ಮಹಿಳೆ ಅಂದ ತಕ್ಷಣ ಅವರನ್ನು ನೋಡುವ ರೀತಿ ಬೇರೆ ಇದೆ. ಅವರಿಗೆ ಎಲ್ಲವೂ ಕಷ್ಟಕರ ಅನ್ನೋ ಮಾತಿದೆ. ಆದರೆ, ಮಹಿಳೆಗೆ ಇರುವ ಪವರ್ ಮತ್ಯಾರಿಗೂ ಇಲ್ಲ. ಹಾಗಂತ ಇಲ್ಲಿ ಪುರುಷನನ್ನು ಜರಿಯುತ್ತಿಲ್ಲ. ಯಾವುದೇ ಕೆಲಸ ಅಂತ ಬಂದರೂ ಪುರುಷನಿಗೆ ಸರಿಸಮನಾಗಿ ಮಹಿಳೆ ನಿಲ್ಲುತ್ತಿದ್ದಾಳೆ. ಶಿಕ್ಷಣದ ವಿಚಾರಕ್ಕೆ ಬಂದರೆ ಪ್ರತಿ ವರ್ಷ ಹುಡುಗಿಯರದ್ದೇ ಮೇಲುಗೈ. ನನಗೂ ಅದೊಂದು ಹೆಮ್ಮೆಯ ವಿಚಾರ. ಮಹಿಳಾ ಸ್ವಾತಂತ್ರ್ಯ ಎಂಬ ವಿಚಾರ ಬಂದಾಗ, ನಮ್ಮ ಮನೆಯಲ್ಲಿ ನಾನು ಫ್ರೀ ಬರ್ಡ್. ನನ್ನ ಕನಸುಗಳಿಗೆ ಮನೆಯವರೇ ರೆಕ್ಕೆಗಳಾಗಿದ್ದಾರೆ. ಆದರೆ, ಇಂದಿಗೂ ಸಾಕಷ್ಟು ಮನೆಗಳಲ್ಲಿ ಹೆಣ್ಣುಮಕ್ಕಳು ಬಂಧಿಯಾಗಿದ್ದಾರೆ. ಅವರ ಸಾಧನೆಯ ಕನಸಿಗೆ ಅಂಕುಶ ಹಾಕಲಾಗುತ್ತಿದೆ. ಹೆಣ್ಣು ಮನೆಗಷ್ಟೇ ಸೀಮಿತ, ನಾಲ್ಕು ಗೋಡೆಯ ಮಧ್ಯೆಯೇ ಅವಳಿರಬೇಕು ಎಂಬ ಕೆಟ್ಟ ಸಂಪ್ರದಾಯ ಆಚರಣೆಯಲ್ಲಿದೆ. ಆಕೆಗೂ ಕನಸುಗಳಿರುತ್ತವೆ. ಸಾಧಿಸಬೇಕಾದ ಸಾಕಷ್ಟು ಆಸೆ, ಗುರಿಗಳಿರುತ್ತವೆ. ಹಾಗಾಗಿ ಅವುಗಳಿಗೂ ಬೆಂಬಲಿಸುವ ಮನಸ್ಸು ಎಲ್ಲರದ್ದಾಗಲಿ.
