ಬೆಂಗಳೂರು: ಆರ್ಸಿಬಿ ತಂಡವೆಂದರೆ ಈ ಬಾರಿ ಕೇವಲ 5 ಆಟಗಾರರ ತಂಡದಂತಿದೆ! ಬ್ಯಾಟಿಂಗ್ನಲ್ಲಿ ಫಾಫ್ ಡು ಪ್ಲೆಸಿಸ್ (406 ರನ್), ವಿರಾಟ್ ಕೊಹ್ಲಿ (279), ಗ್ಲೆನ್ ಮ್ಯಾಕ್ಸ್ವೆಲ್ (253), ಬೌಲಿಂಗ್ನಲ್ಲಿ ಮೊಹಮದ್ ಸಿರಾಜ್ (13 ವಿಕೆಟ್), ಹರ್ಷಲ್ ಪಟೇಲ್ (10) ಬಿಟ್ಟರೆ ಬೇರೆ ಯಾರನ್ನೂ ನೆಚ್ಚಿಕೊಳ್ಳುವಂತಿಲ್ಲ.
ಕಳೆದ ಆವೃತ್ತಿಯಲ್ಲಿ ಫಿನಿಷರ್ ಆಗಿ ಮಿಂಚಿದ್ದ ದಿನೇಶ್ ಕಾರ್ತಿಕ್ ಈ ಬಾರಿ 7 ಪಂದ್ಯಗಳಲ್ಲಿ ಗಳಿಸಿದ್ದು ಕೇವಲ 66 ರನ್. ಶಾಬಾಜ್ ಅಹ್ಮದ್ ಬ್ಯಾಟಿಂಗ್ ಮತ್ತು ಬೌಲಿಂಗ್ ಎರಡರಲ್ಲೂ ಉಪಯುಕ್ತರೆನಿಸಿಲ್ಲ. ಮಹಿಪಾಲ್ ಲೊಮ್ರೊರ್, ಸುಯಶ್ ಪ್ರಭುದೇಸಾಯಿ ಗೆಲುವಿಗೆ ನೆರವಾಗುತ್ತಿಲ್ಲ. ಕನ್ನಡಿಗ ವೈಶಾಕ್ ವಿಜಯ್ಕುಮಾರ್ ಯಶಸ್ವಿ ಪದಾರ್ಪಣೆಯ ಬಳಿಕ ದುಬಾರಿ ಆಗಿದ್ದಾರೆ. ಹೀಗಾಗಿ ಪ್ರಮುಖ ಐವರು ಆಟಗಾರರಿಗೆ ಇತರರಿಂದ ಸೂಕ್ತ ಬೆಂಬಲ ಲಭಿಸಿದರಷ್ಟೇ ಬಲಿಷ್ಠ ನಿರ್ವಹಣೆ ಸಾಧ್ಯವೆನಿಸಿದೆ.
ಇದನ್ನೂ ಓದಿ: ಕೊಹ್ಲಿಯನ್ನು ಹಿಂದಿಕ್ಕಿದ ರಾಹುಲ್; ವೇಗವಾಗಿ 7 ಸಾವಿರ ರನ್ ಕಂಪ್ಲೀಟ್
ಹ್ಯಾಸಲ್ವುಡ್ ಫಿಟ್?
ಆಸೀಸ್ ವೇಗಿ ಜೋಶ್ ಹ್ಯಾಸಲ್ವುಡ್ ಗಾಯದಿಂದ ಬಹುತೇಕ ಚೇತರಿಸಿಕೊಂಡಿದ್ದು, ಶೇ. 100 ಫಿಟ್ ಆಗಿದ್ದಾರೆ ಎನ್ನಲಾಗಿದೆ. ಕೆಕೆಆರ್ ವಿರುದ್ಧದ ಪಂದ್ಯದಲ್ಲಿ ಹ್ಯಾಸಲ್ವುಡ್ ಕಣಕ್ಕಿಳಿದರೆ ಆರ್ಸಿಬಿ ಬೌಲಿಂಗ್ ವಿಭಾಗಕ್ಕೆ ಹೆಚ್ಚಿನ ಬಲ ಸಿಗಲಿದೆ. ಹ್ಯಾಸಲ್ವುಡ್ ಕಳೆದ ಆವೃತ್ತಿಯಲ್ಲಿ ಆಡಿದ್ದ 12 ಪಂದ್ಯಗಳಲ್ಲಿ 20 ವಿಕೆಟ್ ಕಬಳಿಸಿ ಆರ್ಸಿಬಿ ಪ್ಲೇಆಫ್ ತಲುಪಲು ನೆರವಾಗಿದ್ದರು.
ಆರ್ಸಿಬಿಗೆ ಇಂಪ್ಯಾಕ್ಟ್ ಲಾಭ
ಕಾಯಂ ನಾಯಕ ಫಾಫ್ ಡು ಪ್ಲೆಸಿಸ್ ಬೆನ್ನುನೋವಿನ ಸಮಸ್ಯೆಯಿಂದ ಬಳಲುತ್ತಿದ್ದಾರೆ. ಇದರ ನಡುವೆಯೂ ಇಂಪ್ಯಾಕ್ಟ್ ಪ್ಲೇಯರ್ ನಿಯಮದ ಅನುಕೂಲದಿಂದಾಗಿ ಅವರು ಕನಿಷ್ಟ ಬ್ಯಾಟಿಂಗ್ ಮಾಡುವಂತಾಗಿದೆ. ಇಲ್ಲದಿದ್ದರೆ ಆರ್ಸಿಬಿ ಬ್ಯಾಟಿಂಗ್ ವಿಭಾಗಕ್ಕೆ ಹೆಚ್ಚಿನ ಹೊಡೆತ ಬೀಳುತ್ತಿತ್ತು. 400 ಪ್ಲಸ್ ರನ್ ಸಿಡಿಸಿ ಆರೆಂಜ್ ಕ್ಯಾಪ್ ಕೂಡ ಹೊಂದಿರುವ ಪ್ಲೆಸಿಸ್, ಕೆಕೆಆರ್ ವಿರುದ್ಧದ ಪಂದ್ಯದಲ್ಲೂ ಬ್ಯಾಟಿಂಗ್ ಮಾತ್ರ ಮಾಡಲಿದ್ದಾರೆ ಎನ್ನಲಾಗಿದೆ.
ಇದನ್ನೂ ಓದಿ: