ನವದೆಹಲಿ: ಪ್ರಸಕ್ತ ಐಪಿಎಲ್ ಟೂರ್ನಿಯಲ್ಲಿ ಪಂಜಾಬ್ ಕಿಂಗ್ಸ್ ತಂಡ ಪ್ಲೇಆಫ್ ಹಂತಕ್ಕೇರಲು ವಿಫಲವಾದರೂ ಕೂಡ ಸ್ಫೋಟಕ ಆಟಗಾರ ಶಿಖರ್ ಧವನ್ ಅದ್ಭುತ ಬ್ಯಾಟಿಂಗ್ ಪ್ರದರ್ಶನ ಮಾಡಿದರು. 14 ಲೀಗ್ ಪಂದ್ಯಗಳಲ್ಲಿ 38.3 ರನ್ ಸರಾಸರಿಯಲ್ಲಿ ಧವನ್ ಒಟ್ಟು 460 ರನ್ ಪೇರಿಸಿದ್ದಾರೆ. ತಂಡವನ್ನು ಪ್ಲೇಆಫ್ಗೆ ತೆಗೆದುಕೊಂಡು ವಿಶ್ವಾಸವನ್ನು ಧವನ್ ಹೊಂದಿದ್ದರು. ಆದರೆ, ಅದು ವಿಫಲವಾಯಿತು. ಆದರೂ, ಧೃತಿಗೆಡದ ಧವನ್ ಮುಂದಿನ ಬಾರಿ ಪುಟಿದೇಳುವ ವಿಶ್ವಾಸ ಹೊಂದಿದ್ದಾರೆ.
ಇನ್ನು ಧವನ್ ಅವರಿಗೆ ಕ್ರಿಕೆಟ್ ಹೊರತಾಗಿ ಮತ್ತೊಂದು ರೂಪವಿದೆ. ಅದೇನಪ್ಪಾ ಅಂದರೆ ಸಾಮಾಜಿಕ ಜಾಲತಾಣದಲ್ಲಿ ಸಕ್ರೀಯರಾಗಿರುವ ಧವನ್, ಸಾಕಷ್ಟು ಫನ್ ಮಾಡುತ್ತಿರುತ್ತಾರೆ. ಅವರ ಹಾಸ್ಯ ಜ್ಞಾನ ಚೆನ್ನಾಗಿದೆ. ಡಾನ್ಸ್ ಕೂಡ ಸಖತ್ ಆಗಿ ಮಾಡುತ್ತಾರೆ. ಜಾಲತಾಣವನ್ನು ಸಮರ್ಪಕವಾಗಿ ಬಳಸಿಕೊಳ್ಳುವ ಧವನ್ ಆಗಾಗ ಫನ್ನಿ ವಿಡಿಯೋಗಳನ್ನು ಬಿಡುತ್ತಿರುತ್ತಾರೆ.
ಇದೀಗ ಇನ್ಸ್ಟಾಗ್ರಾಂನಲ್ಲಿ ಹರಿಬಿಟ್ಟಿರುವ ವಿಡಿಯೋದಲ್ಲಿ ಧವನ್ ತಮ್ಮ ತಂದೆಯ ಜತೆಗೆ ಫನ್ ಮಾಡುತ್ತಿರುವ ದೃಶ್ಯವಿದೆ. ವಿಡಿಯೋದಲ್ಲಿ ಧವನ್ಗೆ ಅವರ ತಂದೆ ಹಿಗ್ಗಾಮುಗ್ಗಾ ಬಾರಿಸುವ ದೃಶ್ಯವನ್ನು ಕಾಣಬಹುದು. ಕೆಳಗೆ ಬಿದ್ದರೂ ಬಿಡದೇ ಧವನ್ಗೆ ಬಾರಿಸುತ್ತಿರುವುದು ಮತ್ತು ಕುಟುಂಬದ ಇತರೆ ಸದಸ್ಯರು ತಡೆಯಲು ಯತ್ನಿಸುತ್ತಿರುವ ದೃಶ್ಯ ವಿಡಿಯೋದಲ್ಲಿದೆ.
