ತಿರುವನಂತಪುರಂ: ದೈತ್ಯ ಯಂತ್ರೋಪಕರಣವನ್ನು ಹೊತ್ತ ಬೃಹತ್ ಟ್ರಕ್ ಮಹಾರಾಷ್ಟ್ರದಿಂದ ಕೇರಳದ ತಿರುವನಂತಪುರಂನಲ್ಲಿರುವ ವಿಕ್ರಂ ಸಾರಾಭಾಯಿ ಬಾಹ್ಯಾಕಾಶ ಕೇಂದ್ರವನ್ನು (ವಿಎಸ್ಎಸ್ಸಿ) ತಲುಪಲು ಬರೋಬ್ಬರಿ ಒಂದು ವರ್ಷ ತೆಗೆದುಕೊಂಡಿದ್ದು, ಸೋಮವಾರ ಗುರಿ ತಲುಪಿದೆ.
ಬೃಹತ್ ಟ್ರಕ್ 74 ಟೈರ್ಗಳನ್ನು ಹೊಂದಿದ್ದು, ತನ್ನ ಪ್ರಯಾಣದ ಅವಧಿಯಲ್ಲಿ ಒಟ್ಟು ನಾಲ್ಕು ರಾಜ್ಯಗಳಿಗೆ ಭೇಟಿ ನೀಡಿದೆ. ಅಚ್ಚರಿಯೆಂದರೆ ದಿನವೊಂದಕ್ಕೆ ಕೇವಲ 5 ಕಿ.ಮೀ ಮಾತ್ರ ಪ್ರಯಾಣಿಸಿದೆ. ಅಲ್ಲದೆ, ಟ್ರಕ್ ಪ್ರಯಾಣಿಸುವಾಗ ಅದೇ ರಸ್ತೆಯಲ್ಲಿ ಬೇರೆ ವಾಹನಗಳು ಟ್ರಕ್ ಹಿಂದಿಕ್ಕಲು ಸಾಧ್ಯವಾಗುವುದಿಲ್ಲ. ಏಕೆಂದರೆ ಇಡೀ ರಸ್ತೆಯನ್ನು ಟ್ರಕ್ ಆವರಿಸಿರುತ್ತದೆ. ಟ್ರಕ್ ನಿಯಂತ್ರಣ ಮಾಡಲು ಬರೋಬ್ಬರಿ 34 ಸಿಬ್ಬಂದಿ ನಿಯೋಜಿಸಲಾಗಿತ್ತು.
ಟ್ರಕ್, ವಿಕ್ರಂ ಸಾರಾಭಾಯಿ ಬಾಹ್ಯಾಕಾಶ ಕೇಂದ್ರಕ್ಕೆ ಏರೋಸ್ಪೇಸ್ ಆಟೋಕ್ಲೇವ್ ಯಂತ್ರವನ್ನು ಸಾಗಿಸಿದ್ದು, ಯಂತ್ರ ಬರೋಬ್ಬರಿ 70 ಟನ್ ತೂಕವಿದೆ. 7.5 ಮೀಟರ್ ಎತ್ತರವಿದ್ದು, 6.65 ಮೀಟರ್ ಅಗಲವಿದೆ. ಅದರ ಬೃಹತ್ ಗಾತ್ರ ಹಿನ್ನೆಲೆ ಸಾಮಾನ್ಯ ರಸ್ತೆಯಲ್ಲಿ ವಾಹನ ಚಾಲನೆ ಮಾಡಿಕೊಂಡು ಸಾಗಿಸುವುದು ತುಂಬಾ ಕಷ್ಟವಕರವಾಗಿತ್ತು. ಹೀಗಾಗಿ ದಿನವೊಂದಕ್ಕೆ ಕೇವಲ 5 ಕಿ.ಮೀ ಮಾತ್ರ ಸಂಚಾರ ಮಾಡಲಾಗುತ್ತಿತ್ತು. ಇಡೀ ಪ್ರಯಾಣದಲ್ಲಿ ಕೇವಲ 1750 ಕಿ.ಮೀ ಮಾತ್ರ ಸಂಚಾರ ಮಾಡಿದೆ.
ಟ್ರಕ್ ರಸ್ತೆಯಲ್ಲಿ ಸರಾಗವಾಗಿ ಸಾಗಲು ರಸ್ತೆ ಪಕ್ಕದ ಕೊಂಬೆಗಳನ್ನು ಕತ್ತರಿಸಲಾಗುತ್ತಿತ್ತು. ಅಲ್ಲದೆ, ವಿದ್ಯುತ್ ವೈರ್ಗಳನ್ನು ಸರಿದೂಗಿಸಿ ವಾಹನ ಮುಂದೆ ಚಲಿಸಲು ಅವಕಾಶ ಮಾಡಿಕೊಡಲಾಗುತ್ತಿತ್ತು. ಆಯಾ ಪ್ರದೇಶಗಳ ಪೊಲೀಸ್ ಸಿಬ್ಬಂದಿ ಮತ್ತು ವಿದ್ಯುತ್ ಮಂಡಳಿ ಇದರ ಉಸ್ತುವಾರಿಯನ್ನು ನೋಡಿಕೊಳ್ಳುತ್ತಿದ್ದವು. ವಾಹನವು ಇದೇ ಜುಲೈ ಮೊದಲ ವಾರದಲ್ಲಿ ಕೇರಳ ಗಡಿಯನ್ನು ದಾಟಿತ್ತು.
ಇದನ್ನೂ ಓದಿ: ಸೈಬರಾಬಾದ್ ಪೊಲೀಸ್ ಆಯುಕ್ತ ವಿಶ್ವನಾಥ ಸಜ್ಜನರ್ರಿಂದ ಕನ್ನಡಿಗರಲ್ಲಿ ವಿಶೇಷ ಮನವಿ
ಏರೋಸ್ಪೇಸ್ ಆಟೋಕ್ಲೇವ್ ಯಂತ್ರವನ್ನು ಮಹಾರಾಷ್ಟ್ರದ ನಾಸಿಕ್ನಲ್ಲಿ ತಯಾರಿಸಲಾಗಿದೆ. ಅದನ್ನು ಕೇರಳದ ವಟ್ಟಿಯೂರ್ಕಾವುನಲ್ಲಿರುವ ವಿಎಸ್ಎಸ್ ಕೇಂದ್ರಕ್ಕೆ ರವಾನಿಸಲಾಗಿದೆ. ದೇಶದ ಬಾಹ್ಯಾಕಾಶ ಸಂಶೋಧನಾ ಯೋಜನೆಗೆ ಸಂಬಂಧಿಸಿದ ವಿವಿಧ ಉಪಕರಣಗಳನ್ನು ತಯಾರಿಸಲು ಯಂತ್ರವನ್ನು ಬಳಸಲಾಗುತ್ತದೆ. ವಾಹನವು ಸೋಮವಾರ ವಿಎಸ್ಎಸ್ ಕೇಂದ್ರಕ್ಕೆ ಬಂದು ತಲುಪಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. (ಏಜೆನ್ಸೀಸ್)
VIDEO: ಮಾತನಾಡುತ್ತಿದೆಯಾ ಚಿರಂಜೀವಿ ಸರ್ಜಾ ಆತ್ಮ!?; ಚಿರು ಜತೆಗಿನ ವಿದೇಶಿಗನ ಸಂಭಾಷಣೆ ಇಲ್ಲಿದೆ!