ಮಾಸ್ಕೋ: ಕೊವಿಡ್-19 ಲಸಿಕೆ ಸಂಶೋಧಿಸಿದ್ದೇವೆ. ಕ್ಲಿನಿಕಲ್ ಟ್ರಯಲ್ನ ಎಲ್ಲ ಹಂತಗಳೂ ಸಂಪೂರ್ಣ ಯಶಸ್ವಿಯಾಗಿವೆ ಎಂದು ರಷ್ಯಾ ಹೇಳಿಕೊಂಡಿದೆ.
ರಷ್ಯಾದ ಗಮಾಲಿ ಇನ್ಸ್ಟಿಟ್ಯೂಟ್ ಆಫ್ ಎಪಿಡೆಮಿಯಾಲಜಿ ಆ್ಯಂಡ್ ಮೈಕ್ರೋಬಯಾಲಜಿ ತಯಾರಿಸಿದೆ. ಈ ಲಸಿಕೆಯ ಮೇಲೆ ಮಾಸ್ಕೋದ ಮೊದಲ ವೈದ್ಯಕೀಯ ವಿಶ್ವವಿದ್ಯಾಲಯವಾದ ಸೆಚೆನೊವ್ ಯೂನಿವರ್ಸಿಟಿ ಪ್ರಯೋಗಗಳನ್ನು ಜೂ.18ರಂದು ಪ್ರಾರಂಭಿಸಿತ್ತು.
ಮೊದಲ ಹಂತದಲ್ಲಿ 18 ಯೋಧರ ಮೇಲೆ ಲಸಿಕೆ ಪ್ರಯೋಗ ಮಾಡಲಾಗಿತ್ತು. ಹೀಗೆ ಪ್ರಯೋಗಕ್ಕೆ ಒಳಪಟ್ಟ ಮೊದಲ ಗುಂಪು ಇಂದು ಡಿಸ್ಚಾರ್ಜ್ ಆಗಿದೆ. ನಾವು ಸಿದ್ಧಪಡಿಸಿದ ಕೊರನಾ ವೈರಸ್ ಲಸಿಕೆ ಸುರಕ್ಷಿತವಾಗಿದೆ. ಲಸಿಕೆ ಸ್ವೀಕರಿಸಿದವರ ಆರೋಗ್ಯದಲ್ಲಿ ಯಾವುದೇ ಅಡ್ಡಪರಿಣಾಮ ಆಗಿಲ್ಲ. ಗಂಭೀರ ಪ್ರತಿಕೂಲಗಳೂ ಉಂಟಾಗಿಲ್ಲ. ಆರೋಗ್ಯವಾಗಿಯೇ ಇದ್ದರು. ಅವರನ್ನು ಡಿಸ್ಚಾರ್ಜ್ ಮಾಡಲಾಗಿದೆ ಎಂದು ರಷ್ಯಾ ರಕ್ಷಣಾ ಸಚಿವಾಲಯ ತಿಳಿಸಿದೆ.
ಲಸಿಕೆ ಅತ್ಯಂತ ಸುರಕ್ಷಿತವಾಗಿದೆ ಮತ್ತು ವೈರಸ್ ವಿರುದ್ಧ ಪರಿಣಾಮಕಾರಿಯಾಗಿ ಹೋರಾಡುತ್ತದೆ ಎಂದು ನಾವು ಆತ್ಮವಿಶ್ವಾಸದಿಂದ ಹೇಳುತ್ತಿದ್ದೇವೆ. ಲಸಿಕೆ ತೆಗೆದುಕೊಂಡವರಲ್ಲಿ ರೋಗನಿರೋಧಕ ಶಕ್ತಿ ಉತ್ತಮವಾಗಿ ಕೆಲಸ ಮಾಡುತ್ತದೆ. ಅಲ್ಲದೆ, ಆ್ಯಂಟಿಬಾಡಿ ಸೃಷ್ಟಿಯಾಗುತ್ತಿದೆ. ಕರೊನಾ ವೈರಸ್ ತಗುಲುವುದಿಲ್ಲ ಎಂದು ಸಚಿವಾಲಯ ವಿಡಿಯೋ ಮೂಲಕ ತಿಳಿಸಿದೆ.
ಹಾಗೇ, ಜುಲೈ ಅಂತ್ಯದ ವೇಳೆಗೆ ಎಲ್ಲರೀತಿಯ ಪ್ರಯೋಗಗಳೂ ಪೂರ್ಣಗೊಳ್ಳಲಿದ್ದು, ನಂತರ ಬಳಕೆಗೆ ಲಭ್ಯವಾಗಲಿದೆ ಎಂದೂ ವಿವರಣೆ ನೀಡಿದೆ. ಇದನ್ನೂ ಓದಿ: ‘ಕರೊಶ್ಯುರ್’ – ದೆಹಲಿ ಐಐಟಿ ಅಭಿವೃದ್ಧಿಪಡಿಸಿದ ಅಗ್ಗದರದ ಟೆಸ್ಟಿಂಗ್ ಕಿಟ್ ಬಿಡುಗಡೆ
ಗಮಾಲಿ ಇನ್ಸ್ಟಿಟ್ಯೂಟ್ ಆಫ್ ಎಪಿಡೆಮಿಯಾಲಜಿ ಆ್ಯಂಡ್ ಮೈಕ್ರೋಬಯಾಲಜಿ ವಿಜ್ಞಾನಿಗಳೊಂದಿಗೆ ಮಿಲಿಟರಿ ಸಂಶೋಧಕರು ಜತೆಯಾಗಿ ಈ ಲಸಿಕೆ ಅಭಿವೃದ್ಧಿಪಡಿಸಿದ್ದಾಗಿ ರಕ್ಷಣಾ ಸಚಿವ ಸೆರ್ಗೆಯ್ ಶೋಯಿಗು ಅವರು ರಷ್ಯಾ ಅಧ್ಯಕ್ಷ ವ್ಲಾದಿಮಿರ್ ಪುತಿನ್ಗೆ ವರದಿ ನೀಡಿದ್ದಾರೆ ಎಂದು ಅಲ್ಲಿನ ಮಾಧ್ಯಮಗಳು ತಿಳಿಸಿವೆ.
ಲಸಿಕೆ ಪ್ರಯೋಗಕ್ಕೆ ಒಳಪಟ್ಟ 18 ಮಂದಿ ಯೋಧರು ಮಾಸ್ಕೋದ ಬರ್ಡೆಂಕೋ ಮಿಲಿಟರಿ ಆಸ್ಪತ್ರೆಯಲ್ಲಿ ಅಡ್ಮಿಟ್ ಆಗಿದ್ದರು. ಪ್ರತಿದಿನ ಅವರನ್ನು ತಪಾಸಣೆ ಮಾಡಲಾಗುತ್ತಿತ್ತು. 28 ದಿನಗಳು ಅವರ ಮೇಲೆ ನಿಗಾ ಇಡಲಾಗಿತ್ತು. ಆರೋಗ್ಯದಲ್ಲಿ ಯಾವುದೇ ಬದಲಾವಣೆ, ಅಡ್ಡಪರಿಣಾಮ ಆಗಿಲ್ಲ. ಇನ್ನೂ ಒಂದು ಗುಂಪು ಇದೆ. ಅವರನ್ನು ಜು.23ರಂದು ಡಿಸ್ಚಾರ್ಜ್ ಮಾಡಲಾಗುತ್ತದೆ ಎಂದು ರಕ್ಷಣಾ ಸಚಿವಾಲಯ ತಿಳಿಸಿದೆ. (ಏಜೆನ್ಸೀಸ್)
ರಷ್ಯಾದಲ್ಲಿ ಸಿದ್ಧವಾಯ್ತು ಜಗತ್ತಿನ ಮೊದಲ ಕೊವಿಡ್-19 ಲಸಿಕೆ; ಕ್ಲಿನಿಕಲ್ ಪ್ರಯೋಗ ಸಂಪೂರ್ಣ ಯಶಸ್ವಿ