ಬೆಂಗಳೂರು: ರಾಜಧಾನಿ ಬೆಂಗಳೂರಿನ ಬಿವಿಕೆ ಅಯ್ಯಂಗಾರ್ ರಸ್ತೆಯಲ್ಲಿ ಬೈಕ್ ಒಂದರ ಮೇಲೆ ಹಾಗೂ ಗೂಡ್ಸ್ ಆಟೋಗಳ ನಡುವೆ ಅನುಮಾನಾಸ್ಪದವಾಗಿ ಕಾಣಿಸಿಕೊಂಡಿದ್ದ ಎರಡು ಸೂಟ್ಕೇಸ್ಗಳನ್ನು ಪೊಲೀಸರು ಪರಿಶೀಲಿಸಿದ್ದಾರೆ. ಜನರಲ್ಲಿ ಬಾಂಬ್ ಭೀತಿ ಮೂಡಿಸಿದ್ದ ಈ ಸೂಟ್ಕೇಸ್ಗಳನ್ನು ಬಾಂಬ್ ಡಿಟೆಕ್ಷನ್ ಸ್ಕ್ವಾಡ್ನ ಮಾರ್ಗದರ್ಶನದಲ್ಲಿ ತೆರೆದು ನೋಡಲಾಗಿದ್ದು, ಅವುಗಳಲ್ಲಿ ಬಟ್ಟೆಗಳು ಪತ್ತೆಯಾಗಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಯಾರದ್ದು ಎಂಬ ಮಾಹಿತಿ ಇಲ್ಲದೆ ಜನನಿಬಿಡ ಸ್ಥಳದಲ್ಲಿ ಪತ್ತೆಯಾಗಿದ್ದ ಸೂಟ್ಕೇಸುಗಳನ್ನು ಬಾಂಬ್ ಭೀತಿಯ ಹಿನ್ನೆಲೆಯಲ್ಲಿ ನಗರದ ಫ್ರೀಡಂ ಪಾರ್ಕ್ ಮೈದಾನಕ್ಕೆ ತೆಗೆದುಕೊಂಡು ಹೋಗಿ ಪರಿಶೀಲನೆ ನಡೆಸಿದರು. ಪಶ್ಚಿಮ ವಲಯದ ಪೊಲೀಸರು ಮತ್ತು ಶ್ವಾನದಳದ ಸಹಕಾರದೊಂದಿಗೆ ಬಾಂಬ್ ಒತ್ತೆ ಹಾಗೂ ನಿಷ್ಕ್ರಿಯ ದಳದಿಂದ ನಡೆದ ಪರಿಶೀಲನೆಯಲ್ಲಿ ಒಂದು ಸೂಟ್ಕೇಸುಗಳಲ್ಲಿ ಸೀರೆಗಳು ಮತ್ತೊಂದು ಸೂಟ್ಕೇಸ್ನಲ್ಲಿ ಹೊಸ ಕೋಟು ಇರುವುದು ಕಂಡುಬಂದಿದೆ.
ಇದನ್ನೂ ಓದಿ: ಜನರಲ್ಲಿ ಬಾಂಬ್ ಭೀತಿ ಮೂಡಿಸಿರುವ ಅನುಮಾನಾಸ್ಪದ ಸೂಟ್ಕೇಸ್ಗಳು!
ಈ ಬಗ್ಗೆ ಮಾಹಿತಿ ನೀಡಿರುವ ಪಶ್ಚಿಮ ವಿಭಾಗದ ಡಿಸಿಪಿ ಡಾ. ಸಂಜೀವ್ ಎಂ ಪಾಟೀಲ್ ಅವರು, “ಮಧ್ಯಾಹ್ನ ವಿವಿ ಪುರಂ ಪೊಲೀಸ್ ಠಾಣೆಗೆ ಒಂದು ಮಾಹಿತಿ ಬಂತು – ಒಂದು ಸೂಟ್ ಕೇಸ್ ಬಿಟ್ಟು ಹೋಗಿದ್ದಾರೆ ಅಂತ. ಅದು ಎಲ್ಲರಲ್ಲೂ ಆತಂಕ ಸೃಷ್ಟಿ ಮಾಡಿತ್ತು. ಆ ಸೂಟ್ಕೇಸ್ ಪರಿಶೀಲನೆ ವೇಳೆ 200 ಮೀಟರ್ ದೂರದಲ್ಲಿ ಮತ್ತೊಂದು ಸೂಟ್ಕೇಸ್ ಪತ್ತೆಯಾಗಿತ್ತು. ಪತ್ತೆಯಾದ ಎರಡೂ ಸೂಟ್ಕೇಸ್ಗಳನ್ನು ಪರಿಶೀಲನೆ ಮಾಡಲಾಯಿತು. ಒಂದು ಸೂಟ್ಕೇಸ್ನಲ್ಲಿ ಬಟ್ಟೆಗಳು ಹಾಗೂ ಒಂದು ಐಡಿ ಕಾರ್ಡ್ ಪತ್ತೆಯಾಗಿದೆ. ಇನ್ನೊಂದು ಸೂಟ್ಕೇಸಿನಲ್ಲಿ ಮೋದಿ ಜಾಕೆಟ್ ಪತ್ತೆಯಾಗಿದೆ. ಸದ್ಯ ತನಿಖೆ ಮುಂದುವರಿಸಿದ್ದೇವೆ” ಎಂದು ತಿಳಿಸಿದ್ದಾರೆ.
ಈ ಅನುಮಾನಾಸ್ಪದ ಸೂಟ್ಕೇಸ್ಗಳಲ್ಲಿ ಬಟ್ಟೆಗಳು ಪತ್ತೆಯಾಗಿರುವುದು, ಬಾಂಬ್ ಭೀತಿಗೆ ಒಳಗಾಗಿದ್ದ ಜನರು ನೆಮ್ಮದಿಯ ಉಸಿರಾಡುವಂತೆ ಮಾಡಿದೆ. ಸಾರ್ವಜನಿಕರಲ್ಲಿ ಸಾಕಷ್ಟು ಆತಂಕ ಮೂಡಿಸಿದ್ದ ಈ ಸೂಟ್ಕೇಸ್ಗಳು ಯಾರದ್ದು? ಅಲ್ಲಿ ಯಾಕೆ ಬಿಟ್ಟು ಹೋದ್ರು? ಎಂಬುದರ ಬಗ್ಗೆ ಹೆಚ್ಚಿನ ತನಿಖೆ ನಡೆಯುತ್ತಿದೆ.
ಹಲವು ಮುಖಗಳನ್ನು ಹೊಂದಿದ್ದ ಪಾಕಿಸ್ತಾನಿ ಉಗ್ರ… ಭಾರತೀಯ ಮಹಿಳೇನ ಮದುವೆ ಆಗಿದ್ದ!