ನವದೆಹಲಿ: ಕಾಪಿ ರೈಟ್ ಉಲ್ಲಂಘನೆಯಾಗಿದೆ ಎಂದು ಗೃಹ ಸಚಿವ ಅಮಿತ್ ಷಾ ಅವರ ಟ್ವಿಟರ್ ಪ್ರೊಫೈಲ್ ಫೋಟೋ ತೆಗೆದು ಹಾಕಿ, ಕೆಲ ಸಮಯದ ಬಳಿಕ ಮರುಸ್ಥಾಪನೆ ಆಗಿರುವುದಾಗಿ ಶುಕ್ರವಾರ ವರದಿಯಾಗಿದೆ.
ಗುರುವಾರ ತಡರಾತ್ರಿ ಕೆಲ ಸಮಯದವರೆಗೆ ಅಮಿತ್ ಷಾ ಅವರ ಟ್ವಿಟರ್ ಪ್ರೊಫೈಲ್ ದಿಢೀರ್ ಕಾಣೆಯಾಗಿತ್ತು. ಕಾಪಿ ರೈಟ್ ಉಲ್ಲಂಘನೆಯಾಗಿದೆ ಎಂದು ಪ್ರೊಫೈಲ್ನಲ್ಲೇ ಸೂಚನೆ ನೀಡಲಾಗಿತ್ತು. ಕಾಪಿ ರೈಟ್ ಮಾಲೀಕ ವರದಿ ಮಾಡಿದ್ದರಿಂದ ತಾತ್ಕಾಲಿಕವಾಗಿ ತಡೆಹಿಡಿದಿದ್ದ ಟ್ವಿಟರ್ ಪ್ರೊಫೈಲ್ ಅನ್ನು ಕೆಲ ಸಮಯದ ಬಳಿಕ ಮರುಸ್ಥಾಪಿಸಲಾಗಿದೆ.
ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಟ್ವಿಟರ್, ನಮ್ಮ ಜಾಗತಿಕ ನಿಯಮಗಳಿಗೆ ಅನುಸಾರವಾಗಿ ಟ್ವಿಟರ್ ಖಾತೆಯಲ್ಲಿ ಅಜಾಗರೂಕ ದೋಷಗಳು ಕಂಡುಬಂದಿರುವುದರಿಂದ ಈ ಖಾತೆಯ ಪ್ರೊಫೈಲ್ ಅನ್ನು ತಾತ್ಕಾಲಿಕವಾಗಿ ತೆಗೆದು ಹಾಕಲಾಗಿತ್ತು. ಆದಷ್ಟು ಬೇಗ ನಮ್ಮ ನಿರ್ಧಾರವನ್ನು ವಾಪಸ್ಸು ತೆಗೆದುಕೊಳ್ಳಲಾಯಿತು. ಇದೀಗ ಟ್ವಿಟರ್ ಖಾತೆ ಸಂಪೂರ್ಣ ಕಾರ್ಯ ನಿರ್ವಹಿಸುತ್ತಿದೆ ಎಂದು ಟ್ವಿಟರ್ ವಕ್ತಾರ ಮಾಹಿತಿ ನೀಡಿದ್ದಾರೆ.
ಟ್ವಿಟರ್ನ ಕಾಪಿ ರೈಟ್ ಮಾನದಂಡಗಳ ಪ್ರಕಾರ, ಛಾಯಗ್ರಾಹಕನು ಚಿತ್ರದ ಮೇಲೆ ತನ್ನ ಹಕ್ಕುಸ್ವಾಮ್ಯವನ್ನು ಹೊಂದಿದ್ದಾನೆ ಹೊರತು ವಿಷಯದ ಮೇಲೆ ಅಲ್ಲ. ಚಿತ್ರದ ಬಗ್ಗೆ ತಕ್ಷಣ ಕೆಲ ಪ್ರತಿಕ್ರಿಯೆಗಳು ಬಂದಿದ್ದರಿಂದ ಅದನ್ನು ತೆಗೆದುಹಾಕಲಾಯಿತು ಎಂದು ಟ್ವಿಟರ್ ಹೇಳಿದೆ.
ಅಂದಹಾಗೆ ಅಮಿತ್ ಷಾ ಅವರು ಟ್ವಿಟರ್ನಲ್ಲಿ 23 ಮಿಲಿಯನ್ಸ್ ಫಾಲೋವರ್ಸ್ಗಳನ್ನು ಹೊಂದಿದ್ದಾರೆ. ಷಾ ಅವರು ಟ್ವಿಟರ್ನಲ್ಲಿ 296 ಮಂದಿಯನ್ನು ಫಾಲೋ ಮಾಡುತ್ತಿದ್ದಾರೆ. (ಏಜೆನ್ಸೀಸ್)