ವಾಷಿಂಗ್ಟನ್: ಜಗತ್ತಿನಲ್ಲೇ ಮೊದಲ ಬಾರಿಗೆ ತಳೀಯವಾಗಿ ಮಾರ್ಪಡಿಸಿದ ಹಂದಿ ಹೃದಯ ಕಸಿಗೆ ಒಳಗಾಗಿದ್ದ 57 ವರ್ಷದ ವ್ಯಕ್ತಿ, ಐತಿಹಾಸಿಕ ಶಸ್ತ್ರಚಿಕಿತ್ಸೆ ನಡೆದ ಎರಡು ತಿಂಗಳ ಬಳಿಕ ಮೃತಪಟ್ಟಿದ್ದಾರೆ.
ಈ ಐತಿಹಾಸಿಕ ಶಸ್ತ್ರಚಿಕಿತ್ಸೆಯಿಂದ ಅಡ್ಡ-ಜಾತಿಯ ಅಂಗಾಂಗ ದಾನದ ಪ್ರಗತಿಯಾಗಿ ಮುಂದಿನ ದಿನಗಳಲ್ಲಿ ಮಾನವ ಅಂಗಗಳ ದೀರ್ಘಕಾಲದ ಕೊರತೆಯನ್ನು ಪರಿಹರಿಸಬಹುದು ಎಂಬ ಭರವಸೆಯನ್ನು ಹುಟ್ಟುಹಾಕಿತ್ತು. ಆದರೆ, ಇದೀಗ ಆಪರೇಷನ್ಗೆ ಒಳಗಾದ ವ್ಯಕ್ತಿ ಮೃತಪಟ್ಟಿರುವುದು ಭರವಸೆಯು ಮಂಕಾದಂತಾಗಿದೆ.
ಡೇವಿಡ್ ಬೆನೆಟ್ (57) ಎಂಬ ರೋಗಿಯು ಕಳೆದ ಜನವರಿ 7ರಂದು ಹಂದಿ ಹೃದಯ ಕಸಿಗೆ ಒಳಗಾಗಿದ್ದರು. ಇವರು ಮಾರ್ಚ್ 8 ರಂದು ಮೃತಪಟ್ಟಿದ್ದಾರೆಂದು ಈ ಹಿಂದೆ ಶಸ್ತ್ರಚಿಕಿತ್ಸೆ ನಡೆಸಿದ್ದ ಮೇರಿಲ್ಯಾಂಡ್ ಮೆಡಿಕಲ್ ಸ್ಕೂಲ್ ಯೂನಿವರ್ಸಿಟಿ ತನ್ನ ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದೆ.
ಕೆಲವು ದಿನಗಳ ಹಿಂದೆ ಬೆನೆಟ್ ಅವರ ಆರೋಗ್ಯ ತೀವ್ರ ಹದಗೆಟ್ಟಿತ್ತು. ಆ ಬಳಿಕವಷ್ಟೇ ಹಂದಿ ಹೃದಯ ಅಳವಡಿಸುವ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿತ್ತು. ಶಸ್ತ್ರಚಿಕಿತ್ಸೆ ನಡೆದ ಬಳಿಕ ಹೊಸ ಅಂಗ ಯಾವ ರೀತಿ ಕಾರ್ಯನಿರ್ವಹಿಸಲಿದೆ ಎಂದು ತಿಳಿದುಕೊಳ್ಳಲು ಹತ್ತಿರದಿಂದ ರೋಗಿಯ ಮೇಲ್ವಿಚಾರಣೆ ಕೂಡ ಮಾಡಲಾಗುತ್ತಿತ್ತು. ಸರ್ಜರಿ ಬಳಿಕ ಹಲವು ದಿನಗಳವರೆಗೆ ಬೆನೆಟ್ ಆರೋಗ್ಯವಾಗಿಯೇ ಇದ್ದರು. ಯಾವುದೇ ರೋಗ ಲಕ್ಷಣಗಳು ಆರಂಭದಲ್ಲಿ ಕಂಡುಬಂದಿರಲಿಲ್ಲ ಎಂದು ಆಸ್ಪತ್ರೆಯ ಆಡಳಿತ ಮಂಡಳಿ ತಿಳಿಸಿದೆ.
