ದೃಶ್ಯ-ಶ್ರಾವ್ಯಗಳ ನಡುವೆ ಬರೀ ಮಾತು ಸೊರಗತೊಡಗಿದೆ. ಅಂದರೆ ಫೇಸ್ಬುಕ್- ಇನ್ಸ್ಟಾಗ್ರಾಂನಂಥ ಪ್ರಭಾವಿ ದೃಶ್ಯ ಮಾಧ್ಯಮದ ಮಧ್ಯದಲ್ಲಿ ಸೋಷಿಯಲ್ ಆಡಿಯೋ ಸೆಳೆತ ಕಳೆದು ಹೋಗಲಾರಂಭಿಸಿದೆ. ಕೇವಲ ಆಡಿಯೋ ಮನಸ್ಸನ್ನು ಮುಟ್ಟುತ್ತಿಲ್ಲ, ವಿಡಿಯೋದಲ್ಲಿ ಆಡಿಯೋ ಕೂಡ ಬೇಕು. ಅಶರೀರವಾಣಿಗಿಂತ ಶರೀರ-ಶಾರೀರದ ಸಮ್ಮಿಳಿತವೇ ಜನರಿಗೆ ಆಪ್ತ ಎನಿಸಲಾರಂಭಿಸಿದೆ ಎಂಬಂತಾಗಿರುವ ಪರಿಸ್ಥಿತಿಯ ಬಗ್ಗೆ ಇದೊಂದು ಅವಲೋಕನ.
| ಎನ್. ಗುರುನಾಗನಂದನ, ಬೆಂಗಳೂರು
ಬಸ್ನಲ್ಲಿ ಪ್ರಯಾಣ ಮಾಡುವಾಗ ಎಫ್ಎಮ್ ಕೇಳುತ್ತಿದ್ದೆವು. ಆದರೆ ಈಗ ಶಾರ್ಟ್ಸ್-ರೀಲ್ಸ್ ನೋಡುತ್ತೇವೆ. ಕೆಲವರು ಸಿನಿಮಾ-ಸೀರಿಯಲ್ ವೀಕ್ಷಿಸುತ್ತಾರೆ. ಅದು ತಪ್ಪಲ್ಲ.. ಆದರೆ ಆಡಿಯೋಪ್ರಧಾನ ಮಾಧ್ಯಮಗಳು ಈಗ ಕಳೆದು ಹೋಗುತ್ತಿವೆ. ಧ್ವನಿಗೆ ಕಲ್ಪನಾ ಶಕ್ತಿ, ಸೃಜನಶೀಲತೆಯನ್ನು ಹೆಚ್ಚಿಸುವ ಸಾಮರ್ಥ್ಯವಿದೆ. ಸುಮ್ಮನೆ ಕಣ್ಣು ಮುಚ್ಚಿಕೊಂಡು ಇಷ್ಟವಾದ ಹಾಡು ಕೇಳಿಸಿಕೊಂಡರೆ ಮನಸ್ಸಿನಲ್ಲಿ ನಮ್ಮದೇ ಆದ ಕಲ್ಪನಾ ಲಹರಿ ಹುಟ್ಟುತ್ತದೆ. ಆದರೆ ಎಷ್ಟೋ ಜನ ಆ ಸುಂದರ ಕಲ್ಪನಾ ಲೋಕದ ಪರಿಕಲ್ಪನೆಯಿಂದ ವಂಚಿತರಾಗುತ್ತಿದ್ದಾರೆ. ಹಿಂದೆ ರೇಡಿಯೋದಲ್ಲಿ ಸಿನಿಮಾ ಪ್ರಸಾರವಾಗುತ್ತಿತ್ತು. ಅದನ್ನು ಕೇಳಿ ಆನಂದಿಸುತ್ತಿದ್ದೆವು. ಆದರೀಗ ದೃಶ್ಯವಿಲ್ಲದೆ ಕೇವಲ ಸಂಭಾಷಣೆ ಕೇಳಿಸಿಕೊಳ್ಳುವ ಆಸಕ್ತಿ ಕುಂದುತ್ತಿದೆ. ಬೇರೊಂದು ಕೆಲಸ ಮಾಡುವಾಗಲೂ ಕೇಳಿಸಿಕೊಳ್ಳುತ್ತ ಮಾಡಬಹುದು. ಆದರೆ ವಿಡಿಯೋ ವೀಕ್ಷಿಸುವಾಗ ಅದು ಸಾಧ್ಯವಿಲ್ಲ, ಅಲ್ಲಿ ಕಣ್ಣು-ಕೈಗೂ ಶ್ರಮವಾಗುತ್ತದೆ. ಇತ್ತೀಚೆಗೆ ಪಾಡ್ಕ್ಯಾಸ್ಟ್ ಕೂಡ ದೃಶ್ಯದ ಮೂಲಕ ಜನರಿಗೆ ನೀಡಲಾಗುತ್ತಿದೆ. ಇದಕ್ಕೆ ಕಾರಣ ಬಹಳ ಸ್ಪಷ್ಟ. ಬರೀ ಕೇಳಿಸಿಕೊಳ್ಳುವ ಆಸಕ್ತಿ ಜನರಲ್ಲಿ ಕ್ಷೀಣಿಸಲಾರಂಭಿಸಿದೆ. ಇದಕ್ಕೆ ಅತ್ಯುತ್ತಮ ಉದಾಹರಣೆ ಎಂದರೆ ಕ್ಲಬ್ಹೌಸ್.
ಮೊದಲು ಐಒಎಸ್ನಲ್ಲಿ ಮಾತ್ರ ಸಿಗುತ್ತಿದ್ದ ಕ್ಲಬ್ಹೌಸ್ ಎಂಬ ಸೋಷಿಯಲ್ ಆಡಿಯೋ ಆಪ್ನ ಆಂಡ್ರಾಯ್್ಡ ವರ್ಷನ್ 2021ರ ಮೇ ತಿಂಗಳಲ್ಲಿ ಜಗತ್ತಿನಾದ್ಯಂತ ಲಭ್ಯವಾಯಿತು. ಹಾಗೆ ಸಿಕ್ಕ ಕ್ಲಬ್ಹೌಸನ್ನು ಜನರು ಅಪ್ಪಿಕೊಂಡರು. ಅದೇ ಕಾರಣಕ್ಕೆ ಇನ್ನೂ ಹಲವು ಸೋಷಿಯಲ್ ಆಡಿಯೋ ಆಪ್ಗಳೂ ಶುರುವಾದವು. ಈಗಾಗಲೇ ಇರುವ ಸೋಷಿಯಲ್ ಮೀಡಿಯಾ ಆಪ್ಗಳು ಕೂಡ ಕ್ಲಬ್ಹೌಸ್ನ ಅಬ್ಬರ ಕಂಡು ಆಡಿಯೋಗೆ ಆದ್ಯತೆ ನೀಡಿದವು. ದೃಶ್ಯಗಳ ಸಹಾಯವಿಲ್ಲದೆ ಕೇವಲ ಧ್ವನಿಯ ಮೂಲಕ ವಿಷಯ ಹಂಚಿಕೊಳ್ಳುವ, ಮಾತುಕತೆಗಳು ಹೆಚ್ಚಾದವು.
