ಮುಂಬೈ: ಪ್ರಸ್ತುತ ಹಣಕಾಸು ವರ್ಷದ ಕೊನೆಯ ತಿಂಗಳ ಮೊದಲನೇ ದಿನದಲ್ಲಿ ಭಾರತೀಯ ಷೇರು ಮಾರುಕಟ್ಟೆಗಳಲ್ಲಿ ಹಿಂದಿನ ದಾಖಲೆಗಳೆಲ್ಲ ಧೂಳೀಪಟವಾಗಿ ಹೊಸ ದಾಖಲೆ ಸೃಷ್ಟಿಯಾಯಿತು. ಈ ಒಂದೇ ದಿನದಲ್ಲಿ ಹೂಡಿಕೆದಾರರು ಸಾಕಷ್ಟು ಶ್ರೀಮಂತರಾದರು. ಮಾರುಕಟ್ಟೆಯ ಈ ಭರ್ಜರಿ ಏರಿಕೆ ಹಿಂದೆ 4 ದೊಡ್ಡ ಕಾರಣಗಳಿವೆ.
ಪ್ರಭಾವಶಾಲಿ ಜಿಡಿಪಿ ದತ್ತಾಂಶ ಮತ್ತು ತಾಜಾ ವಿದೇಶಿ ನಿಧಿಯ ಒಳಹರಿವಿನಿಂದಾಗಿ ಬಿಎಸ್ಇ ಮತ್ತು ನಿಫ್ಟಿ ಸೂಚ್ಯಂಕಗಳು ಶುಕ್ರವಾರ ತಮ್ಮ ಜೀವಿತಾವಧಿಯ ಗರಿಷ್ಠ ಮಟ್ಟವನ್ನು ತಲುಪುವ ಮೂಲಕ ದಾಖಲೆ ಬರೆದವು. ಈ ದಿನ ಸೂಚ್ಯಂಕಗಳು ಒಂದೂವರೆ ಪ್ರತಿಶತಕ್ಕಿಂತ ಹೆಚ್ಚು ಏರಿಕೆ ದಾಖಲಿಸಿದವು.
30-ಷೇರುಗಳ ಬಿಎಸ್ಇ ಸೂಚ್ಯಂಕವು 1,245.05 ಅಂಕಗಳು ಅಥವಾ ಶೇಕಡಾ 1.72ರಷ್ಟು ಜಿಗಿದು 73,745.35 ಕ್ಕೆ ತಲುಪಿತು. ಇದು ಈ ಸೂಚ್ಯಂಕದ ಸಾರ್ವಕಾಲಿಕ ಮುಕ್ತಾಯದ ಗರಿಷ್ಠ ಮಟ್ಟವಾಗಿದೆ. ದಿನದ ವಹಿವಾಟಿನ ನಡುವೆ ಇದು 1,318.91 ಅಂಕಗಳ ಏರಿಕೆ ಕಂಡು 73,819.21 ರ ದಾಖಲೆಯ ಇಂಟ್ರಾ-ಡೇ ಗರಿಷ್ಠವನ್ನು ತಲುಪಿತ್ತು.
ನಿಫ್ಟಿ ಸೂಚ್ಯಂಕವು 355.95 ಅಂಕಗಳು ಅಥವಾ ಶೇಕಡಾ 1.62 ರಷ್ಟು ಏರಿಕೆಯಾಗಿ 22,338.75 ರ ಹೊಸ ಮುಕ್ತಾಯದ ಗರಿಷ್ಠ ಮಟ್ಟವನ್ನು ತಲುಪಿತು. ದಿನದ ವಹಿವಟಿನ ನಡುವೆ ಇದು 370.5 ಅಂಕಗಳಷ್ಟು ಏರಿಕೆಯಾಗಿ ದಾಖಲೆಯ ಇಂಟ್ರಾ-ಡೇ ಗರಿಷ್ಠ ಮಟ್ಟ 22,353.30 ಅನ್ನು ತಲುಪಿತ್ತು.
ಜಾಗತಿಕ ಮಾರುಕಟ್ಟೆಗಳಲ್ಲಿನ ಏರುಪ್ರವೃತ್ತಿಯು ದೇಶೀಯ ಈಕ್ವಿಟಿ ಮಾರುಕಟ್ಟೆಗಳಲ್ಲಿ ಸಕಾರಾತ್ಮಕ ಬೆಳವಣಿಗೆಗೆ ಕಾರಣವಾಯಿತು ಎಂದು ವಿಶ್ಲೇಷಕರು ಹೇಳಿದ್ದಾರೆ.