ನಾಕೌಟ್ ಪಂದ್ಯಕ್ಕೆ ಅಥವಾ ಪ್ಲೇಆಫ್ ಹಂತಕ್ಕೆ ಅರ್ಹತೆ ಪಡೆಯದಿದ್ದಕ್ಕೆ ನಮ್ಮ ತಂದೆ ನನಗೆ ನಾಕೌಟ್ ಮಾಡಿದರು ಎಂಬ ಅಡಿಬರವನ್ನು ನೀಡಿ ಇನ್ಸ್ಟಾಗ್ರಾಂನಲ್ಲಿ ವಿಡಿಯೋವನ್ನು ಧವನ್ ಹರಿಬಿಟ್ಟಿದ್ದಾರೆ. ವಿಡಿಯೋ ಸದ್ಯ ಸಿಕ್ಕಾಪಟ್ಟೆ ವೈರಲ್ ಆಗಿದ್ದು ಈಗಾಗಲೇ 7 ಲಕ್ಷಕ್ಕೂ ಅಧಿಕ ಮಂದಿ ವಿಡಿಯೋ ವೀಕ್ಷಣೆ ಮಾಡಿದ್ದಾರೆ. ಮೆಚ್ಚುಗೆಯ ಮಹಾಪೂರವೇ ಹರಿದುಬರುತ್ತಿದೆ. ನಿಮ್ಮ ಕಾಮಿಡಿ ಟೈಂಗೆ ಸಲಾಂ ಎಂದಿದ್ದಾರೆ.
ಇನ್ನೂ ಐಪಿಎಲ್ ಟೂರ್ನಿಯಲ್ಲಿ ಪಂಜಾಬ್ ಕಿಂಗ್ಸ್ 6ನೇ ಸ್ಥಾನದೊಂದಿಗೆ ತನ್ನ ಜರ್ನಿಯನ್ನು ಮುಗಿಸಿತು. ಪಂಜಾಬ್ ತಂಡವನ್ನು ಕನ್ನಡಿಗ ಮಯಾಂಕ್ ಅಗರ್ವಾಲ್ ಮುನ್ನಡೆಸಿದರು. ಐಪಿಎಲ್ನಲ್ಲಿ ಧವನ್ ಅದ್ಭುತ ಬ್ಯಾಟಿಂಗ್ ಪ್ರದರ್ಶನ ನೀಡಿದಾದರೂ ದಕ್ಷಿಣ ಆಫ್ರಿಕಾ ವಿರುದ್ಧದ ಟಿ20 ಸರಣಿಗೆ ಆಯ್ಕೆಯಾಗದಿರುವುದು ಧವನ್ ಅಭಿಮಾನಿಗಳ ಅಸಮಾಧಾನಕ್ಕೆ ಕಾರಣವಾಗಿದೆ. ಜೂನ್ 9ರಿಂದ 5 ಪಂದ್ಯಗಳ ಟಿ20 ಸರಣಿಯನ್ನು ಭಾರತ ಆತಿಥೇಯ ದಕ್ಷಿಣ ಆಫ್ರಿಕಾ ವಿರುದ್ಧ ಆಡಲಿದೆ. (ಏಜೆನ್ಸೀಸ್)
ನನ್ನ ಪತ್ನಿ ಕೈಗೆ ಸಿಕ್ಕಿದ್ದರಲ್ಲಿ ಬಾರಿಸ್ತಾಳೆ.. ಕಾಪಾಡಿ ಸರ್: ವಿಡಿಯೋ ಸಮೇತ ಕೋರ್ಟ್ ಮೆಟ್ಟಿಲೇರಿದ ಪ್ರಾಂಶುಪಾಲ
ಬಾಗಲಕೋಟೆಯಲ್ಲಿ ತಲೆಗೂದಲಿಗೆ ಬಣ್ಣ ಹಾಕುವ ವಿಚಾರದಲ್ಲಿ ಜಗಳ: ಗ್ರಾಹಕನ ಎದೆಗೆ ಇರಿದು ಹತ್ಯೆಗೈದ ಕ್ಷೌರಿಕ