ಬೆಂಗಳೂರು: ‘ಮಾಸ್ ಲೀಡರ್’, ‘ದಿ ವಿಲನ್’, ‘ಟಗರು’, ‘ಬೈರಾಗಿ’ ಹೀಗೆ ಇತ್ತೀಚಿನ ವರ್ಷಗಳಲ್ಲಿ ಹಲವು ಮಲ್ಟಿಸ್ಟಾರರ್ ಚಿತ್ರಗಳಲ್ಲಿ ನಟಿಸಿರುವ ಶಿವರಾಜಕುಮಾರ್, ಈಗ ಇನ್ನೊಂದು ಮಲ್ಟಿಸ್ಟಾರರ್ ಚಿತ್ರದಲ್ಲಿ ನಟಿಸುವುದಕ್ಕೆ ಸಜ್ಜಾಗಿದ್ದಾರೆ. ಈ ಬಾರಿ ಅವರ ಜತೆಯಾಗುತ್ತಿರುವುದು ಗಣೇಶ್.
ಇದನ್ನೂ ಓದಿ: ಇನ್ನೊಂದು ಹೊಸ ಥ್ರಿಲ್ಲರ್ನಲ್ಲಿ ರವಿಚಂದ್ರನ್; ಏಪ್ರಿಲ್ನಲ್ಲಿ ಚಿತ್ರ ಪ್ರಾರಂಭ
ಶಿವರಾಜಕುಮಾರ್ ಮತ್ತು ಗಣೇಶ್ ಹಲವು ವರ್ಷಗಳ ಸ್ನೇಹಿತರಾದರೂ, ಇಬ್ಬರೂ ಇದುವರೆಗೂ ಜತೆಯಾಗಿ ನಟಿಸಿರಲಿಲ್ಲ. ಈ ವರ್ಷ ಅದಕ್ಕೆ ಕಾಲ ಕೂಡಿ ಬಂದಿದೆ. ತಮಿಳಿನ ಖ್ಯಾತ ನಿರ್ದೇಶಕ ಕೆ.ಎಸ್. ರವಿಕುಮಾರ್ ನಿರ್ದೇಶಿಸುತ್ತಿರುವ ಕನ್ನಡ ಚಿತ್ರದಲ್ಲಿ ಇಬ್ಬರೂ ಮೊದಲ ಬಾರಿಗೆ ತೆರೆ ಹಂಚಿಕೊಳ್ಳುತ್ತಿದ್ದಾರೆ.
ಈ ಚಿತ್ರವನ್ನು ನಿರ್ಮಿಸುತ್ತಿರುವುದು ಸೂರಪ್ಪ ಬಾಬು. ‘ಕೋಟಿಗೊಬ್ಬ 3’ ಸೋಲಿನ ನಂತರ ಚಿತ್ರ ನಿರ್ಮಾಣದಿಂದ ದೂರವೇ ಇದ್ದ ಬಾಬು, ಈಗ ಎರಡು ಚಿತ್ರಗಳೊಂದಿಗೆ ವಾಪಸ್ಸಾಗುತ್ತಿದ್ದಾರೆ. ಅದರಲ್ಲೊಂದು ಶಿವರಾಜಕುಮಾರ್ ಮತ್ತು ಗಣೇಶ್ ಅಭಿನಯದ ಚಿತ್ರ. ಈ ಹಿಂದೆ ಬಾಬು ನಿರ್ಮಾಣದ ‘ಕೋಟಿಗೊಬ್ಬ 2’ ಚಿತ್ರವನ್ನು ಕೆ.ಎಸ್. ರವಿಕುಮಾರ್ ನಿರ್ದೇಶಿಸಿದ್ದರು. ಈಗ ಪುನಃ ರವಿಕುಮಾರ್ ನಿರ್ದೇಶನದಲ್ಲಿ ಈ ಚಿತ್ರ ನಿರ್ಮಾಣ ಮಾಡುತ್ತಿದ್ದಾರೆ ಬಾಬು. ರಾಂಬಾಬು ಪ್ರೊಡಕ್ಷನ್ಸ್ನಡಿ ನಿರ್ಮಾಣವಾಗುತ್ತಿರುವ ಈ ಚಿತ್ರ ಜೂನ್ನಿಂದ ಪ್ರಾರಂಭವಾಗಲಿದೆಯಂತೆ.
ಇನ್ನೂ ಓದಿ: ‘ಸಪ್ತ ಸಾಗರದಾಚೆ ಎಲ್ಲೋ’ ಚಿತ್ರೀಕರಣ ಮುಗಿಸಿದರು ರಕ್ಷಿತ್ ಶೆಟ್ಟಿ
ಶಿವರಾಜಕುಮಾರ್ ಸದ್ಯ ‘ಘೋಸ್ಟ್’ ಮತ್ತು ‘ಕರಟಕ ದಮನಕ’ ಅಲ್ಲದೆ, ತಮಿಳೀನ ‘ಜೈಲರ್’ ಮತ್ತು ‘ಕ್ಯಾಪ್ಟನ್ ಮಿಲ್ಲರ್” ಚಿತ್ರಗಳಲ್ಲಿ ನಟಿಸುತ್ತಿದ್ದು, ಅದಲ್ಲದೆ, ’45’, ‘ಅಶ್ವತ್ಥಾಮ’, ‘ಬೈರತಿ ರಣಗಲ್’ ಮುಂತಾದ ಚಿತ್ರಗಳನ್ನು ಈಗಾಗಲೇ ಒಪ್ಪಿಕೊಂಡಿದ್ದಾರೆ. ಈ ಸಾಲಿಗೆ ಈಗ ಗಣೇಶ್ ಜತೆಗೆ ನಟಿಸುತ್ತಿರುವ ಹೊಸ ಚಿತ್ರವೂ ಸೇರ್ಪಡೆಯಾಗಿದೆ.