ಪ್ರಮುಖ ಸೂಚ್ಯಂಕ ಷೇರುಗಳ ಪೈಕಿ, ಟಾಟಾ ಸ್ಟೀಲ್ ಶೇಕಡಾ 6 ರಷ್ಟು ಜಿಗಿದರೆ, ಜೆಎಸ್ಡಬ್ಲ್ಯೂ ಸ್ಟೀಲ್ ಷೇರುಗಳ ಬೆಲೆ ಶೇಕಡಾ 4 ಕ್ಕಿಂತ ಹೆಚ್ಚು ಏರಿಕೆ ಕಂಡಿತು. ಲಾರ್ಸೆನ್ ಆ್ಯಂಡ್ ಟೂಬ್ರೊ, ಟೈಟಾನ್, ಮಾರುತಿ, ಇಂಡಸ್ಇಂಡ್ ಬ್ಯಾಂಕ್, ಐಸಿಐಸಿಐ ಬ್ಯಾಂಕ್ ಮತ್ತು ಟಾಟಾ ಮೋಟಾರ್ಸ್ ಕಂಪನಿಯ ಷೇರುಗಳು ಪ್ರಮುಖವಾಗಿ ಲಾಭ ಗಳಿಸಿದವು.
ಎಚ್ಸಿಎಲ್ ಟೆಕ್ನಾಲಜೀಸ್, ಇನ್ಫೋಸಿಸ್ ಮತ್ತು ಟೆಕ್ ಮಹೀಂದ್ರಾ ಷೇರುಗಳ ಬೆಲೆ ಕುಸಿತ ಕಂಡಿತು.
2023 ರ ಅಂತಿಮ ಮೂರು ತಿಂಗಳಲ್ಲಿ (2023ರ ಅಕ್ಟೋಬರ್ನಿಂದ ಡಿಸೆಂಬರ್ವರೆಗೆ) ಭಾರತದ ಆರ್ಥಿಕತೆಯು (ಜಿಡಿಪಿ) ನಿರೀಕ್ಷೆಗಿಂತ ಉತ್ತಮವಾಗಿ ಬೆಳೆದಿದೆ. ಇದು 8.4 ಪ್ರತಿಶತದಷ್ಟು ಬೆಳೆದಿದೆ. ಅಲ್ಲದೆ, ಒಂದೂವರೆ ವರ್ಷಗಳಲ್ಲಿ ಜಿಡಿಪಿಯು ಅತ್ಯಂತ ವೇಗವಾಗಿ ಬೆಳೆದಿದೆ. ಅಕ್ಟೋಬರ್-ಡಿಸೆಂಬರ್ನಲ್ಲಿ ಬೆಳವಣಿಗೆ ದರವು ಹಿಂದಿನ ಮೂರು ವರ್ಷಗಳಲ್ಲಿ ಶೇಕಡಾ 7.6 ಕ್ಕಿಂತ ಹೆಚ್ಚಿತ್ತು ಎಂದು ರಾಷ್ಟ್ರೀಯ ಅಂಕಿಅಂಶಗಳ ಕಚೇರಿ ಬಿಡುಗಡೆ ಮಾಡಿದ ಮಾಹಿತಿ ತಿಳಿಸಿದೆ.
ದೇಶೀಯ ಮತ್ತು ಬಾಹ್ಯ ಬೇಡಿಕೆಯಿಂದ ಬೆಂಬಲಿತವಾದ ಕಾರ್ಖಾನೆಯ ಉತ್ಪಾದನೆ ಮತ್ತು ಮಾರಾಟದಲ್ಲಿನ ತೀವ್ರ ಏರಿಕೆಯ ಮಧ್ಯೆ ಭಾರತದ ಉತ್ಪಾದನಾ ವಲಯದ ಬೆಳವಣಿಗೆಯು ಫೆಬ್ರವರಿಯಲ್ಲಿ ಐದು ತಿಂಗಳ ಗರಿಷ್ಠ ಮಟ್ಟಕ್ಕೆ ಏರಿದೆ ಎಂದು ಮಾಸಿಕ ಸಮೀಕ್ಷೆ ಶುಕ್ರವಾರ ತಿಳಿಸಿದೆ.
ಕಾಲೋಚಿತವಾಗಿ ಸರಿಹೊಂದಿಸಲಾದ HSBC ಇಂಡಿಯಾ ಮ್ಯಾನುಫ್ಯಾಕ್ಚರಿಂಗ್ ಪರ್ಚೇಸಿಂಗ್ ಮ್ಯಾನೇಜರ್ಗಳ ಸೂಚ್ಯಂಕವು (PMI) ಜನವರಿಯಲ್ಲಿ 56.5 ರಿಂದ ಫೆಬ್ರವರಿಯಲ್ಲಿ 56.9 ಕ್ಕೆ ಏರಿತು. ಇದು ಸೆಪ್ಟೆಂಬರ್ 2023 ರಿಂದ ವಲಯದ ಆರೋಗ್ಯದಲ್ಲಿ ಬಲವಾದ ಸುಧಾರಣೆಯನ್ನು ಸೂಚಿಸುತ್ತದೆ.
ಏಷ್ಯಾದ ಷೇರು ಮಾರುಕಟ್ಟೆಗಳ ಪೈಕಿ, ಟೋಕಿಯೊ, ಶಾಂಘೈ ಮತ್ತು ಹಾಂಗ್ ಕಾಂಗ್ ಲಾಭ ಕಂಡವು. ಐರೋಪ್ಯ ಮಾರುಕಟ್ಟೆಗಳು ಸಕಾರಾತ್ಮಕವಾಗಿ ವಹಿವಾಟು ನಡೆಸಿದವು. ಅಮೆರಿಕದ ಮಾರುಕಟ್ಟೆಗಳು ಗುರುವಾರ ಲಾಭದಲ್ಲಿ ಮುಂದುವರಿದವು.
ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (ಎಫ್ಐಐ) ಗುರುವಾರ 3,568.11 ಕೋಟಿ ರೂಪಾಯಿ ಮೌಲ್ಯದ ಈಕ್ವಿಟಿಗಳನ್ನು ಖರೀದಿಸಿದರು ಎಂದು ವಿನಿಮಯ ಕೇಂದ್ರ ತಿಳಿಸಿದೆ.
ಬಿಎಸ್ಇ ಬೆಂಚ್ಮಾರ್ಕ್ ಗುರುವಾರ 195.42 ಅಂಕಗಳಷ್ಟು ಏರಿಕೆಯಾಗಿ 72,500.30 ಕ್ಕೆ ಸ್ಥಿರವಾಗಿತ್ತು. ನಿಫ್ಟಿ ಸೂಚ್ಯಂಕವು 31.65 ಅಂಕಗಳಷ್ಟು ಏರಿಕೆ ಕಂಡು 21,982.80 ಕ್ಕೆ ತಲುಪಿತ್ತು.
ಮಾರುಕಟ್ಟೆ ಏರಿಕೆಯ ಹಿಂದಿನ 4 ಕಾರಣಗಳು ಹೀಗಿವೆ…
1) ನಿರೀಕ್ಷೆಗಿಂತ ಉತ್ತಮವಾದ ಜಿಡಿಪಿ ಅಂಕಿಅಂಶಗಳು. ಅಕ್ಟೋಬರ್-ಡಿಸೆಂಬರ್ ತ್ರೈಮಾಸಿಕದಲ್ಲಿ ಶೇಕಡಾ 8.4 ರ ಜಿಡಿಪಿ ಬೆಳವಣಿಗೆಯ ಅಂಕಿ ಅಂಶವು ಷೇರು ಮಾರುಕಟ್ಟೆಗಳು ದಾಖಲೆಯ ಮಟ್ಟವನ್ನು ತಲುಪುವಲ್ಲಿ ಪ್ರಮುಖ ಪಾತ್ರ ವಹಿಸಿತು.
2) ಅಮೆರಿಕದಲ್ಲಿ ಹಣದುಬ್ಬರ ದರದಲ್ಲಿ ಇಳಿಕೆ. ಅಮೆರಿಕದಲ್ಲಿ ನಡೆಯುವ ಚಿಕ್ಕ ಆರ್ಥಿಕ ಘಟನೆಯೂ ಭಾರತೀಯ ಷೇರು ಮಾರುಕಟ್ಟೆಯ ಮೇಲೆ ಪರಿಣಾಮ ಬೀರುತ್ತದೆ ಎಂಬುದು ಷೇರುಪೇಟೆಯಲ್ಲಿ ಯಾವಾಗಲೂ ಹೇಳಲಾಗುವ ಒಂದು ಮಾತು. ಅಮೆರಿಕದಲ್ಲಿ ಹಣದುಬ್ಬರ ದರದಲ್ಲಿನ ಇಳಿಕೆ ಕೂಡ ಏರಿಕೆಯ ಹಿಂದಿನ ಕಾರಣಗಳಲ್ಲಿ ಒಂದು ಎಂದು ಪರಿಗಣಿಸಲಾಗಿದೆ. ಹಣದುಬ್ಬರ ನಿಯಂತ್ರಣದಲ್ಲಿದ್ದರೆ, ಅಮೆರಿಕದ ಫೆಡರಲ್ ರಿಸರ್ವ್ ಬಡ್ಡಿದರಗಳನ್ನು ಕಡಿತಗೊಳಿಸಲು ನಿರ್ಧರಿಸಬಹುದಾಗಿದೆ.
