ವಾಷಿಂಗ್ಟನ್: ಸೆಂಟ್ ಬಳಕೆ ಮಾಡುವುದು ಅನೇಕರಿಗೆ ಇಷ್ಟದ ಸಂಗತಿಯಾದರೆ ಇನ್ನು ಕೆಲವರಿಗೆ ಅದೊಂದು ಹಿಂಸೆ. ಸೆಂಟ್ನ ಸುವಾಸನೆ ಕೂಡ ತಲೆ ನೋವು ತರಿಸುತ್ತದೆ ಎಂದು ಸೆಂಟ್ ಬಳಸುವವರಿಂದ ದೂರವೇ ಉಳಿದುಬಿಡುತ್ತಾರೆ. ಆದರೆ ಈ ಸೆಂಟ್ ಬಳಸುವರ ಬಳಿ ಒಂದು ವಿಶೇಷ ಶಕ್ತಿ ಇರುತ್ತದೆ ಎನ್ನುವುದನ್ನು ಸಂಶೋಧಕರು ಕಂಡು ಹಿಡಿದಿದ್ದಾರೆ.
ಬೇರೆ ವ್ಯಕ್ತಿಗಳಿಗೆ ಹೋಲಿಸಿದರೆ ಸೆಂಟ್ ಬಳಸುವವರಿಗೆ ಸಾಮಾನ್ಯವಾಗಿ ನೆನಪಿನ ಶಕ್ತಿ ಹೆಚ್ಚಿರುತ್ತದೆಯಂತೆ. ಈ ಸೆಂಟ್ ಅಥವಾ ಯಾವುದೇ ವಾಸನೆ ಪ್ರಸ್ತುತ ಸನ್ನಿವೇಶ ಮತ್ತು ಮೆದುಳಿನ ನಡುವೆ ಸೇತುವೆಯಂತೆ ಕೆಲಸ ಮಾಡುತ್ತದೆ ಎಂದು ಸಂಶೋಧಕರು ತಿಳಿಸಿದ್ದಾರೆ. ಅಮೆರಿಕದ ಬೋಸ್ಟನ್ ವಿಶ್ವವಿದ್ಯಾನಿಲಯ ನಡೆಸಿರುವ ಸಂಶೋಧನೆಯಲ್ಲಿ ಈ ಮಾಹಿತಿ ಹೊರಬಿದ್ದಿದೆ.
ನಮ್ಮ ಕಣ್ಣೆದುರು ನಡೆಯುವ ದೃಶ್ಯಗಳು ಮೊದಲು ಮೆದುಳಿನ ಹಿಪೊಕ್ಯಾಂಪಸ್ ಎನ್ನುವಲ್ಲಿ ಶೇಖರಣೆಗೊಳ್ಳುತ್ತವೆ. ರಾತ್ರಿ ವೇಳೆ ನಿದ್ರೆ ಮಾಡುವಾಗ ಆ ನೆನಪು ಹಿಪೊಕ್ಯಾಂಪಸ್ನಿಂದ ಮೆದುಳಿನ ಮುಂಭಾಗಕ್ಕೆ ಬರುತ್ತದೆ. ದಿನಕಳೆದಂತೆ ಹಿಪೊಕ್ಯಾಂಪಸ್ನಲ್ಲಿರುವ ನೆನಪು ನಶಿಸಿಹೋಗುತ್ತದೆ.