ಸರಿಯಾದ ಪ್ರವೇಶ: ಕ್ಲಬ್ಹೌಸ್ ಪ್ರವೇಶ ಕೊಟ್ಟ ಸಂದರ್ಭ ಅದರ ಯಶಸ್ಸಿನಲ್ಲಿ ಮಹತ್ವದ ಪಾತ್ರ ವಹಿಸಿತ್ತು. ಕರೊನಾದಿಂದ ಕಂಗೆಟ್ಟಿದ್ದ, ಲಾಕ್ಡೌನ್ನಿಂದ ಕಂಗಾಲಾಗಿದ್ದ ಜನರಿಗೆ, ಮನೆಯಲ್ಲೇ ಇದ್ದು ಬೋರಾಗಿದ್ದವರಿಗೆ ಏಕಾಂತ ಕಳೆಯಲು, ತಮ್ಮ ಅನಿಸಿಕೆ ಹೇಳಿಕೊಳ್ಳಲು, ಭಾವನೆಗಳನ್ನು ಹಂಚಿಕೊಳ್ಳಲು ಕ್ಲಬ್ಹೌಸ್ ಉತ್ತಮ ವೇದಿಕೆ ಆಯಿತು. ಆಧುನಿಕ ಟಚ್ ಇರುವ ಕ್ಲಬ್ಹೌಸ್ನಿಂದಾಗಿ ಸುಲಭದಲ್ಲಿ ಅಪರಿಚಿತರೊಂದಿಗೆ ಫೋನ್ ನಂಬರ್ ಇಲ್ಲದೆ, ಕುಳಿತಲ್ಲಿಯೇ ನೇರವಾಗಿ ಮಾತನಾಡಿ ನೆಟ್ವರ್ಕ್ ಬೆಳೆಸಿಕೊಳ್ಳಲು ಸದವಕಾಶ ಸಿಕ್ಕಿತು. ಕೇವಲ ಕೇಳಿಸಿಕೊಳ್ಳುವ ಆಯ್ಕೆ ಕೂಡ ಇತ್ತು. ಅದರೊಂದಿಗೆ ಪ್ರಭಾವಿ ವ್ಯಕ್ತಿಗಳ ಬಳಿಯೂ ಸಲೀಸಾಗಿ ಮಾತಾಡಬಹುದಾಗಿದ್ದರಿಂದ ಹೆಚ್ಚು ಜನರಿಗೆ ಬಹಳ ಬೇಗನೆ ಕ್ಲಬ್ಹೌಸ್ ಹತ್ತಿರವಾಯಿತು. ಇನ್ನು ಕರೊನಾ ಸಮಯದಲ್ಲಿ ಯಾರೂ ಕ್ಲಬ್-ಪಾರ್ಟಿಗಳಿಗೆ ಹೋಗುವಂತಿರಲಿಲ್ಲ. ಆದರೆ ಕ್ಲಬ್ಬೌಸ್ನಲ್ಲಿ ಪಾರ್ಟಿ ಮಾಡುತ್ತಿದ್ದರು. ಗೂಗಲ್ ಮೀಟ್, ಜೂಮ್ಂಥ ಆಪ್ಗಳ ಮೂಲಕ ನಡೆಯುತ್ತಿದ್ದ ಆಫೀಸ್ ಮೀಟಿಂಗ್, ಆನ್ಲೈನ್ ಕ್ಲಾಸ್ಗಳಲ್ಲಿ ಗಂಭೀರವಾಗಿ, ಅಳೆದು ತೂಗಿ ಮಾತನಾಡಬೇಕಿತ್ತು. ಹಾಕಿರುವ ಬಟ್ಟೆ, ಬ್ಯಾಕ್ಗ್ರೌಂಡ್ ಸರಿಯಾಗಿದೆಯೇ ಎಂಬ ಎಲ್ಲ ಅಂಶಗಳನ್ನು ಯೋಚಿಸಿ ಕ್ಯಾಮೆರಾ ಆನ್ ಮಾಡಿ ಸಂಭಾಷಣೆ ನಡೆಸಬೇಕಿತ್ತು. ಅದೇ ಕಾರಣಕ್ಕೆ ಬಹಳಷ್ಟು ಮಂದಿ ಜೂಮ್ ಫ್ಯಾಟಿಗ್ನಿಂದ ಬಳಲುತ್ತಿದ್ದರು. ಅಂತಹ ಸಂದರ್ಭದಲ್ಲಿ ಬಂದ ಕ್ಲಬ್ಹೌಸ್ ವಿಶೇಷ ಅನಿಸಿದ್ದಲ್ಲದೆ, ಜನರನ್ನು ಸೆಳೆದು ಬಿಟ್ಟಿತು. ರಾಜಕೀಯ, ಸಿನಿಮಾ, ಇತಿಹಾಸ, ಪುರಾಣಗಳೇ ಮೊದಲಾದ ಹಲವಾರು ವಿಷಯಗಳ ಬಗ್ಗೆ ಗಂಟೆಗಟ್ಟಲೆ ಕ್ಲಬ್ಹೌಸ್ನಲ್ಲಿ ಚರ್ಚೆಯಾಗುತ್ತಿತ್ತು. ಎಫ್ಎಮ್ಲ್ಲಿ ಇದ್ದಹಾಗೆ ಹಾಡುಗಳು ಕೂಡ ಬರುತ್ತಿದ್ದವು. ಅದರೊಂದಿಗೆ ಕೇವಲ ಧ್ವನಿಯ ಮೂಲಕ ನಾಟಕಗಳ ಪ್ರದರ್ಶನ ಕೂಡ ನಡೆಯುತ್ತಿತ್ತು. ಕ್ಯಾಲಿಫೋರ್ನಿಯಾದ ಕಾಲೇಜ್ ಆಫ್ ಅಲ್ಮೆಡ ನಡೆಸಿದ ಅಧ್ಯಯನದ ಪ್ರಕಾರ 2020ರ ಮಾರ್ಚ್ನಲ್ಲಿ ಕ್ಲಬ್ಹೌಸ್ ಬಳಕೆದಾರರ ಸಂಖ್ಯೆ 5,000 ಇತ್ತು. ಅಂತಾರಾಷ್ಟ್ರೀಯ, ರಾಷ್ಟ್ರ, ರಾಜ್ಯಮಟ್ಟದ ಸೆಲೆಬ್ರಿಟಿಗಳನ್ನು ಸುಲಭವಾಗಿ ಮಾತನಾಡಿಸುವ ಅವಕಾಶ ಸಾಮಾನ್ಯ ಜನರಿಗೆ ಕ್ಲಬ್ಹೌಸ್ನಲ್ಲಿ ದೊರಕಿತು. ಇದರ ಪರಿಣಾಮ 2021ರ ಫೆಬ್ರವರಿ ಸುಮಾರಿಗೆ ಕ್ಲಬ್ಹೌಸ್ ಡೌನ್ಲೋಡ್ ಸಂಖ್ಯೆ 1 ಕೋಟಿಯನ್ನು ದಾಟಿತು. ಮಾತ್ರವಲ್ಲ, 30ಕ್ಕೂ ಹೆಚ್ಚು ದೇಶಗಳಲ್ಲಿ ನಂಬರ್ ಒನ್ ಆಪ್ ಸ್ಥಾನ ಪಡೆಯಿತು.
ಹೊಸ ಆಡಿಯೋ ನೆಟ್ವರ್ಕ್ಗಳಿಗೆ ಕ್ಲಬ್ಹೌಸ್ ನಾಂದಿ
ಕ್ಲಬ್ಹೌಸ್ ಯಶಸ್ಸನ್ನು ಕಂಡು ಅದನ್ನು ಹಿಂದಿಕ್ಕಲು ಮೊದಲೇ ಪ್ರಚಲಿತದಲ್ಲಿದ್ದ ಸೋಷಿಯಲ್ ಮೀಡಿಯಾ ಆಪ್ಗಳು ತಮ್ಮದೇ ಆದ ಆಡಿಯೋ ನೆಟ್ವರ್ಕಿಂಗ್ ಪ್ಲಾ್ಯಟ್ಫಾಮ್ರ್ ತೆರೆಯಲು ಆರಂಭಿಸಿದರು. ಟ್ವಿಟರ್ನಲ್ಲಿ ‘ಟ್ವಿಟರ್ ಸ್ಪೇಸ್’, ಫೇಸ್ಬುಕ್ ಲೈವ್ ಆಡಿಯೋ ರೂಮ್ ಸ್ಪಾಟಿಫೈನ ‘ಗ್ರೀನ್ ರೂಮ್ ಮೊದಲಾದ ಹಲವಾರು ಆಡಿಯೋ ಪ್ಲಾ್ಯಟ್ಫಾಮರ್್ಗಳೂ ಕ್ಲಬ್ಹೌಸ್ಗೆ ಪೈಪೋಟಿ ಕೊಡುವಂತೆ ಹುಟ್ಟಿಕೊಂಡವು. ಮಾರ್ಚ್ 2020ರಲ್ಲಿ ಟ್ವಿಟರ್ ‘ಟ್ವಿಟರ್ ಸ್ಪೇಸ್’ ಎಂಬ ಆಡಿಯೋ ಸೋಷಿಯಲ್ ತಾಣ ತೆರೆಯಿತು.
ದೃಶ್ಯಗಳ ನಡುವೆ ಕಳೆದು ಹೋದ ಧ್ವನಿ…
ಕ್ಲಬ್ಹೌಸ್ ಬಳಕೆದಾರರ ಸಂಖ್ಯೆ ತಗ್ಗಿರುವುದಷ್ಟೇ ಅಲ್ಲ, ಟ್ವಿಟರ್ ಸ್ಪೇಸ್ ಹಾಗೂ ಫೇಸ್ಬುಕ್ ಲೈವ್ ಆಡಿಯೋ ರೂಮ್ೆ ಜನರಲ್ಲಿ ಅಂಥ ಸೆಳೆತ ಉಂಟಾಗದಿರುವುದು ಕೂಡ ಸೋಷಿಯಲ್ ಆಪ್ಗಳಲ್ಲಿ ಬರೀ ಕೇಳುವುದರಲ್ಲಿ ಆಸಕ್ತಿ ಕುಂದಿದೆ ಎನ್ನುವುದಕ್ಕೆ ನಿದರ್ಶನವಾಗಿದೆ. ಕ್ಲಬ್ಹೌಸ್ನಂತೆ ಫೇಸ್ಬುಕ್ ಲೈವ್ ಆಡಿಯೋ ರೂಮ್ ಟ್ವಿಟರ್-ಸ್ಪೇಸ್ ಕೇಳುಗರನ್ನು ಆಕರ್ಷಿಸುವಲ್ಲಿ ಬಹುತೇಕ ವಿಫಲವಾಗಿವೆ. ಎಷ್ಟೋ ಮಂದಿಗೆ ಫೇಸ್ಬುಕ್ ಒಂದು ಲೈವ್ ಆಡಿಯೋ ರೂಮ್ ಎಂಬ ಆಯ್ಕೆ ನೀಡಿದೆ ಎಂಬುದೇ ತಿಳಿಯದೆ ಹೋಯಿತು. ಇದಕ್ಕೆ ಹಲವು ಕಾರಣಗಳಿವೆ. ಪ್ರಧಾನವಾಗಿ ಫೇಸ್ಬುಕ್, ಟ್ವಿಟರ್, ರೆಡಿಟ್ನ ಜನಪ್ರಿಯತೆಯೇ ಅವುಗಳಿಗೆ ಮುಳ್ಳಾಯಿತು. ಇವು ದೃಶ್ಯ ಮಾಧ್ಯಮವಾಗಿ ಬೆಳೆದಿರುವ ಸಾಮಾಜಿಕ ಜಾಲತಾಣಗಳು. ಇದರಲ್ಲಿ ಕೇವಲ ಧ್ವನಿಯ ಮೂಲಕ ಸಂಭಾಷಿಸಲು ಜನರು ಇಷ್ಟ ಪಡಲಿಲ್ಲ ಎಂಬುದು ಸೋಷಿಯಲ್ ಮೀಡಿಯಾ ತಜ್ಞರ ಅಭಿಪ್ರಾಯ. ಕ್ಲಬ್ಹೌಸ್ಗೆ ಯಾವುದೇ ರೀತಿಯ ಹಿನ್ನೆಲೆ ಇರಲಿಲ್ಲ. ನೇರವಾಗಿ ಆಡಿಯೋ ಸೋಷಿಯಲ್ ಮೀಡಿಯಾ ಎಂದು ಗುರುತಿಸಿಕೊಂಡಿತು. ಟ್ವಿಟರ್ ಕೂಡ ಸ್ಪೇಸ್ಅನ್ನು ಜನರಿಗೆ ತಲುಪಿಸುವಲ್ಲಿ ವಿಫಲವಾಯಿತು. ಬಹಳಷ್ಟು ಜನರಿಗೆ ಇದನ್ನು ಬಳಸುವುದು ಹೇಗೆಂದು ತಿಳಿಸುವಲ್ಲಿ ಅದು ಎಡವಿತು. ಇದರೊಂದಿಗೆ ಮತ್ತೊಂದು ಕಾರಣವೆಂದರೆ ತಮ್ಮ ಆಲೋಚನೆಗಳನ್ನು ಬರೆದು, ಚಿತ್ರಗಳ ಮೂಲಕ ಟ್ವಿಟರ್ನಲ್ಲಿ ಹಂಚಿಕೊಳ್ಳುತ್ತಿದ್ದವರಿಗೆ ಆಡಿಯೋ ಮೂಲಕ ಹಂಚಿಕೊಳ್ಳಬೇಕು ಎಂಬ ಮನಸ್ಸಾಗಲಿಲ್ಲ. ದೃಶ್ಯ ಜಾತ್ರೆಯಲ್ಲಿ ಜನರು ಕಳೆದು ಹೋಗಿದ್ದರು. ಈ ಕಾರಣಗಳಿಗೆ ಟ್ವಿಟರ್-ಸ್ಪೇಸ್ ಜನರ ಮನಸ್ಸಿನಲ್ಲಿ ಅಂಥ ಜಾಗ ಪಡೆಯಲು ಆಗಲಿಲ್ಲ.
ಕಲ್ಪನೆಯ ಅಭಾವದಿಂದ ಮಾತು ಮರೆಯಾಗುತ್ತಿದೆಯೇ?
ಬರೀ ಮಾತನ್ನು ಕೇಳುವಲ್ಲಿ ಜನರಿಗೆ ಕ್ರಮೇಣ ಆಸಕ್ತಿ ಕಡಿಮೆ ಆಗತೊಡಗಿತು ಎಂಬುದಕ್ಕೂ ಕ್ಲಬ್ಹೌಸ್ ಉತ್ತಮ ಉದಾಹರಣೆ. ಸಮಯ ಕಳೆದಂತೆ ಜನರಲ್ಲಿ ಕ್ಲಬ್ಹೌಸ್ ಸೆಳೆತ ತಗ್ಗಿದೆ. ಕೇವಲ ಮಾತನಾಡುವುದು, ಬರೀ ಕೇಳಿಸಿಕೊಳ್ಳುವುದು ಬೋರ್ ಆಗತೊಡಗಿದೆ. ಕ್ಯಾಲಿಫೋರ್ನಿಯಾದ ಕಾಲೇಜ್ ಆಫ್ ಅಲ್ಮೆಡದ ಅಧ್ಯಯನ ಪ್ರಕಾರ 1 ಕೋಟಿ ಇದ್ದ ಕ್ಲಬ್ಹೌಸ್ ಬಳಕೆದಾರರ ಸಂಖ್ಯೆ 2021ರ ಸೆಪ್ಟೆಂಬರ್ ಸುಮಾರಿಗೆ 35 ಲಕ್ಷಕ್ಕೆ ಇಳಿದು ಹೋಯಿತು. ಈ ಸ್ಥಿತಿಗೆ ಹಲವಾರು ಕಾರಣಗಳಿವೆ. ಕ್ಲಬ್ಹೌಸ್ನ ಶೇ.56 ಬಳಕೆದಾರರು 18-34 ವರ್ಷದವರಾಗಿದ್ದರು. ಅದರಲ್ಲೂ ಬಹುಪಾಲು ಜೆನರೇಷನ್ ಝೆಡ್ಗೆ ಸೇರಿದವರೇ ಇದ್ದರು. ಇವರು ತಾಂತ್ರಿಕ ಯುಗದಲ್ಲಿ ಹುಟ್ಟಿದವರು. ತಜ್ಞರ ಪ್ರಕಾರ ಜೆನ್ ಝೆಡ್ನವರ ಮೆದುಳು ದೃಶ್ಯ ಚಿತ್ರಣಗಳ ಕಡೆಗೆ ಹೆಚ್ಚು ಆಕರ್ಷಿತಗೊಳ್ಳುತ್ತದೆ ಮತ್ತು ಅವರ ಗಮನ ಒಂದು ವಿಷಯದ ಬಗ್ಗೆ 8 ಸೆಕೆಂಡ್ಗಳು ಮಾತ್ರ ಇರುತ್ತದೆ. ಅವರಿಗೆ ಬೇಗನೆ ಬೇಸರವಾಗುತ್ತದೆ. ಈ ಕಾರಣಕ್ಕಾಗಿಯೆ ರೀಲ್ಸ್-ಶಾರ್ಟ್ಸ್ ವಿಡಿಯೋಗಳು ಈ ಕಾಲದಲ್ಲಿ ಹೆಚ್ಚಾಗಿ ಜನಪ್ರಿಯತೆ ಹೊಂದಿವೆ. ಅವರಿಗೆ ಒಂದು ವಿಷಯಕ್ಕೆ ಹೆಚ್ಚು ಸಮಯ ನೀಡಲಾಗುವುದಿಲ್ಲ. ದೃಶ್ಯಗಳಿಲ್ಲದೆ ಕೇವಲ ಮಾತನಾಡುವುದು ಬೇಸರವನ್ನುಂಟು ಮಾಡಿತು. ಪಾಡ್ಕ್ಯಾಸ್ಟ್ ಕೇಳಲು ಮನಸ್ಸಾಗುವುದಿಲ್ಲ. ಆದರೆ ಅದೇ ಸಂಭಾಷಣೆಯನ್ನು ಯೂಟ್ಯೂಬ್ನಲ್ಲಿ ಸಂದರ್ಶನದಂತೆ ನೋಡಲು ಇಷ್ಟ ಪಡುತ್ತಾರೆ. ಕೇವಲ ಧ್ವನಿ ಮನಸ್ಸಿಗೆ ನಾಟುವುದಿಲ್ಲ. ಕೇಳಿಸಿಕೊಳ್ಳುವುದರ ಜತೆಗೆ ನೋಟವೂ ಬೇಕು. ಇದಕ್ಕೆ ಮುಖ್ಯ ಕಾರಣವೆಂದರೆ ಕಲ್ಪನಾ ಶಕ್ತಿಯ ಕೊರತೆ. ಕೇವಲ ವಿಷಯವನ್ನು ಕೇಳಿಸಿಕೊಂಡು ಅದನ್ನು ಮನಸ್ಸಿನಲ್ಲಿ ಚಿತ್ರಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಏಕೆಂದರೆ ಅಚ್ಚುಕಟ್ಟಾಗಿ ತಯಾರಾದ ವಿಷಯ ಸುಲಭವಾಗಿ ಸಿಗುತ್ತಿದೆ. ಅದಕ್ಕೆ ಉದಾಹರಣೆ ಎಂದರೆ ಹಿಂದೆ ಅಜ್ಜಿ ಹೇಳುತ್ತಿದ್ದ ಕಥೆಯಲ್ಲಿ ಬರುತ್ತಿದ್ದ ಪಾತ್ರಗಳನ್ನು ನಾವು ಮನಸ್ಸಿನಲ್ಲಿ ಆ ಪಾತ್ರಗಳನ್ನು ಚಿತ್ರಿಸಿಕೊಳ್ಳುತ್ತಿದ್ದೆವು. ಆದರೆ ಈಗ ವಿಡಿಯೋದಲ್ಲಿ ಚಿತ್ರಿಸಿ ನೀಡಲಾಗುತ್ತಿದೆ. ಅದರಿಂದ ಹೆಚ್ಚು ಸಂತೋಷ ದೊರೆಯಬಹುದು, ಆದರೆ ಕಲ್ಪನಾ ಶಕ್ತಿ ಕುಂಠಿತವಾಗುತ್ತಿದೆ.
22 ವರ್ಷ ತನ್ನೊಳಗಿದ್ದ ಹೃದಯವನ್ನು 16 ವರ್ಷಗಳ ಬಳಿಕ ಮ್ಯೂಸಿಯಮ್ನಲ್ಲಿ ಕಣ್ಣೆದುರೇ ಕಂಡಳು!