ಬೆನೆಟ್ ಅವರು ತಾವೊಬ್ಬ ಧೈರ್ಯಶಾಲಿ ಮತ್ತು ಉದಾತ್ತ ರೋಗಿಯೆಂದು ಸಾಬೀತುಪಡಿಸಿದರು. ಬಹಳ ಧೈರ್ಯದಿಂದಲೇ ಈ ಶಸ್ತ್ರಚಿಕಿತ್ಸೆಗೆ ಒಪ್ಪಿದ ಬೆನೆಟ್ ಸಾವಿನ ಕೊನೆಯವರೆಗೂ ಹೋರಾಡಿದರು. ನಾವು ಅವರ ಕುಟುಂಬಕ್ಕೆ ನಮ್ಮ ಪ್ರಾಮಾಣಿಕ ಸಂತಾಪವನ್ನು ವ್ಯಕ್ತಪಡಿಸುತ್ತೇವೆ ಎಂದು ಕಾರ್ಯವಿಧಾನವನ್ನು ಮುನ್ನಡೆಸಿದ ಶಸ್ತ್ರಚಿಕಿತ್ಸಕ ಬಾರ್ಟ್ಲಿ ಗ್ರಿಫಿತ್ ಹೇಳಿದರು.
ಮೇರಿಲ್ಯಾಂಡ್ ನಿವಾಸಿಯಾಗಿದ್ದ ಬೆನೆಲ್ ಹೃದಯ-ಶ್ವಾಸಕೋಶದ ಬೈಪಾಸ್ ಮೆಷಿನ್ ಸಮಸ್ಯೆಯಿಂದ ಕಳೆದ ಹಲವು ತಿಂಗಳುಗಳಿಂದ ಹಾಸಿಗೆ ಹಿಡಿದಿದ್ದರು. ಈ ಕಸಿಯನ್ನು ಮಾಡಿ. ನಾನು ಬದುಕಲು ಬಯಸಿದ್ದೇನೆ. ಇದೇ ನನ್ನ ಕೊನೆಯ ಅವಕಾಶ ಎಂದು ಬೆನೆಟ್ ಸರ್ಜರಿಗೂ ಮುನ್ನ ದಿನ ಕೊನೆಯ ಹೇಳಿಕೆ ನೀಡಿದ್ದರು. ನಾನು ಚೇತರಿಸಿಕೊಂಡ ನಂತರ ಹಾಸಿಗೆಯಿಂದ ಹೊರಬರಲು ಎದುರು ನೋಡುತ್ತಿದ್ದೇನೆ ಎಂದಿದ್ದರು. ಆದರೆ, ಈಗ ಇಹಲೋಕವನ್ನೇ ತ್ಯಜಿಸಿದ್ದಾರೆ. (ಏಜೆನ್ಸೀಸ್)
ಪರಿವರ್ತನೆಗೆ ಈ ವಿಡಿಯೋ ನೋಡಿ ಎಂದು ಒಳ ಉಡುಪುಗಳನ್ನು ಪ್ರದರ್ಶಿಸಿದ ನಟಿ ಯಶಿಕಾ! ವಿಡಿಯೋ ವೈರಲ್
ಕೇಜ್ರಿವಾಲ್ ಪ್ರಧಾನಿ ಆಗಲಿದ್ದಾರೆ: ಪಂಜಾಬ್ನಲ್ಲಿ ಎಎಪಿ ಭರ್ಜರಿ ಮುನ್ನಡೆ ಬೆನ್ನಲ್ಲೇ ಕೇಳಿಬಂತು ಭವಿಷ್ಯ
ಮತಎಣಿಕೆಗೂ ಮುನ್ನ ರಾಜ್ಯಪಾಲರ ಬಳಿ ಸಮಯ ಕೇಳಿ ಇದೀಗ ಮುಖಭಂಗ ಅನುಭವಿಸಿದ ಕಾಂಗ್ರೆಸ್!