ಬೋಸ್ಟನ್ ವಿವಿಯ ಸಂಶೋಧಕರು 20 ಇಲಿಗಳನ್ನು ತಮ್ಮ ಸಂಶೋಧನೆಗೆ ಬಳಸಿಕೊಂಡಿದ್ದರು. 10 ಇಲಿಗಳನ್ನು ಬಾದಾಮಿ ವಾಸನೆಯಿರುವ ಕಂಟೈನರ್ಗಳಲ್ಲಿಟ್ಟು ಶಾಕ್ ನೀಡಿದ್ದರು. ಇನ್ನುಳಿದ 10 ಇಲಿಗಳನ್ನು ಯಾವುದೇ ವಾಸನೆಯಿಲ್ಲದ ಕಂಟೈನರ್ಗಳಲ್ಲಿಟ್ಟು ಶಾಕ್ ನೀಡಿದ್ದರು. ಇದಾದ 20 ದಿನಗಳ ನಂತರ ಆ ಇಲಿಗಳನ್ನು ಮತ್ತೆ ಶಾಕ್ ನೀಡುವುದಕ್ಕೆ ಕಂಟೈನರ್ನಲ್ಲಿ ಇಡಲಾಗಿದೆ. ಆಗ ನಡೆಸಿದ ವೈದ್ಯಕೀಯ ಪರೀಕ್ಷೆಯ ವರದಿಯ ಪ್ರಕಾರ ಬಾದಾಮಿ ವಾಸನೆಯ ಕಂಟೈನರ್ಗಳಲ್ಲಿ ಶಾಕ್ ತೆಗೆದುಕೊಂಡ ಇಲಿಗಳಲ್ಲಿ 20 ದಿನಗಳ ಹಿಂದೆ ಶಾಕ್ ತೆಗೆದುಕೊಂಡ ಭಯ ಉಳಿದುಕೊಂಡಿತ್ತು. ಆದರೆ ವಾಸನೆ ರಹಿತ ಕಂಟೈನರ್ಗಳಲ್ಲಿ ಇದ್ದ ಇಲಿಗಳಿಗೆ ಶಾಕ್ನ ನೆನಪೂ ಸಹ ಉಳಿದಿರಲಿಲ್ಲ. ಎಂದರೆ ಅವುಗಳ ಹಿಪೊಕ್ಯಾಂಪಸ್ನಲ್ಲಿ ಆ ದಿನದ ನೆನಪು ಸಂಪೂರ್ಣವಾಗಿ ನಶಿಸಿಹೋಗಿತ್ತು.
ಆದರೆ ಗಮನಿಸಬೇಕಾದ ಇನ್ನೊಂದು ಅಂಶವೇನೆಂದರೆ ಇಲಿಗಳು ಬಾದಾಮಿ ವಾಸನೆಯಲ್ಲಿ ಶಾಕ್ ತೆಗೆದುಕೊಂಡಿದ್ದು ಮತ್ತೊಮ್ಮೆ ಅದೇ ವಾಸನೆಯಲ್ಲಿ ಅಂತದ್ದೇ ಶಾಕ್ ಎದುರಾದಾಗ ಅವುಗಳಿಗೆ ಆ ನೆನಪು ಮರುಕಳಿಸಿದೆ. ಮುಮ್ಮೆದುಳಿನಿಂದ ಹಿಪೊಕ್ಯಾಂಪಸ್ಗೆ ಆ ಬಾದಾಮಿ ವಾಸನೆ ಸೂಚನೆಯೊಂದನ್ನು ರವಾನೆ ಮಾಡುವಂತೆ ಮಾಡಿದೆ.
ಈ ಸಂಶೋಧನೆಯನ್ನು ನಡೆಸಿರುವ ಸಂಶೋಧಕರು ತಮ್ಮ ಸಂಶೋಧನೆಯಿಂದ ಸಾಕಷ್ಟು ಸಹಾಯವಾಗಲಿದೆ ಎಂದು ತಿಳಿಸಿದ್ದಾರೆ. ಇದಿನ್ನೂ ಪ್ರಾರಂಭಿಕ ಹಂದತಲ್ಲಿದ್ದು ಇದರ ಬಗ್ಗೆ ಹೆಚ್ಚಿನ ಸಂಶೋಧನೆಗಳು ನಡೆಯಬೇಕಿದೆ ಎಂದು ತಿಳಿಸಿದ್ದಾರೆ. (ಏಜೆನ್ಸೀಸ್)
ಬೆಂಗಳೂರಿನಲ್ಲಿ ಮತ್ತಿಬ್ಬರಲ್ಲಿ ಕರೊನಾ ಸೋಂಕು ಧೃಡ; ಕಲಬುರಗಿಯಲ್ಲಿ ಆರಂಭವಾಗಲಿದೆ ಕರೊನಾ ಲ್ಯಾಬ್