ಮುಂಬೈ: ಯಾಕೋ ಬಾಲಿವುಡ್ ನಟ ಅಕ್ಷಯ್ ಕುಮಾರ್ ಅವರ ಅದೃಷ್ಟ ಸರಿ ಇರುವ ಹಾಗೆ ಕಾಣುತ್ತಿಲ್ಲ. ಈಗಾಗಲೇ ನಾಲ್ಕು ಬ್ಯಾಕ್ ಟು ಬ್ಯಾಕ್ ಸೋಲುಗಳನ್ನು ಕಂಡಿರುವ ಅಕ್ಷಯ್ ಕುಮಾರ್ಗೆ ಈಗ ಇನ್ನೊಂದು ಸೋಲಿನ ಭೀತಿ ಎದುರಾಗಿದೆ.
ಇದನ್ನೂ ಓದಿ: ಬಿಕಿನಿಯಲ್ಲಿ ಗುಡ್ಡ ಏರಿ ಜಿಗಿದ ಅಮಲಾ ಪೌಲ್: ಸೌತ್ ಬ್ಯೂಟಿಯ ಸಾಹಸಕ್ಕೆ ಅಭಿಮಾನಿಗಳು ಫಿದಾ
ಬಾಕ್ಸ್ ಆಫೀಸ್ನಲ್ಲಿ ಕಡೆಯದಾಗಿ ದೊಡ್ಡ ಹಿಟ್ ಆದ ಚಿತ್ರವೆಂದರೆ, ಅದು ‘ಸೂರ್ಯವಂಶಿ’. ಆ ನಂತರ ಅದ್ಯಾಕೋ ಅಕ್ಷಯ್ ಅಭಿನಯದ ಯಾವ ಚಿತ್ರವೂ ಗೆದ್ದ ಉದಾಹರಣೆಯಿಲ್ಲ. ಕಳೆದ ವರ್ಷವನ್ನೇ ತೆಗೆದುಕೊಂಡರೆ, ಅಕ್ಷಯ್ ಅಭಿನಯದ ನಾಲ್ಕು ಚಿತ್ರಗಳು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿದ್ದವು. ‘ಸಾಮ್ರಾಟ್ ಪೃಥ್ವಿರಾಜ್’, ‘ಬಚ್ಚನ್ ಪಾಂಡೆ’, ‘ರಕ್ಷಾ ಬಂಧನ್’ ಮತ್ತು ‘ರಾಮ್ ಸೇತು’ ಚಿತ್ರಗಳು ಚಿತ್ರಮಂದಿರಗಳಲ್ಲಿ ತೆರೆ ಕಂಡಿದ್ದವು. ಈ ನಾಲ್ಕೂ ಚಿತ್ರಗಳು ಬಾಕ್ಸ್ ಆಫೀಸ್ನಲ್ಲಿ ಸೋಲನುಭವಿಸಿದ್ದವು.
ಈಗ ಈ ವರ್ಷದ ಅಕ್ಷಯ್ ಕುಮಾರ್ ಅವರ ಮೊದಲ ಚಿತ್ರವಾಗಿ ಶುಕ್ರವಾರವಷ್ಟೇ ‘ಸೆಲ್ಫೀ’ ತೆರೆಕಂಡಿದೆ. ಈ ಚಿತ್ರವು ಹಿಂದಿನ ಚಿತ್ರಗಳಂತೆ ಸೋಲುವಂತೆ ಕಾಣುತ್ತಿದೆ. ಇದಕ್ಕೆ ಮುನ್ನುಡಿಯಾಗಿ, ಚಿತ್ರವು ಮೊದಲ ದಿನ ಬಹಳ ಕೆಟ್ಟ ಓಪನಿಂಗ್ ಪಡೆದಿದೆ. ಅಂದಹಾಗೆ, ‘ಸೆಲ್ಫೀ’ ಚಿತ್ರದ ಮೊದಲ ದಿನದ ಕಲೆಕ್ಷನ್ ಎಷ್ಟು ಗೊತ್ತಾ? ಕೇವಲ ಎರಡೂವರೆ ಕೋಟಿ ರೂ. ಇತ್ತೀಚಿನ ವರ್ಷಗಳಲ್ಲೇ ಅಕ್ಷಯ್ ಅಭಿನಯದ ಯಾವೊಂದು ಚಿತ್ರವೂ ಇಷ್ಟೊಂದು ಕಡಿಮೆ ಕಲೆಕ್ಷನ್ ಮಾಡಿದ ಉದಾಹರಣೆ ಇಲ್ಲ. ಮೊದಲ ದಿನವೇನೋ ಹೀಗಾಯಿತು, ಮುಂದಿನ ದಿನಗಳಲ್ಲಿ ಪರಿಸ್ಥಿತಿ ಸುಧಾರಿಸಬಹುದು ಎಂಬ ನಿರೀಕ್ಷೆ ಯಾರಿಗೂ ಇಲ್ಲ.
ಇದನ್ನೂ ಓದಿ: ‘ಮಾರ್ಟಿನ್’ ಜತೆಗೆ ಸೆಣಸಲು ಬಂದ ಆ ಇಬ್ಬರು ದೈತ್ಯರು!
‘ಸೆಲ್ಫೀ’ ಚಿತ್ರವು ಮೂರು ವರ್ಷಗಳ ಹಿಂದೆ ಮಲಯಾಳಂನಲ್ಲಿ ಬಿಡುಗಡೆಯಾಗಿದ್ದ ‘ಡ್ರೈವಿಂಗ್ ಲೈಸೆನ್ಸ್’ ಚಿತ್ರದ ರೀಮೇಕ್. ಮೂಲ ಚಿತ್ರದಲ್ಲಿ ಪೃಥ್ವಿರಾಜ್ ಮತ್ತು ಸೂರಜ್ ನಟಿಸಿದ್ದರು. ಈ ಚಿತ್ರದಲ್ಲಿ ಅಕ್ಷಯ್ ಕುಮಾರ್ ಜತೆಗೆ ಎಮ್ರಾನ್ ಹಶ್ಮಿ ಸಹ ನಟಿಸಿದ್ದು, ಚಿತ್ರವನ್ನು ರಾಜ್ ಮೆಹ್ತಾ ನಿರ್ದೇಶನ ಮಾಡಿದ್ದಾರೆ. ಈ ಚಿತ್ರದ ಪ್ರಚಾರ ವೇಳೆ ಮೂರು ನಿಮಿಷಗಳಲ್ಲಿ ಅತೀ ಹೆಚ್ಚು ಸೆಲ್ಫಿ ಕ್ಲಿಕ್ಕಿಸಿಕೊಳ್ಳುವ ಮೂಲಕ ಅಕ್ಷಯ್ ಕುಮಾರ್ ಹೊಸ ಗಿನ್ನೆಸ್ ದಾಖಲೆಯನ್ನು ಬರೆದಿದ್ದಾರೆ.