದರು. ಅವರಲ್ಲಿಯೂ ಸಹ ಸೋಂಕು ಇರುವುದು ಪತ್ತೆಯಾಗಿದೆ.
ಸೋಂಕು ತಗುಲಿರುವ ಟೆಕ್ ಕಂಪನಿಯ ಸಿಬ್ಬಂದಿಯು ಕಚೇರಿಯ ನಾಲ್ಕನೇ ಫ್ಲೋರ್ನಲ್ಲಿ ಕೆಲಸ ಮಾಡುತ್ತಿದ್ದವರಾಗಿದ್ದರು. ವಿದೇಶದಿಂದ ಬಂದ ನಂತರ ಎರಡು ದಿನಗಳ ಕಾಲ ಅವರು ಕಚೇರಿಗೆ ತೆರಳಿದ್ದು, ನಂತರ ರಾಜೀವ್ ಗಾಂಧಿ ಆಸ್ಪತ್ರೆಯಲ್ಲಿ ದಾಖಲಾಗಿದ್ದಾರೆ. ಸೋಂಕು ತಗುಲಿದ ನಂತರ ಅವರು 2,666 ಜನರ ಜತೆ ಸಂಪರ್ಕ ಬೆಳೆಸಿದ್ದರು ಎಂದು ಸರ್ಕಾರಿ ಅಧಿಕಾರಿಗಳು ತಿಳಿಸಿದ್ದಾರೆ. ಅವರು ಕೆಲಸ ಮಾಡುತ್ತಿದ್ದ ಫ್ಲೋರ್ನ ಎಲ್ಲ ಸಿಬ್ಬಂದಿಗೆ 14 ದಿನಗಳ ಕಾಲ ಮನೆಯಿಂದಲೇ ಕೆಲಸ ಮಾಡುವಂತೆ ಸಂಸ್ಥೆ ನಿರ್ದೇಶಿಸಿದೆ. ಮಾರ್ಚ್ 24ರ ನಂತರ ಕಚೇರಿಯಲ್ಲಿ ಕೆಲಸ ಮುಂದುವರೆಸುವಂತೆ ತಿಳಿಸಲಾಗಿದೆ.
ಸೋಂಕು ಧೃಡವಾಗಿರುವ ಮತ್ತೊಂದು ಸಂಸ್ಥೆಯ ಸಿಬ್ಬಂದಿಯು ವಿದೇಶದಿಂದ ಮರಳಿದ ನಂತರ ಕಚೇರಿಗೆ ಹಾಜರಾಗಿಲ್ಲ ಮತ್ತು ಸಹೋದ್ಯೋಗಿಗಳನ್ನು ಭೇಟಿ ಮಾಡಿಲ್ಲವಾದ್ದರಿಂದ ಯಾವುದೇ ಸಮಸ್ಯೆಯಿಲ್ಲ ಎಂದು ಸಂಸ್ಥೆ ತಿಳಿಸಿದೆ. (ಏಜೆನ್ಸೀಸ್)
ಇವರು ಅಂತಿಂಥಾ ಕಳ್ಳರಲ್ಲ, ಬಿಯರ್ ಅಂದ್ರೆ ಪ್ರಾಣ ಬಿಡೋ ಈ ದಂಪತಿ ಕಥೆ ಕೇಳಿ ಬೇಸ್ತು ಬೀಳ್ಬೇಡಿ!
ಕರೊನಾ ಪೀಡಿತ ದೇಶಗಳಿಗೆ ಪ್ರವಾಸ ಕೈಗೊಂಡ ಉದ್ಯೋಗಿಗಳಿಗೆ ರಜೆ ನೀಡಿ: ಖಾಸಗಿ ಸಂಸ್ಥೆಗಳಿಗೆ ಸಲಹೆ