3) ಜಾಗತಿಕ ಮಾರುಕಟ್ಟೆಯ ಉತ್ಕರ್ಷವು ಸಹ ಪ್ರಭಾವ ಬೀರಿತು. ಜಾಗತಿಕ ಮಾರುಕಟ್ಟೆಯಲ್ಲೂ ಉತ್ಕರ್ಷ ಕಂಡುಬಂದಿದೆ. ವಾಲ್ ಸ್ಟ್ರೀಟ್ ಲಾಭ ಕಂಡಿತು.. S&P 500 ಮತ್ತು ನಾಸ್ಡಾಕ್ ಕಾಂಪೋಸಿಟ್ ದಾಖಲೆಯ ಗರಿಷ್ಠ ಮಟ್ಟ ತಲುಪಿದವು. ಜಪಾನ್ನ ನಿಕ್ಕಿ ಕೂಡ ಶುಕ್ರವಾರ ದಾಖಲೆಯ ಎತ್ತರವನ್ನು ತಲುಪುವಲ್ಲಿ ಯಶಸ್ವಿಯಾಯಿತು. ಚೀನಾದ CSI 300 ಕೂಡ ಶೇ.0.2ರಷ್ಟು ಏರಿಕೆ ಕಂಡಿತು. ಇದೆಲ್ಲವೂ ಭಾರತದ ಷೇರು ಮಾರುಕಟ್ಟೆಯ ಮೇಲೂ ಪರಿಣಾಮ ಬೀರಿತು.
4) ವಿದೇಶಿ ಹೂಡಿಕೆದಾರರು ಸಹ ಅವಕಾಶವನ್ನು ಬಿಡುತ್ತಿಲ್ಲ. ಕಳೆದ ಅಧಿವೇಶನದಲ್ಲಿ ವಿದೇಶಿ ಹೂಡಿಕೆದಾರರು 3568 ಕೋಟಿ ರೂಪಾಯಿಯ ಷೇರು ಖರೀದಿಸಿದ್ದರು. ಇದೇ ಸಮಯದಲ್ಲಿ, ದೇಶೀಯ ಸಾಂಸ್ಥಿಕ ಹೂಡಿಕೆದಾರರು 230 ಕೋಟಿ ರೂ. ಮೌಲ್ಯದ ಷೇರುಗಳನ್ನು ಮಾರಾಟ ಮಾಡಿದ್ದಾರೆ. ಕಳೆದ ದಶಕದ ಪ್ರವೃತ್ತಿಯನ್ನು ನೋಡಿದರೆ, ವಿದೇಶಿ ಹೂಡಿಕೆದಾರರು ಪ್ರತಿ ವರ್ಷ ಮಾರ್ಚ್ ತಿಂಗಳಲ್ಲಿ ಭಾರತೀಯ ಷೇರು ಮಾರುಕಟ್ಟೆಗಳಲ್ಲಿ ವ್ಯಾಪಕವಾಗಿ ಖರೀದಿಸುತ್ತಾರೆ.
ಇತರೆ ಸೂಚ್ಯಂಕಗಳು:
ಬಿಎಸ್ಇ ಮಿಡ್ ಕ್ಯಾಪ್ ಸೂಚ್ಯಂಕ: 39,696.49 (0.89% ಏರಿಕೆ)
ಬಿಎಸ್ಇ ಸ್ಮಾಲ್ ಕ್ಯಾಪ್ ಸೂಚ್ಯಂಕ: 45,532.46 (0.68% ಏರಿಕೆ)
ನಿಫ್ಟಿ ಮಿಡ್ ಕ್ಯಾಪ್ 100 ಸೂಚ್ಯಂಕ: 48,790.60 (0.94% ಏರಿಕೆ)
ನಿಫ್ಟಿ ಸ್ಮಾಲ್ ಕ್ಯಾಪ್ 100 ಸೂಚ್ಯಂಕ: 16,058.95 (0.52% ಏರಿಕೆ)
ಪೇಟಿಎಂ, ಯೆಸ್ ಬ್ಯಾಂಕ್ ಷೇರುಗಳ ಬೆಲೆಯಲ್ಲಿ ದಿಢೀರ್ ಏರಿಕೆ: ಇದರ ಹಿಂದಿದೆ ದೊಡ್ಡ ಡೀಲು…